Naalakkersuisoq Folketingimut qinigassanngortittoq

Demokraatit Folketingimut qinigassanngortitatik qineqqusaarutitillu tallimanngornermi ualikkut saqqummiuppaat.

Jens-Frederik Nielsenip Folketingimut qinigassanngortitani saqqummiuppai, taakkualu ilagaat maanna peqqissutsimut inuillu innarluutillit pillugit naalakkersuisoq Anna Wangenheim.

- Maannakkorpiaq peqqissutsimut inuit innarluuteqartullu pillugit naalakkersuisuuvunga. Ukiup kingulliup takutippaa pissaanilissuit uagutsinnik nakkutiginninnerat naalagaaffeqatigiinnermilu naligiimmik inissisimannginnerput. Taamaattumik Folketingimut qinigassanngortippunga, naalagaaffeqatigiinni naligiinnerusumik suleqatigiinneq sulissutigerusullugu, Anna Wangenheim ilaatigut oqarpoq.

Jens-Frederik Nielsenip erseqqissarpaa partiip naalagaaffeqatigiinnermi suleqatigiilluarneq sulissutigissagaa.

Anna Wangenheimip saniatigut Patrick Abrahamsen, Napaartoq Petrussen, Hans Jørgen Mørch, Inuujuk Louis Petersen aamma Bent Olesen Folketingimut qinigassanngortipput.

Nunap illersornissaa, inatsisitigut illersugaaneq atugarissaarnerlu

Jens-Frederik Nielsenip qularinngilluinnarlugu oqaatigaa qinigassanngortittut tamarmik politikkikkut sulilluarnissamut piareersimalluinnarlutik sassartut. 

Innuttaasut atugarissaarnerunissaat, naalagaaffeqatigiinnerullu iluani naligiimmik pisinnaatitaaffeqarlutillu sullinneqarnissaat pingaarnertut suliniutigineqassapput. 

Partiip qineqqusaarnermi qinersisartunut qulinik neriorsuuteqarumasut, Jens-Frederik Nielsen tusagassiortunik katersortitsinerup kingorna Sermitsiamut ilisimatitsivoq.

- Inatsisitigut illersugaanikkut naalagaaffeqatigiinnerup iluani naligiimmik pisinnaatitaaffeqalernissaq sulissutigissavarput. Ukiuni arlalinni kingullerni akisussaaffiit arlallit suli angerlaanneqanngitsut aamma suli pitsanngoriarsimanngillat. Ilaatigut iluarsiivigineqarsimapput, taamaattoq suli suliassaqaqaagut, Jens-Frederik Nielsen qineqqusaartunik saqqummiussinerup kingorna Sermitsiamut oqarpoq.

Patrick Abrahamsenip Folketingimi ilaasortanngussaguni suliniutit pingasut sammisassani piareersimaffigai:

- Folketingimi sammisassakka tassaapput politiit atugassarititaasa suliarinissaat, Tunumi ineriartorneq kiisalu Kalaallit Nunaanni SAR-imik upalungaarsimanermut atatillugu pissutsit pitsanngorsaaviginissaat, oqarpoq.

Aammali isumannaallisaanermut politikki Demokraatit qinigassanngortitaannut pingaaruteqarpoq. Hans Jørgen Mørch aamma Inuujuk Louis Petersen ilaatigut oqarput Kalaallit Nunaata Folketingimi ilaasortaatitaqarnissaat aatsaat taama pingaaruteqartigisoq nunarsuarmi pissaanilissuit eqqumaffiginninnerat pissutigalugu:

- Naalagaaffiit pissaanilissuit nakkutigivaatigut, isumannaallisaanerlu nakkutilliinerlu aatsaat taama pingaaruteqartigaat. Isumaqarpunga pingaaruteqartoq Folketingimi isumannaallisaanermut tunngasut suliarineqaraangata peqataatinneqartarnissarput, Inuujuk Louis Petersen tusagassiortunik katersortitsinermi oqarpoq.