Motzfeldt: USA-p aallartitaata immikkut ittumik aallartitaqarnissaq eqqaanngilaa
USA-p Kunngeqarfimmi aallartitaata Kenneth Howery-p tikeraarneranit sapaatit akunnerit marluinnaat qaangiuttut Donald Trump nalunaarpoq USA-p Louisianami guvernøri Jeff Landry Kalaallit Nunaannut immikkut aallartitaasutut toqqarsimagaa. Pilersaarutilli tamakkua Kalaallit Nunaannut ilisimatitsissutigineqarsimanngillat, nunanut allanut naalakkersuisoq oqarpoq.
Naalakkersuisoq Vivian Motzfeldt USA-p aallartitaa Ken Howery assamminik eqippaa. Tusagassiortunik katersortitsinermi erseqqissarneqarpoq tatigeqatigiinneq pilerseqqinneqartariaqartoq.
Assi: Morten Okkels
Sapaatit-akunneri marluk matuma siorna Kalaallit Nunaat USA-lu ataqqeqatigiinnissamik neriorsoqatigiipput.
Tamanna pivoq Naalakkersuisut, danskit atorfilittai USA-llu aallartitaa Kenneth Howery Joint Committeemi ataatsimeeqatigiinnerisa kingorna ataatsimoorluni nalunaarummi. Aamma Nunanut Allanut tunngasunut Naalakkersuisup Vivian Motzfeldtip USA-llu aallartitaata Kenneth Howeryp tusagassiortunik katersortitsineranni erseqqissarneqarpoq ataqqeqatigiinneq tatiginninnerlu pilerseqqinneqartariaqartut.
USA-mili præsidenti Donald Trump nalunaarmat USA-p Louisianami guvernøria Jeff Landry Kalaallit Nunaannut immikkut aallartitatut toqqarsimagaa, Kalaallit Nunaata USA-llu akornanni tatigeqatigiinneq pilerseqqikkuminaassagunarpoq.
Nunanut allanut tunngasunut Naalakkersuisoq Vivian Motzfeldt (S) Naalakkersuisut siulittaasuat Jens-Frederik Nielsen (D) assigalugu ilisimatitsivoq USA-p aallartitaa Kenneth Howery sapaatit akunneri marluk matuma siorna tikeraarnermini Kalaallit Nunaanni immikkut aallartitaqarnissamik pilersaartoqarneranik eqqaasaqartoqanngitsoq. Tamannalu tatiginninnernik qajannaatsunillu unioqqutitsineruvoq:
- USA Nunatsinnut immikkut aallartitaqalernissaanik pilersaaruteqarneq pillugu Naalakkersuisut ilisimatinneqarnikuunngillat. Qanittumi USA-p Kunngeqarfimmut aallartitaat Kenneth Howery naapipparput ilisimatinngilaatigullu taamatut pilersaarusiortoqartoq. Tamanna tatiginninnermik takutitsinerunngilaq.
Ataqqeqatigiittoqassaaq
Vivian Motzfeldtip erseqqissarpaa Kalaallit Nunaanni pissutsit allanngussanngitsut immikkut aallartitamik toqqaasoqaraluartoq. USA sumiiffinni ingammik akerleriiffiusuni isumaqatigiinniarnerillu ajornakusoornerusuni immikkut aallartitanik atuisarpoq.
Donald Trumpip nalunaarutaa aallarnerfigalugu kalaallit qallunaallu politikerii tamarmik ataatsimut oqariartaaseq ataaseq qisuariaatigisarpaat: Ataqqeqatigiittoqartariaqarpoq.
- Issittumi sillimaniarneq illersornissarlu eqqarsaatigalugit Nunatta USA-lu suleqatigiinnissaq pisariaqartippaat. Suleqatigiinneq pissaaq politikkikkut immitsinnut kiinnerluta ataqqeqatigiillutalu nunallu tamalaat akornanni inatsisit tamallu oqartussaaqataanerat ataqqillugit, Naalakkersuisoq oqarpoq nangillunilu:
- Uagut politikkikkut naapissinnaavugut naatsorsuutigaarpulli USA-p demokratiskimik ingerlatsineq ilisimaarilluaraa ilisimassagaalu nunatta politikkikkut inissisimaffia suullu pingaartitarinerivut. Naatsorsuutigaarput angusaqarfiusussamik ataqqinnittumillu oqaloqatigiinnittoqarumaartoq. Naatsorsuutigaarpullu piffissami aggersumi amerikarmiut akunnerminni ataqatigiissaakkamik oqariartuuteqartassasut.
