Ministeri: Spaniami ikuallanneq qaminnissaanut ullut marluk aalajangiiffiusut

Spaniami nunap ikuallannerata qaminnissaanut ataasinngorneq marlunngornerlu "aalajangiisuussapput“.

Nutaarsiassaqartitsivik AFP naapertorlugu nunamut namminermut ministeri Fernando Grande-Marlaska ataasinngornermi ullup-qeqqata siorna taama oqarpoq.

- Qatserinissaq pingasunngornermiit ajornarsissaaq, taamaattumik ullumikkut aqagussarlu pingaarutilerujussuupput, oqarpoq

Spaniami illoqarfiit pingaarnersaata Madridip kitaani nuna ikuallappoq.

AFP naapertorlugu ataasinngornerup ullaavani, ikuallannerup siaruaakkiartornera kigaannerusoq, Madridimi oqartussat nalunaarutigaat.

Pissutsilli suli ilungersunarput innuttaasullu "mianersorluarnissaannik“, kajumissaarneqarput.

CNN naapertorlugu ikuallanneq annertunerpaaq San Juanip imeqarfiata avannaani, Madridimit 70 kilometerit missaanni kimmut ungasissusilimmi, ippoq.

CNN naapertorlugu marlunngorpat Spaniami kissatsikkiartornera ilimasaarutigineqarpoq.

Spaniap Frankrigillu ilarujussuani 35-t missaannik kiassusilimmik kissassinnaavoq, Madridillu eqqaani 40 gradit tikillugit kiatsigilersinnaalluni.

Spaniami silasiorfik Aemet ataasinngornermi ualikkut nalunaarpoq pingasunngornermiit sapaammut kiannersuaq alla takkussinnaasoq.

Spaniamiut titusindillit angerlarsimaffimminnit qimaaqquneqarlutillu allamut qimarngunnissaannut piumaffigineqarput.

Provinsimi Ávilami, Madridimit 100 kilometerit inorlugit kitaani ungasissusilimmi San Juanillu imeqarfiata eqqaani, nunaminertat 47.000 hektarisut annertutigisut ikuallattut, nutaarsiassaqartitsivik dpa naapertorlugu nunamut namminermut ministeri Grande-Marlaska taama oqarpoq.

Falster 51.000 hektarit missaanik angissuseqarpoq.

Nutaarsiassaqartitsivik naapertorlugu ilimagineqartutullu eqquutissappata Ávilami ikuallanneq 1968-imi pisortatigoortumik nalunaarsuisoqartalerneraniilli, Spaniami nunap ikuallannerani annersaassaaq.

Spaniami ministeriunerup Pedro Sánchezip nunarsuup kissatsikkiartornera ikuallannernut toqqaannartumik pissutaasut ataasinngornermi oqaatigaa.

Taassuma tamanna "silaannaap allanngoriartorneranut ersiutit annerpaatut“ taavaa.

- Tamanna qaqutigoortuujunnaarpoq, maannali nalinginnaasunngorpoq, AFP naapertorlugu Maridimi ataatsimiinnermi taanna oqarpoq:

Silap pissusiata allanngoriartornera akiorniarlugu nuna tamakkerlugu isumaqatigiissuteqartoqartariaqartoq, Spaniami tusagassiorfik RTVE naapertorlugu Sánchez isumaqarpoq

- Tamanna nuna tamakkerlugu pingaarnersiorneqartariaqarpoq, Sánchez oqarpoq.

Spaniami illoqarfissuarmi Valenciap eqqaani orpippassuarni aamma ikuallattoqarpoq, soorluttaaq eqqaamiuani Frankrigimi sapaatit-akunnerini makkunani nuna tamakkerlugu annertuumik ikuallattoqartoq.

RITZAU