Naalakkersuisoq: Aalisakkeriviinnaanngitsunut innaallagissamut imermullu akikilliliisoqartalissappat allatut aaqqissuussisoqartariaqarpoq
Aalisakkeriviit saniatigut inuussutissarsiutit allat innaallagissamut imermullu akiliinikinnerusalissappata Nukissiorfiit aningaasaqarneranut ajoqutaanngitsumik periuseqartoqartariaqartoq, naalakkersuisoq Naaja H. Nathanielsen isumaqarpoq.
- 2024-mi akikilliliinermut aningaasartuutit 43,3 mio. koruuniupput, taakkuuppullu Nukissiorfiit isertitaannit annaasat. Tamanna ima paasisariaqarpoq aningaasartuut naggataagut atuisunit allanit tamanit akilerneqartarpoq, ilutigisaanillu Nukissiorfiit aningaasaqarnerannik nanertuilluni, naalakkersuisoq Naaja H. Nathanielsen akissutimini allappoq.
Assi: Kassaaluk Kristensen
Aalisakkerivinnut innaallagissamut imermullu akikinnerusumik akiliisarnermut aaqqissuussap saniatigut inuussutissarsiutini allani atuutilersinneqarsinnaanersoq Naalakkersuisut eqqarsaatigisinnaavaat?
Inatsisartunut ilaasortaq Napaartoq Isak Petrussen (D) Naalakkersuisunut taamatut apeqquteqarpoq.
Aalisakkeriviit nioqqutissiornermut aamma tunniussinermut aningaasartuutit piviusut 50%-iannit piffimminni innaallagissamut imermullu akiliisarnerat, aamma akigititat nalinginnaasumik akigitinneqartut qaquguluunniit qaangersinnaannginnerat paasinartoq politikeri allappoq.
AALISAKKERIVINNUT
AKIGITITAT
Aalisakkerivinnut akigitinneqartut ima maleruagassaqarput:
Aalisakkerivinni akigitinneqartoq illoqarfinni nunaqarfinnilu tamani innaallagissamut imermullu
immikkoortunut aningaasartuutaasut 50,0 %-ianut aalajangerneqassaaq:
- Aalisakkeriviit annerpaamik innaallagissamut imermullu akigitinneqartunut inuit allat assigalugit
akiliuteqassapput.
- Aalisakkeriviit minnerpaamik atuisunut allanut minnerpaaffittut akigitinneqartup 50,0 %-iannik
akiliuteqassapput.
Illoqarfinni nunaqarfinnilu atuisut namminersortut nalinginnaasumillu inuussutissarsiortutut
atuisut (tassa atuisut aalisakkeriveqarnermut ilaanngitsut) innaallagissamut imermullu
assigiimmik akiliisarput.
Aallerfik: Aningaasanut inatsit 2025
- Inuussutissarsiutinik allanik inerisaanissatta pisariaqartorujussuunera aamma nassuerutigisariaqarparput, pingaartumik aallarnisaasut suliffeqarfiillu minnerit nukissiornermut aningaasartuutinut annertuunut
ilungersuuteqarneranni, ineriartornissaraluaminnut naalleraataasunut, Napaatok Isak Petrussen apeqqutiminut tunngavilersuutigalugu allappoq.
Allatut aaqqissuussisoqartariaqartoq
Akikinnerusumik akeqartitsineq Nukissiorfinnut 2024-mi millionikkaanik naleqartoq, taakkulu allanit atuisunit akilerneqartartut, inuussutissarsiornermut naalakkersuisup Naaja H. Nathanielsenip (IA) akissummini ilisimatitsissutigaa:
- 2024-mi
akikilliliinermut aningaasartuutit 43,3 mio. koruuniupput, taakkuuppullu Nukissiorfiit isertitaannit
annaasat. Tamanna ima paasisariaqarpoq aningaasartuut naggataagut atuisunit allanit
tamanit akilerneqartarpoq, ilutigisaanillu Nukissiorfiit aningaasaqarnerannik
nanertuilluni, akissutigineqarpoq.
Taamaattumik inuussutissarsiortut allat taamatut aaqqiissummik aamma iluaquserneqassappata Nukissiorfiit aningaasaqarnerannut ajoqutaanngitsumik aaqqissuussisoqartariaqarpoq:
- Taamatut nutaamik aaqqissuussisoqassappat aallarnisaasunut suliffeqarfinnullu
mikinerusunut atuuttussarnik aningaasalersueriaatsirnik allamik atuisoqartariaqarpoq,
Nukissiorfiit aningaasaqamerannik ajorseriartitsinngitsumik imaluunniit akigititanut
atuisunut atuuttunut allanut sunniuneqanngitsumik, Naaja H. Nathanielsen allappoq.
Inuussutissanik nioqqutissiornerup imminullu pilersornerup iluani suliffeqarfiit
aallartisartut eqqarsaatigalugit siunnerfigalugillu aaqqissuussiffiginissaat Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmit misissuiffigineqartoq ilanngullugu paasissutissiissutigaa.
