Múte B. Egede Nuummi tusagassiortunik katersortitsivoq

Naalakkersuisuni siulittaasup tullia Múte B. Egede tusagassiortunik katersortitsinermi Kalaallit Nunaata nunat allanik attaveqarnerata pingaaruteqassusaa oqaaseqarfigaa. 

- Nunat Natomi ilaasortaasut aamma oqaloqatigerusuppagut. Upalungaarsimanermik aamma annertunerusumik suliaqartariaqarpugut, partiinilu ilaasortat suleqatigalugit. Inatsisartut periarfissaq siulleq atorlugu tamakku oqaloqatigiissutigissavagut, oqarpoq. 

Taassuma Naalakkersuisut siulittaasuata, Jens-Frederik Nielsenip oqariartuutaa, tassa nunarput ataatsimoortariaqartoq uteqqippaa. 

- Inuiaqatigiit ikittunnguuvugut, nunattali ukkatarineqarnerani immitsinnut isumassortariaqarpugut, oqarpoq.

Oqaloqatigiinneq aallartippoq

Múte B. Egedep Kalaallit Nunaata, Danmarkip aamma USA-p ullumi ataatsimeeqatigiinnerat eqqaavaa.

- Oqaloqatigiinneq aallartipparput, tamannalu pitsaasutut oqaatigisinnaavarput, pissutsilli maanna atuuttut nalileruminaapput. Eqqortorli tassaavoq aqqutit eqqortut atorlugit oqaloqatigiinneq aallartimmat, oqarpoq.

Innuttaasut pissutsit killiffii pillugit ilisimatissallugit tusagassiortunik katersortitsisoqarnerusalissasoq aamma oqaatigaa. 

Múte B. Egede oqarpoq Kalaallit Nunaat nunanit arlalinnit tatisimaneqartoq. 

- Suliassatsinni pingaarnerpaaq tassaavoq siunissarisatta nammineq ilusilersornissaa. Tamassuma tunngavilernissaa qulakkeertariaqarparput.