Mikael Petersen toqukkut qimaguppoq
KNAPK-mi siunnersortaaneq pisortallu tullia Mikael ‘Miija’ Petersen sivikitsumik napparsimareerluni toqukkut qimaguppoq.
Mikael Petersen Siumumi Naleqqamilu allattaanertut atorfeqarnikuullunilu Inatsisartuni Naalakkersuisunilu ilaasortaanikuuvoq.
Assi: Leiff Josefsen
Siumumi Naleqqamilu allattaanerunikoq KNAPK-milu pisortap tullia Mikael Petersen toqukkut qimaguppoq.
Mikael Petersenip sulisitsisua KNAPK eqqaniummi allappoq.
Mikael Petersen ukiorpassuarni politikkimi suliaqarpoq, arlaleriarluni Siumumi allattaanertut atorfeqarnikuulluni, aamma partiip siulersuisuunerini ukiuni arlalinni ilaasortaanikuulluni.
Mikael Petersen aamma Inatsisartunut ilaasortaanikuuvoq, isumaginninnermut suliffeqarnermullu naalakkersuisutut Naalakkersuisunut 1997-imiit 2000-imut ilaasortaanikuulluni. Naalakkersuisut 2002-miit 2003-mut aamma ilaasortaanikuuvoq.
Mikael Petersen Siumumi allattaanerunermini nikanarsaalluni tiinganiarsimasutut 2020-mi unnerluutigineqarmat tamanit oqallisaangaatsiarpoq, pisumilu tassani kannguttaatsuliorsimasutut 2021-mi pisuutinneqarpoq.
Mikael Petersen Naleqqami allattaanertut atorfeqallatsiariarluni KNAPK-mi siunnersortaanertut pisortallu tulliatut sulilerpoq.
Inuussutissarsiuteqartut akornanni nuimasoq
KNAPK-p siulittaasua Pele Blytmann eqqaaniummi ima allappoq:
- Qiimmassaasarnini, kissalaartuunini ilakkuminartuuninilu pillugit ikinngut suleqallu pitsaasoq maqaasissavarput, taassumami suleqatini aqqusaakkat suugaluartut atortillugit tapersersuiartuugami. Annertuumik maqaasissavarput
- Sulinerminut tunniusimasuuvoq aammalu inuppassuarnut attaveqaateqartuulluni. Sulisinnaanera angusaqarusussusialu amigaatigilissavarput. Qimatanngui eqqaamavavut misiginneqatigalugillu. Eqqaaneqarnera ataqqinartuuli, KNAPK-mi siulittassoq Pele Blytmann oqarpoq.
Mikael Petersenip nuliani, qitornani ernuttanilu qimatarai.
KNAPK-miit Mikael Petersen pillugu eqqaaniut Facebookimi atuarneqarsinnaavoq:
