Motzfeldt Løkkelu ataatsimiinnerup kingorna: Suli USA-lu isumaqatigiinngilagut

Kalaallit Nunaannit, Danmarkimit USA-miillu Washingtonimi ataatsimiinnerup kingorna tusagassiortunik katersortitsineq maanna aallartippoq.

Nunanut allanut tunngasunut naalakkersuisoq Vivian Motzfeldt (S) aamma danskit nunanut allanut tunngasunut ministeriat Lars Løkke Rasmussen, ataatsimiinneq pillugu oqaaseqassapput.

- Kunngeqarfik Danmark annertuumik maanna iliuuseqareerpoq. Umiarsuit, dronet, timmisartut allallu - soorunami suli annertunerusumik iliuuseqarsinnaavugut, ataatsimiinneq pillugu Lars Løkke Rasmussen oqarpoq.

Taanna oqaluttuarpoq USA-p Kalaallit Nunaat suli pigerusukkaa. 

- Taamaammat suli isumaqatigiinngissuteqarpugut, isumaqatigiinnginnerpullu isumaqatigiissutigaarput. Isumaqatigiippugulli oqaloqatigiinneq ingerlatiinnassallugu.

Isumaqatigiipput eqimattamik aallartitsisoqassasoq, tamannalu pissaaq sapaatit akunnerialuit ingerlaneranni.

Præsidentip kissaatai naaperiarneqarniartut

Vivian Motzfeldt oqaluttuarpoq oqaloqatigiinneq ataqqeqatigiinnermik tunngaveqarsimasoq.

- Asasakka nunaqqatikka, nalunngilara tamassi malinnaasusi. Ulloq una tamatsinnut pissanganarsimavoq, oqarsinnaavungali ataatsimiinneq ingerlalluarsimammat. Ataqqeqatigiinneq tunngavigalugu oqaoqatigiinnerit ingerlasimapput. Siunissami aqqutit siumut isigisumik ingerlanniarlugit isumaqatigiissimalluta, kalaallisut oqarpoq.

Kunngeqarfiup killeqarfii ataqqineqartillugit præsidentip isumakuluutaanut tunngatillugu iliuuseqartoqarsinnaanersoq misissorneqartoq, Lars Løkke Rasmusen oqarpoq.

Aamma oqarpoq USA-p Kalaallit Nunaannik tiguaanissaa pisariaqanngitsoq.

- Isumaqarpunga USA-mik suleqateqarnerup nukittorsarneqarnissaa pingaaruteqartoq, imaanngilaq USA-mit pigineqarniartugut, kisiannili suleqatigiittut suleqatigiinnitta nukittorsarnissaa pingaaruteqarpoq, Vivian Motzfeldt oqarpoq.

Præsidentip isiginnittariaasia unammillersimagaat

- Præsidentip ilisimasai unammillersinnaasimavagut, Lars Løkke Rasmussen oqarpoq, oqarlunilu amerikamiut ilisimatinneqarsimasut Kalaallit Nunaanni russit kinamiullu umiarsuaannik sorsuutinik ulikkaanngitsoq.

Taanna naapertorlugu qallunaat isertortumik paasiniaasartuisa paasissutissaat innersuussutigalugu Kinamiut umiarsuaat sorsuutit ukiuni qulini sinnerlugit Kalaallit Nunaanniissimasimanngillat.

Amerikamiut isiginnittariaasiat allanngortinneqarsinnaasimanngitsoq

Lars Løkke oqarpoq Amerikamiut isiginnittaasiat allanngortinneqarsinnaasimanngitsoq, aammali tamanna ilimagisimanagu.

- Oqarsinnaanngilanga suut tamarmik aaqqinneqareersut. Taamaanngilarli. Amerikamiut isiginnittaasiat allanngortissinnaasimanngilarput, aammali tamanna naatsorsuutigisimanngilara. Erseqqippoq præsidenti Kalaallit Nunaannik tiguaaniarsarisoq, oqarpoq, erseqqissarpaali qallunaat kalaallillu taama kissaateqanngitsut.

- Ataatsimiinneq ataqqinnittumik ingerlanneqarpoq, sumilu killeqarnerput takutereeripput, isumaqarpungalu siumut isiginissaq pingaaruteqartoq, Vivian Motzfeldt oqarpoq.

Lars Løkke oqarpoq Danmarki Kalaallit Nunaallu ukiuni hundredelikkaani ataqatigiissimasut sulilu ataqatigiittut.