Mette Frederiksen Nuummut mippoq

Ministeriuneq Mette Frederiksen (Socialdemokratiet) Nuummut ullumi tikippoq.

Naalakkersuisut Siulittaasuata Jens-Frederik Nielsenip (D) Mette Frederiksen tikimmat mittarfimmi tikilluaqquaa.

Mette Frederiksenip timmisartua nalunaaqutaq 11.08 mippoq, tikittorlu tikilluaqquniarlugu Jens-Frederik Nielsen piareersimavoq. Nunat siuttui taakkua marluk eqitaarlutik ilassipput.

Ministeriuneq tikereerluni niuffiortunut aalaterivoq, tikinnerminillu minutsit 15-it qaangiuttullu Jens-Frederik Nielsen peqatigalugu mittarfimmit Nuup Saavanut, Hans Egedep illuanut ingerlaqqipput. Naallu tusagassiortorpassuit malinnaagaluartut taakkua marluk tusagassiortunut oqaaseqanngillat.

Nunat siuttui taakkua marluk ataatsimiissapput, tusagassiortunilli katersortitsinissaat pilersaarutaanngilaq. Naalakkersuisut Facebookimi quppernerminni taama allapput.

Jens-Frederik Nielsenip piffissami matumani qanittumik suleqatigiinneq pitsaasuunerarpaa.

- Ataavartumik ataatsimiippugut, sapaatip akunnera kingulleq aamma ataatsimiippugut. Ataaatsimooqqissaarpugut piffissami matumani, Jens-Frederik oqarpoq. 

Mette Frederiksenili issuarlugu Ministeriuneqarfik X-imi ima allappoq: “Nuummut tikeqqammerpunga. Kalaallit Nunaannut tikeqqinnera nuannaarutigaara. Suleqatigiinnitta nangeqqinnissaa qilanaaraara, aamma peqatigiilluta suleriaqqinnissatsinnut piareersarnissamut qilanaarpunga. Jens-Frederik qujanaq tikilluaqqusilluarninnut.”

Ministeriuneq Mette Frederiksen Bruxellesimiissinnarluni ullumi Nuummukarpoq, Nuummiinnerminilu Jens-Frederik Nielsen ataatsimeeqatigissagaa Ministeriuneqarfik X-imi ilisimatitsivoq. Ministeriuneqarfimmit allataminni annerusumik paasissutissiinngillat.

Ministeriunerit tallimat Danmarkimeersut, Sverigemeersut, Norgemeersut, Finlandimeersut Islandimeersullu nunatsinni tallimanngornermi ataatsimiittussaagaluartut Norgemi tusagassiorfik NRK allappoq. Ataatsimiinnissarli nunatsinni pisut kingulliit ineriartornerat peqqutigalugu kinguartinneqarpoq.

Nunarput pillugu isumaqatigiissuteqarsimallutik amerikamiut præsidentiata Donald Trumpip NATO-p qullersaa Mark Rutte sapaatip-akunnerani uani ataatsimeeqatigereerlugu oqarpoq. Taakkua marluk sunarpiaq isumaqatigiissutigisimaneraat suli paasisaqarfiginngilarput.