Misissuineq nutaaq: Kommunefogedinit aperineqartunit 29-nit 28-t pikkorissaanerit sungiusarnerillu amigaatigigaat

Kommunefogedit inoqarfinni minnerni toqqissisimanermik pilersitseqataassapput. Suliassaminnulli naammattumik tamatigut piareersarneqartannginneq misigaat. Tamanna kommunefogedit sulinermi atugaat pillugu Ilisimatusarfimmit misissuinermi takuneqarsinnaavoq.

Misissuinermi apeqqutini immersugassiani peqataasunit 29-nit 28-t pikkorissarnermik sungiusarnermilluunniit amigaateqarnertik akissutigaat. Kissaatit imminut illersornermit tarnikkullu ikiueqqaarnermit inatsisinik politiillu suliaannut ilisimasaqarluarnerunissamut tunngaviupput.

– Pikkorissaanernik taakkunannga aallartitsinissamik pisariaqartitsineq ersarissoq takuarput. Tamannalu taarseraannerujussuup pingaarnerulersikkaa, Najaaraq Demant-Poort, Ilisimatusarfik sinnerlugu misissuinermik aqutsisoq oqarpoq.

Kommunefogedit piffimminni innuttaapput politiit suliaannik piffinni politiitut ilinniarsimasut ulluinnarni najuffiginngisaanni suliaqartarput. Suliassat ilaatigut tassaasinnaapput piffinnik pinerluffiusunik isumannaarinninnerit, tigusarinninnerit ujarlernernilu peqataanerit. Kalaallit Nunaani kommunefogeditut atorfiit 74-iupput, amerlanerpaallu inuttaqarput.

Pisut ilungersunartut qamuuna misigisaqartitsisarput

Misissuinermi piffimmit piffimmut sulinerup annertuumik assigiinngissuteqarnera takutinneqarpoq. Kommunefogedit ilaat annertunermik allaffissornikkut suliaqartarput, allallu qaammammut arlaleriarlutik orniguttarput ilaatigullu sakkortuunik misigisaqartarlutik.

Apeqqummi ”pisut sorliit kommunefogeditut sulinini initunersaappat” imminut toquttarnerit ajunaarnerillu kommunefogedit qamuuna attortissutigisaraat malunnarpoq, ilisimatusartoq nalunaarusiami allappoq. Akissuteqartut affaaat sinnerlugit pisunik soorlu toqutsinernik, imminut toqunnernik toqusulluunniit timaannik misissuinernik misigisaqarsimapput.

Unammillernartoqartaraluartoq, taamaattoq kommunefogedit amerlasuut atuunnertik, isigineqarnermik tusaamaneqarluarnermillu attuumasoq nuannarigaat, Najaaraq Demant-Poort erseqqissaavoq.

Kommunefogedilli politiini allanik attaveqarnerunissamik kissaateqarnerat misissuinermi uteqqiattumik oqariartuutaavoq.

– Amerlanerit politiini kalaallimit psykologimik ikiorserneqarsinnaanermut periarfissaq ilisimaarilluarpaat. Amerlasuullu assersuutigalugu sakkortuumik misigisaqarnerup kingorna periarfissaq aamma atorsimavaat. Tamannalu soorunami pitsaalluinnartuuvoq, Demant-Poort oqarpoq.

Amerlasuulli ujartugaat tassaavoq suleqatinik suliat passunneqarneranik ilitsersuillutillu ikiuusiinnaasunik ulluinnarni attaveqarnerunissaq.

Nalunaarusiami politeeqarfinnit arfinilinnit marluk qanimut suleqateqarlunilu attaveqarluartutut erseqqissarpai. Piffini allani sisamani kommunefogedit suleqataasalu akornanni suleqatigiinnerup nukittorsarneqarnissaanik pisariaqartitsineq, ilisimatusartut tikkuarpaat.

Tatiginninneq tamatigut naammanneq ajortoq

Politiit suleqatit aqutsisullu amerlasuut kommunefogedit piginnaasaat tatigigaat, Najaaraq Demant-Poort oqaluttuarpoq. Tamannali imminermini tamatigut naammanneq ajorpoq.

– Pisortarisat tungaannit tamanna sulinermi akuliutinngikkaangata nersualaarutitut eqqarsaataasinnaavoq. Tamannali kommunefogedit pisortaminnit tusagaqarneq ajoraangamik tamatigut nersualaarneqarnertut misigineq ajoraat, taanna oqaluttuarpoq.

Politeeqarfinni minnerni politiit aamma ulapputtarnerat, nalunaarusiami ilanngullugu tikkuarneqarpoq. Taamaammat sulisut kommunefogedit ilinniartinnissaannik, atortulersornissaannut ataavartumillu politiinik attaveqarnerannik isumaginnittussat aamma annertunerusumik tapersersorneqarnissaat, ilisimatusartut kaammattuutigaat.

Ajornartorsiutit ilaat atortunut amigaataasunut tunngapput. Tamakku soorlu tassaasinnaapput politiit atortui, soorlu eqqornaveeqqutit, anaattat pebersprayillu. Aammali atortuusinnaapput ulluinnarni nalinginnaasut:

– Piffiit ilaanni kommunefogedit atortussanik atugassaminnik nammineq pissarsisarnerat takuarput, soorlu printerinik allaffissornermi atugassaminnik. Suliffeqarfilli tassani isumaginnittussaagaluarpoq, Najaaraq Demant-Poort oqarpoq.

Oqaatsinik porfiit aalajangersimasunik periuseqarfiunngitsut

Taamattaaq oqaatsit suleqatigiinnermi ilungersunartorsiortitsisarput. Kommunefogedit nalinginnaasumik kalaallisut oqaaseqartuupput, ilaatigooriarlutillu politiinik danskisut oqaasilinnik suleqateqartussat.

Nuummi pigaartoqarfik piffinnilu kommunefogedinut akisussaasut ajornartorsiutit ilaat iliuuseqarfigisarpaat, kommunefogedimmi kalaallisut ilitsersorneqarsinnaasarmata. Pigaartoqarfiulli avataani inunnik pissarsiarineqarsinnaasunit nutserinerit isumagineqartarnerannut assersuutit ilisimatusartut nalaappaat.

Ilaatigut allaffimmiut, politiinut ikiortit ilaqutaasullu nutserinermik ikiuuttarnerat, nalunaarusiami nassuiarneqarpoq.

– Oqaatsitigut aporfiit soorunami politiit suliffeqarfianni atugassarititat ilagaat. Illuatungeriilli qanoq tassannga passussisarnerannik malitassiaqannginnera tupaallaatigaarput, Najaaraq Demant-Poort oqarpoq.

Ilaatigut politiit angalatitat piareersarneqartarnerat taassuma tikkuarpaa:

– Assersuutigalugu politiit angalatitat pisuni nutserisumik atuinermi pissutsinik ilitsersuunneqartannginnerat maluginiarparput. Periarfissaq alla tassaavoq inunnik nutserinermik sulianik isumaginnereersunik ilinniartitsineq.

Ukiumut pingajorarterutaasa missaat taarserneqartartut

Piffissami ukiuni tallimani nalunaarusiap samminniffigisaani, kommunefogedinik taarseraattarneq 30-t 37 procentillu akornanniippoq. Tamatuma nunatsinni ukiut tamaasa kommunefogedit pingajorarterutaasa atorfimminnik tunuartarnerannik kinguneqarpoq.

Soorlu taamaattoqarneranik akinissamut Najaaraq Demant-Poort mianersorpoq:

– Ataatsimut isigalugu kommunefogedit atuuffiini, nunaqarfinnit minnernit nussortoqarneranik patsiseqartumik aaqqissuussaanikkut ilungersunartoqarnera nassuiarparput. Kommunefogedillu sulinerminni suna ajornakusoortittarnerat aamma ilisimasaqarfiginerulerparput, taanna oqarpoq.

– Qanorli amerlatigisut arlaannik patsiseqartumik suliffimminnik qimaguttarnerannut erseqqissunik paasissutissaateqanngilagut. Taamaattoqarnissaani kommunefogediusimasut amerlanerit oqaloqatigalugit allamik misissuinissamik pisariaqartitsiviussaaq, Najaaraq Demant-Poort oqarpoq.

Sermitsiap malitseqaataasumik allaaserisami misissuinermut kaammattuutinullu Kalaallit Nunaanni Politiit oqaaseqarnissaannik neqeroorfigai.