Mittarfissaq misilittarneqartoq

Qaqortumi mittarfik nutaaq sisamanngorpat atoqqaartinneqassaaq.

Mittarfik inaarutaasumik akuerineqarnissaanut atatillugu timmisartoq siullermeerluni sapaatip-akunnerani matumani marlunngornermi misilerarneqarpoq.

Greenland Airports Facebookimi allappoq:

- Unnuk silagillunilu nuannerluinnartoq, alapernaattorpassuit qaqqajunnap qaaniit isiginnaariartorlutik alakkaasimapput, tikimmallu nuannaarlutik ersaattaallutik, suliffeqarfik allappoq.

Timmisartoq misilinneqarmat timmisartumut ikiartortussat, ilaasut nalunaarsorneqartarnerat, isumannaallisaanikkut nakkutilliineq, timmisartumut ikittaartut mittarfinnilu ingerlatsinerit allat arlallit misilinneqartut Air Greenland allappoq.

Timmisartoq misiliutitut Narsarsuaq aqqusaarlugu Qaqortumut ingerlaarpoq, iluatsilluartumik misilereerluni, unnukkut nalunaaqutaq ataatsip qeqqa missaani Nuummut aallarpoq.

Timmisartoq siulleq mittoq

Pilersaarutit naapertorlugit timmisartoq Nuummit aallartoq siulleq sisamanngornermi nalunaaqutaq 08.55 mittarfimmut missaaq.

Timmisartoq Nuummiit nalunaaqutaq 10.10 aallartinnagu mittarfimmi ammaanersiorneq malunnartinneqassaaq.

Qatserisartut misissuinerat aamma mittarfimmi inissaanik killeqarneq pissutigalugit ammaanersiornerup nalaani illullu iluanut iserneq killilerneqarsimasoq, Greenland Airports nalunaarpoq.

Katersortarfimmi kaffillerneq

Angalasut kiisalu sulisut soqutigisaqaqatigisallu kisimik timmisartoqarfimmiinnissaanut nal. 11.00 missaata tungaanut tikilluaqqusaapput.

- Qaqortumi mittarfiup ammarneqarneranik soqutiginninneq nuannaarutigeqaarput, nalunngilarpullu amerlasuut ullormi tamatumani peqataarusuttut. Ammaanersiornermi aaqqissuussinerup kingorna matup ammarnissaa terminalillu nutaap takutinnissaa qilanaaraarput, Greenland Airports Facebookimi quppernermini allappoq.

Aamma illoqarfiup katersortarfiani kaffillertoqassaaq.