Múte B. Egede: Aningaasanik pisiarineqarsinnaanngilaq

Illersornissamut isumaqatigiissut nutaaq pillugu Inatsisartuni ataasinngornermi nalunaaquttap-akunnerini tallimani oqallittoqareersoq, Sermitsiap Nunanut Allanut Naalakkersuisoq, Múte B. Egede (IA), apersorpaa.

- Inatsisartuni suliarineqarnera naammagisimaarpara. Tusaasinnaavara kissaatit amerlasuut piumaneqartut, aammali tusaasinnaavara isumaqatigiissut taannarpiaq taassumalu imarisai tapersersorneqarluartut.

– Partiit aamma tunngaviusumik isumaqatigiipput suliassaqarfiit ilaat iliuuseqarfigineqarnerusariaqartut, Múte B. Egede oqarpoq.

Taassuma maluginiarpaa partiit arlallit kiffartuussinissamik ingerlatsinermillu isumaqatigiissutini kalaallit suliffeqarfiutaasa ilumut salliutinneqarnissaat qulakkeerniarlugu erseqqissumik sinaakkutissaqartoqarnissaa kissaatigigaat.

Ilaatigut Siumut Inatsisartuni ilaasortaatitaasa oqaatigaat suliffeqarfiit aningaasarpassuarnik nunamit annissuisoqartillugu atorneqartartut nakkutigineqassasut.

- Taamatut kissaateqarsimanerput asuliinnaanngilaq. Danskit kalaallillu suliffeqarfiannik siornatigut taaneqartaraluarpoq, maannakkulli kalaallit suliffeqarfiutaanik taaneqartarpoq.

- Sakkutooqarfiit kiffartuussinissamik isumaqatigiissutaat kalaallit suliffeqarfiisa sapinngisamik iluaqutiginerpaasariaqaraat, Naalakkersuisut isumaqarput, Múte B. Egede oqarpoq.

Taassuma paasissutissiissutigaa isumaqatigiissut Inatsisartuni Folketingimilu akuerineqareerpat qanoq piviusunngortinneqarsinnaanera itinerusumik misissuiffigineqassasoq.

USA-p Kalaallit Nunaata namminersuilivissinnaanera akueraa

AAMMA ATUARUK

Siumup Kim Kielsenip illersornissamut isumaqatigiissut pillugu aalajangiinera naammagittaalliuutigissavaa

Kalaallit Nunaat aningaasatigut annertunerusumik iluaqutissinneqannginnera, Naleqqap oqaaseqartartuata partiinut allanut apeqquteqaammini isumaqatigiissut isornartorsiorpaa.

Naleqqap isumaqatigiissut tamanna Kalaallit Nunaata aningaasatigut iluanaarutiginngikkaa isornartorsiorpaa. Tamanna pillugu qanoq isumaqarpit?

- Aallaqqaammulli oqartarpugut Kalaallit Nunaat tuniniarneqanngitsoq. Nioqqutaanngilagut. Nunaavugut. Nuna suleqatigineqarsinnaasoq nunalu isumaqatigiissuteqarfigineqarsinnaasoq. Tamanna tunngavigalugu Naalakkersuisut sulipput. Isumaqarpungalu pingaarnerpaaq tassaasoq aningaasanik pisiarineqarsinnaanngitsoq.

- Inatsisitigut ataqqineqartussamik inooriaaseqarnerput, inuiaqatigiittut inatsisit naapertorlugit pisinnaatitaaffeqarnerput USA-mit akuerineqarpoq, tamanna aningaasanik pisiarineqarsinnaanngilaq.

Partiit arlallit isumaqatigiissut ataavartumik nakkutigineqarnissaa kissaatigaat, nunanullu allanut tunngasunut naalakkersuisoq tamatumunnga ammavoq.

- Qanoq iliortoqarsinnaanersoq misissussavarput, nunanut allanut tunngasunut ataatsimiititaliaq qanimut suleqatigilereerparput, kisianni qanoq ililluta sulissutigisinnaaneripput misissorpavut.

- Paasivarput partiit soorunami aamma siuariartortoqarnissaa kissaatigigaat, qanorlu pisoqarnera takujumagaat, tamannalu tikilluaqquarput, Múte B. Egede oqarpoq.

Illersornissamut isumaqatigiissut ataatsimiititaliami suliarineqanngikkaluarluni aappassaaneerneqassaaq.