IA-P NUNA TAMAKKERLUGU ATAATSIMEERSUARNERA 2024
Múte B. Egede Inuit Ataqatigiinni siulittaasutut ingerlaqqippoq
Politikkikkut sulissutissatut aalajangiussat allattorsimalereerput, partiip tunngaviusumik anguniagai allannguuteqanngillat, taamaattorli politikkikkut suliassat nutaanik ilaartorneqarput. Siulersuisuunerni Múte B. Egede unammillerteqarani ukiuni pingasuni tullerni siulittaasutut ingerlaqqinnissani qulakkeerpaa. Siulersuisuunerni ilaasortanngortut allaaserisami atuarsinnaavatit.
Politikkikkut oqallinnerit annertuut ingerlanneqareersullu maanna partiip ataatsimeersuarnerata naggataariartornerani siulersuisuunissanut 2027-ip tungaanut atuuttussanik qinersinerit aallartilerput.
Assiliisoq: Jensine Berthelsen
Maanna Inuit Ataqatigiit siulersuisuunissai qinerneqartussanngorput.
Nuna tamakkerlugu ataatsimeersuarnermi aallartitat taasisinnaasut 48-pput.
Kisianni politikki tupaallannartoqartuaannarpoq, piffissaq kingullerpaaq atorlugu sassartut ilariaannaapput. IA-p siulersuisuissaanik qinersineq uani malinnaavigiuk, qinersinerup ingerlanerani nutarterneqassaaq.
Siulittaasoq innersuunneqaqqittoq
Aallartitaasunit Kristian Jeremiassenip siulittaasumik innersuussaqarpoq. Taassuma ukiuni arfinilinni kingullerni siulittaasuusoq, Múte B. Egede Inuit Ataqatigiit siulittaasuattut ingerlaqqissasoq innersuuppaa. Innersuussinermini oqaatigaa siulittaasuusoq suleqatigiinnermut pikkoriffeqartoq, partiillu annertusaqqinnissaanut nukissaqarluartoq.
Múte B. Egede Inuit Ataqatigiinni siulittaasutut, unammillerteqarani taaneqarpoq, siulittaasutullu ingerlaqqilluni.
Siulittaasup tullia qinerneqaqqittoq
Aallartitat pingasut, Ludvig Larsen aamma Pipaluk Larsen kiisalu Ane Hansenip Pipaluk Lynge politikkikkut siulittaasup tulliatut innersuuppaat. Partiip qullersaanni inuusuttut nukinnik nutaanik pilersitsisinnaanera innersuussinermi oqariartuutigineqarpoq. Agathe Fontainilli aamma Aqqalukkuluk Fontain maanna politikkikkut siulittaasup tulliatut maanna issiasoq, Aqqaluaq B. Egede politikkikkut siulittaasup tulliatut innersuukkumavaat. Erseqqissaatigineqarpoq Aqqaluaq B. Egede atuuffimmini misilittagaqarluartuusoq, politikkikkullu siulittaasup tulliatut ingerlaqqissasoq. Agathe Fontain oqarpoq partii kukkunissamut akissaqanngitsoq.
- Isumaqarpunga siulittaasup tulliattut issiasoq Naalakkersuisuni ilaasortaassanngitsoq, politikkikkut siulittaasup tullia tunuliaqutaasunut annertuumik attaveqartartussaammat, Naalakkersuisunilu ilaasortaasut partiilersoratik sulisussaatitaanerat pissutigalugu, Pipaluk Lynge qineqqusaarnermini ilaatigut oqarpoq.
- Partii oqaluttuarisaanermi aningaasaqarnikkut pitsaasumik ingerlavoq, partiilu taanna qulersani peqataaninni akisussaaqataaffigisimavara ilusilersoqataaffigalugulu. Naalakkersuisutut sulinermut aamma partiip siulersuisuini sulinermut piffissaqarluarpunga, tamanna qularutigineqassanngilaq, Aqqaluaq B. Egede qineqqusaarnermini oqarpoq.
Aqqaluaq B. Egede 33-nit taaneqarluni politikkikkut siulittaasup tulliatut ingerlaqqippoq. Pipaluk Lynge 15-init taaneqartoq.
Siulersuisuni nukiit nutaat
Aallartitat marluk Naya Pedersen Lyberth aaqqissuussaanermut siulittaasup tulliatut innersuuppaat. Nivi Heilmann Efraimsenilu aamma marlunnit innersuunneqarluni. Agathe Fontain ataatsimeersuarnissaq sioqqullugu oqareersimavoq atuuffimmut tassunga sassaqqissanani.
Inuit Ataqatigiinni siulersuisuunerit ima inissipput:
- Siulittaasoq: Múte B. Egede
- Politikkikkut siulittaasuup tullia: Aqqaluaq B. Egede
- Aaqqissussaanermut siulittaasup tullia: Nivi Heilmann Efraimsen
- Aningaaserisoq: Bendt B. Kristiansen
- Ulluinnarni aqutsisuni ilaasortaq: Regine N. Bidstrup
- Avannaata Kommuniani IA sinnerlugu siulersuisuni ilaasortaq: Regine N. Bidstrup
- Kommune Qeqertalimmi IA sinnerlugu siulersuisuni ilaasortaq: Aannguaq René Hansen
- Qeqqata Kommuniani IA sinnerlugu siulersuisuni ilaasortaq: Juliane Enoksen
- Kommuneqarfik Sermersuumi IA sinnerlugu siulersuisuni ilaasortaq: Ludvig Larsen
- Kommune Kujallermi IA sinnerlugu siulersuisuni ilaasortaq: Pipaluk Jakobsen Larsen
- Inoqarfiit minnerit sinnerlugit siulersuisuni ilaasortaq: Anda Berthelsen
- Siulersuisuni ilaasortaq: Pipaluk Lynge
