Naalakkersuisoq erinarsortartoq

Kalaallit Nunaanni nipilersornerup silarsuaani ilisarisimaneqarluartoq Qeqertarsuarminngaanneersoq 40-nik ukiulik Maritha Broberg, Atassut, isumaginninnermut, suliffeqarnermut ilaqutariinnut nunamullu namminermut naalakkersuisutut apriilip 14-iani ivertinneqarpoq.

Taassuma politikkikkut akisussaaffik annertooq tiguaa.

Imminut tatiginera takuneqarsinnaavoq, suliassarlu nutaajugaluartoq sapinngisani tamaat atorlugu pitsaanerpaamik torersumillu naammassiniassallugu aalajangersimasumik nipeqarluni, taassuma oqaatigaa. Maritha Brobergip aatagigalua David Broberg, Landsrådimut kingornalu Qeqertarsuup Kommunerisimasaani kommunalbestyrelsimut ukiorpassuarni ilaasortaanikuuvoq. Politikkimullu soqutiginninnera tassanngaanniik aallaaveqartoq, taassumalu angajoqqaavi Qeqertarsuarmi najugaqartut, Sofie Broberg, Pilersuisumi aqutsisutut atorfeqartoq aamma Kalé Mølgaard, aalisartuullunilu piniartuusoq, oqarput.

Erinarsortartoq politikerinngortoq

Maritha Broberg ilinniarnerminut atatillugu piffissap ilaani aallaqqasarnera eqqaassanngikkaanni, inuunini tamaat Qeqertarsuarmi najugaqarpoq. Taanna marlunnik paneqarpoq, taakkuli maanna Qeqertarsuarmi suli najugaqarallarput. Piffissalli ilaani Nuummut malinnaajumaartut, anaanaasup oqaatigaa.

Naalakkersuisunut ilaasortanngorlaaq nipilersornerup silarsuaani nuna tamakkerlugu ilisarisimaneqarneruvoq, maannakkulli politikkimi aamma ilisimaneqarlualerpoq. Bentiaraq Ottosen, Atassut, isumaginninnermut, suliffeqarnermut, nunamut namminermut avatangiisinullu naalakkersuisutut siorna novembarimi tunuarpoq. Tamatuma kingorna Maritha Broberg Atassummiit naalakkersuisuni ilaasortanngortussatut decembarimi innersuunneqarpoq. Taannallu tunngavigalugu februaari aallartilaartoq Kommune Qeqertalimmi kommunalbestyrelsimiit sulinngiffeqarnissamik qinnuteqaataa akuerineqarpoq.

Kommunalbestyrelsimut siorna qinersisoqarmat 86-inik taaguunneqarluni siullermeerluni Kommune Qeqertalimmi kommunalbestyrelsimut ilaasortanngorpoq, Inatsisartunulli qinigaanngitsoorluni. Atassutip siulersuisuunerini aamma ulluinnarni aqutsisuni ilaasortaavoq, taamaattumik kommunalbestyrelsimut naalakkersuisunullu ilaasortanngornissani sioqqullugit politikkimik suliaqarnermik misilittagaqareerpoq.

Aatami tumai atuarai

Maritha Brobergip anaanaminit ataataminillu aatani aananilu meeraallunili qanillugit peroriartorpoq. Kisiannili politikkimut soqutiginninnera aataagigaluanit David Brobergimit aallaaveqartoq, Sofie Broberg oqarpoq.

- Maritha meeraallunili politikkimik soqutigisaqarpoq, tamannalu aatagigaluata David Brobergip ukiorpassuarni politikkimik suliaqarsimaneranik aallaaveqartoq isumaqarpunga.

- Aammali meeqqat atuarfianni atuartuusoq ilinniartitsisuata oqarfiginikuuaa inersimasunngoruni politikerinngornissaa, allaallu immaqa naalakkersuisunngornissaa ilimanaateqartoq, oqarpoq.

Sofie Brobergip Maritha Broberg meeraallunili imminut tatigisorujussuusoq, imminullu anguniagassikkaagami piviusunngortinnissaa tikillugu sulisartoq oqaatigaa.

Nutaarsiassaq tupaallannartoq

Atassutip siulersuisuunerisa Maritha Broberg naalakkersuisunut ilaasortassatut siorna decemberimi innersuuppaat, tamannalu angajoqqaajusunut tupaallaataasimavoq.

- Tusaqqaaratsigu soorunami tupaallappugut, taamaakkaluartoq suliassap taassuma angisuup tigunissaanut sapiutinngitsoq isumaqarpugut, Sofie Broberg oqarpoq.

- Periarfissaq tunniunneqartoq tigussagaa kaammattorparput. Nalunngilara naalakkersuisoqarfimmi suliassat annertuut oqimaatsullu ullormiit ullormut tamaasa ilikkarneqarsinnaanngitsut, kisianni Maritha piumassuseqarluarami suliaminut sukkasuumik pulanissaa qularutiginngilarput, Kalé Mølgaard oqarpoq.

Maritha Brobergip naalakkersuisuni ilaasortassatut nutaatut innersuunneqarnera illoqarfimmi innuttaasunit tigulluarneqartoq, angajoqqaajusut oqaatigaat.

Ulloq killitsinnartoq

Maritha Brobergip meeraalluni angerlarsimaffia illu qaqortoq qattorngup qaavaniippoq, angajoqqaavilu suli tassani najugaqarput. Qeqertarsuarmi ilaqutariinnut Brobergikkunnut  apriilip 14-iat pingaartorsiorfiuvoq, taamaammallu erfalasoq amuneqarsimasoq takuneqarsinnaavoq.

Ullormi tassani naalakkersuisunut ilaasortat nutaat sisamat ivertinneqarput, taakkununngalu Maritha Broberg ilaavoq. Ullorlu taanna angajoqqaavinut immikkuullarissuuvoq. Marithap ataataa angerlarsimaffimminni, anaanaalu Pilersuisumi suliffimmini, TV-kkut malinnaapput.

- Paniga naalakkersuisutut ivertinneqarmat pilluarnerup pianik qullilivunga. Piffissami tassani Marithap aanaagigalui aataagigaluilu eqqarsaatinniipput. Qularutiginngilaralu qanoq nuannaarlutillu tulluusimaartigissagaluartut.

- Naalakkersuisoqarfik Marithap tigusaa pingaarutilerujussuuvoq. Kisianni annertuumik piumassuseqarami ilikkajasuullunilu, suliassani pitsaasumik naammassiumaaraa isumaqarpunga, Kalé Mølgaard oqarpoq.

- Maritha inoqatiminut ikiuukkumatuujuvoq. Inoqatini ajornartorsiortut sapinngisani tamaat ikiorusuttarpai, tamannali nittarsaanneq ajormagu amerlasuut ilisimanngilaat.

- Akisussaaffimmik taamak annertutigisumik tatigineqarluni tunineqarnera annertuumik pisussaaffiliivoq. Kisianni politikkimik suliaqarneq Marithamut nutaajunngilaq, suliarlu pitsaasumik naammassiumaaraa qularutiginngilara, Sofie Borberg oqarpoq.

Maritha Brobergip naalakkersuisunut ilaasortanngorneranut atatillugu pilluaqqusisorpassuit, periarfissaq una iluatsillugu angajoqqaavi qujassuteqarput aammalu Inatsisartut Naalakkersuisullu sulilluarnissaannik, taakku kissaappaat.

Kissalaartumik tikilluaqquneqartoq

Isumaginninnermut, suliffeqarnermut, ilaqutariinnut nunamullu namminermut naalakkersuisutut Maritha Broberg innersuunneqarami, tamanna ilaquttani qaniginerpaasani peqatigalugit nalilersoqqaarsimallugu oqaatigaa.

- Naalakkersuisoqarfimmi suliassat qangaaniilli uummateqarfigalugit soqutigisaraakka, tamannalu Atassutip siulersuisuunerisa ilisimavaat. Taamaattumik ilaquttakkalu oqaloqatigeereerluta periarfissaq tunniunneqartoq tigussallugu aalajangerpunga.

- Naalakkersuisuni ilaasortanngortussat nutaat Inatsisartunit taasissutigineqarnissaat pissangallunga utaqqivara.

- Naalakkersuisunut ilaasortanngorama soorunami misigissutsikkut attortisimavunga. Tamatuma kingorna siullermeerlunga Naalakkersuisoqarfimmi atorfilittat naapippakka. Kissalaartumik tikilluaqquneqarpunga, tamannalu toqqissisimanarpoq, Maritha Borberg oqarpoq.

Maritha Broberg inuunermini akisussaaffimmik aatsaat taamak annertutigisumik tunineqarluni, tamannali aamma merserinagu, oqaatigaa.

Nipilersornermiit politikkimut

Maritha Broberg nipilersoqatigisartakkanilu ukiumut arlaleriarlutik illoqarfinnut assigiinngitsunut tusarnaartitsiartortarput. Maannali silarsuaq allarluinnaq pulaffigaa.

- Nipilersorneq inuuninnut ilaalluinnarpoq. Erinarsorneq nipilersornerlu peqqinnartuupput, tamannalu inuuninnut nukissamik annertuumik tunisisarpoq, taamaattumik erinarsorneq unitsinnavianngilara. Kisianni inuuneq allaanerusumik siunertalik misilissallugu aamma piffissanngorsimavoq, nipilersortartoq tusaamaneqarluartoq oqarpoq.

Partiit allaffimminni erinarsoqatigiittarnerat naliginnaasuuvoq, taakkununngalu peqataasarnissani qilanaaralugu oqaatigaa.