Múte B. Egede: Aalajangersimasariaqarpugut periarfissallu nutaat isiginiartariaqarlugit

Múte B. Egede (IA) nunanut allanut, inuutissarsiutinut aatsitassanullu naalakkersuisunngorluni Vivian Motzfeldtip Naaja H. Nathanielsenillu akisussaaffii pingaarutillit marluk akisussaaffigilerpai.

Naalakkersuisut Vivian Motzfeldtip tunngaviliussaa pitsaasoq attatiinnarlugu sulissasut oqarpoq:

- Suliamut nangitassannut pitsaasumik tunngaviliisoqarnikuuvoq. Piffissami pissanganartorsiorfiusumi inuuvugut avataaneersunit tatineqangaarfiusumi. Eqqaamasariaqarparpulli tamanna aamma nunatsinnut periarfissanik nutaanik siornatigut pigisimanngisatsinnik pilersitsisoq, tamannalu aamma ukkatarissavarput, Múte B. Egede Sermitsiamut oqarpoq.

- Susassaqarfiit imminnut atassuteqarput

Múte B. Egede aningaasaqarnermut akileraartarnermullu naalakkersuisuugaluartoq susassaqarfiit pingaarutillit pingasut ataatsikkut isumagisinnaallugit nangaanani oqarpoq.

Susassaqarfiit taakku pingasut imminnut attuumassuteqartut nassuiaatigaa.

- Nunanut allanut tunngasut sillimaniarnermullu politikki aamma aatsitassanut, inussutissarsiutinut suleqatigiinnermullu tunngassuteqarput.

- Nunanut allanut tunngasunut naalakkersuisutut angalagaanni aatsitassarsiorneq inuussutissarsiornerlu eqqartorneqartarput, oqarpoq.

Aalajangersimasumik pingaartitaqartoq

Nalunngilaali akisussaaffinni nutaani suut pingaarnerpaatissanerlugit.

- Aalajangiusimanissaq pingaaruteqarpoq. Taamatut tatineqartilluta naalakkersuisut suliassaat pingaarnerpaaq tassaavoq nunatta nammineq aalajangiisinnaassuseqarnerata attannissaata erseqqissumik oqaatiginissaa.

- Aamma periarfissat atorluarnissaat sulissutigisariaqarparput, Múte B. Egede oqarpoq.

Múte B. Egedep nunanut allanut tunngasunut naalakkersuisutut USA-mik isumaqatiginninniarnerit, Vivian Motzfeldtip naalakkersuinerata nalaani aallartinneqartut isumaqatigiissutigineqartullu, nangeqqissavai.

Isumaqatiginninniarnermi ilaatigut Amerikamiut Kalaallit Nunaanni sakkutooqarnerusinnaanerminnik kissaateqarnerat inissinniarneqassaaq.