Meeqqat tapersersorneqarnissaannut inatsit naapertorlugu, meeqqat angerlarsimaffiup avataanut inissinneqartarnerini periaatsit marluupput. Siulleq tassaavoq angajoqqaat akuersinerisigut angerlarsimaffimmit qimagutsitsisarneq, aappaalu angajoqqaat akuersitinnagit pinngitsaaliissummik angerlarsimaffimmit qimagutsitsisarneq.
Sermitsiamit paasissutissanik pissarsiniaraluarpugut meeqqat qanoq amerlatigisut angajoqqaat akuersinerisigut angerlarsimaffimmit peersinneqartarnersut pinngitsaaliissummik peersinneqartartunut sanilliullugu. Kisianni kisitsisit eqqortut pigineqanngillat.
Meeqqat tapersersorneqarnissaannut inatsit naapertorlugu, meeqqat angerlarsimaffiup avataanut inissinneqartarnerini periaatsit marluupput. Siulleq tassaavoq angajoqqaat akuersinerisigut angerlarsimaffimmit qimagutsitsisarneq, aappaalu angajoqqaat akuersitinnagit pinngitsaaliissummik angerlarsimaffimmit qimagutsitsisarneq.
Sermitsiamit paasissutissanik pissarsiniaraluarpugut meeqqat qanoq amerlatigisut angajoqqaat akuersinerisigut angerlarsimaffimmit peersinneqartarnersut pinngitsaaliissummik peersinneqartartunut sanilliullugu. Kisianni kisitsisit eqqortut pigineqanngillat.
Ullumikkut meeqqat 800-t missaanniittut ulloq unnuarlu angerlarsimaffinniitinneqarput ilaallu angajoqqaarsiani inissinneqarsimallutik, ilaat sivikinnerusumik ilaalli ukiut arlallit angerlarsimaffimminnit avissaarsimatinneqartarput.
Taamatuttaaq Sermitsiamit paaserusukkaluarparput angarsimaffiup avataanut inissiinerit kommunit karsiinut nunattalu karsianut tamakkiisumik qanoq akeqartarnersut. Kisianni aamma tassani kisitsisit eqqortut pigineqanngillat. Taamaattorli kisitsisit tagginneqartartut ersersippaat ukiumut 500 millioner koruuninit ikinnerunngitsut tassunga atorneqartartut.
Meeqqap imaluunniit meeqqat arlallit angerlarsimaffiup avataanut inissinneqassanersut aalajangiinissaq kommunit isumagisussaavaat. Kommunillu meeqqat tapersersorneqarnissaannut inatsit naapertorlugu akisussaaffigaat aningaasartuutissanik matussusiinissaq.
Taamaakkaluartoq Naalakkersuisut ajornartorsiummut qisuariartarnerat ersarissigaluttuinnarpoq, aamma maluginiagassaavoq meeqqat inuusuttullu angerlarsimaffiup avataanut inissinneqartarneri inuiaqatigiinni aningaasaqarnikkut ajornartorsiuteqarnermut pissutaaqataanerat taaneqartalersoq.
Taamaattoqarneranut pissutaavoq kommunit aningaasanik pissarsisarmata suliassamik naammassinninniarnissaminnut kommuninut tapiissutit aqqutigalugit.
Naalakkersuisuni ilaasortap saqqummiinermi oqaatigaa meeqqat amerlasuut angerlarsimaffiup avataanut inissinneqartarnerat pillugu suliniutinik ingerlatsisoqartoq, taamatuttaaq aamma matumani oqaatigaa "ileqquliussimasatsitut ingerlaannarsinnaajunnaartugut".
Iliuusissatut siunnersuutit naammassingajalerput
- Sunaliuna kukkussutaasarmat ajornartorsiut ukiumut ukiumut annertusiartuinnartoq? Inatsisit malillugit kommunit qanoq iliortariaqartarnerat allassimavoq, kommunit meeqqanik peersitsisarnersut ajornannginnerpaamik aaqqiissutissarsiortarsimappat imaaliallaannarlu meeqqanik angerlarsimaffiup avaraanut inissiiginnartarlutik? Naalakkersuisut qanoq iliussappat?
- Meeqqanut inuusuttunullu naalakkersuisoq maanna kommuninik oqaloqatiginnippoq. Suliassat taamaattut siunissami qanoq suliarineqartarnissaat naalakkersuisup akisussaasup kommunit suleqatigalugit aaqqiissutissanik siunnersuuteqassapput, aningaasaqarnermut akileraartarnermullu naalakkersuisoq, Múte Bourup Egede (IA), akivoq nangillunilu:
- Ukiut arlaqanngitsut ingerlanerini pisortat inissiisarnernut aningaasartuutaat 35 procentit missaannik qaffariarsimapput. Pisariaqarluinnarpoq siunissami ilaqutariit avissaartiinnarnagit, suleqatigalugilli ilaqutariit qajannartumik inissisimasut nukittorsarnissaat sulissutigisariaqarparput, taamaalilluta ilaqutariit atugaannik atugarissaarnissaannillu nukittorsaasarneq aqqutissiuuttariaqarparput.
- Qanoq sukkatigisumik allannguiniarluni sulineq taanna atuutilersinniarneqassava?
- Pilertortumik. Meeqqanut, inuusuttunut ilaqutariinnullu Naalakkersuisoq qaammatip tulliata ingerlanerani siunnersuutissanik saqqummiussissaaq. Tassungalu atatillugu anguniagarput tassaavoq siunissami pisortat ilaqutariinnik avissaartitsinaveersaartarnissaat, ineriartorneq taanna qaangertariaqarparput, tassami Naalakkersuisunit upperaarput piffissaagallartillugu ilaqutariit qajannartumik inissisimasut tapersersorlugillu ikiorneqartarnerisigut ilaqutariit nukittorsarneqaaannaratik, peqqissumik inuuneqarnissaannik pilersitsisinnaalernissaannut aqqutissiuussisarneq aqqutissaasoq, meeqqat angerlarsimaffiup avataanut inissinneqartarnernerisa pinaveersaartinneratigut.
Siunnerfik taanna politikkikkut anguniakkatut piffissap sivisuup ingerlanerani nalunaarutigineqartarpoq , inatsisinuku ajornartorsiutaasut, ilaqutariit avissaartinneqarsinnaanerisa ajornanngitsorujussuuneranut?
- Uteqqissavara, meeqqanut, inuusuttunut ilaqutariinnullu Naalakkersuisoq aaqqiissutissanik siunnersuusiornissaq tamaviaarutigalugu sulissutiginnippoq, aningaasaqarnermut siunnersuutip saqqummiunneqarnerani ajornartorsiutip ilanngullugu taaneqarneranut pissutaa tassaavoq innuttaasut ilisimatinneqarnissaat takkuttoqalersoq, iliuusissatullu siunnersuut qaammatip tulliata ingerlanerani saqqummiunneqarnissaa pilersaarutaavoq, Múte Bourup Egede (IA) naggasiivoq.
