Naalakkersuisoq: Inersimasoq 9. klassimi atuartumik aappaqartariaqanngilaq
Inersimasut inuusuttuaqqanik atoqateqarnissamik ukiukinnerpaaffissaq qaangerlugu ukiulimmik, sulili meeqqat atuarfianni atuartumik, aappaqarnissaat inerteqqutaassaaq, inatsisinik atuutsitsinermut naalakkersuisoq oqarpoq.
- Inersimasoq 9. klassimi atuartumik aappaqartariaqanngilaq. Inuussuttortavut inersimasuniit ulorianartorsiortinneqanngikkaluarlutik ukioqatiminnik atoqateqarneq pillugu misilittaasinnaasariaqarput, inatsisit atuutsinneqarnerannut naalakkersuisoq Naaja H. Nathanielsen tusagassiuutitigut taama nalunaaruteqarpoq.
Assi: Oscar Scott Carl
Inuusuttut atoqateqarnissamik ukiukinnerpaaffigititaq qaangerlugu ukiulinnik atornerluisarnerit akiorniarlugit Naalakkersuisut iliuuseqarnerorusupput.
Assersuutigalugu aappariit 17-iliinissaasa tungaannut ukiumikkut nikinganerat killilerneqarsinnaalluni.
Inatsisinik atuutsinneqarnerannut naalakkersuisoq Naaja H. Nathanielsen (IA) Naalagaaffiit Peqatigiit arnanut nakuusertarneq atorunnaarsinniarlugu nunat tamat akornanni ullorititaanni taama oqariartuuteqarpoq.
22-nik ukiulik 15-it inorlugit ukiulimmik atoqateqarpat pinngitsaaliinertut maanna nalilerneqartalernikuuvoq – pineqartoq akuersigaluarpalluunniit.
Taamaattorli qanorluunniit ukiulik 15-ileereersimasumik akuersisumik atoqateqarsinnaavoq.
Taamaattariaqanngitsorli Naaja H. Nathanielsen oqarpoq.
- Inersimasoq 9. klassimi atuartumik aappaqartariaqanngilaq. Inuussuttortavut inersimasuniit ulorianartorsiortinneqanngikkaluarlutik ukioqatiminnik atoqateqarneq pillugu misilittaasinnaasariaqarput.
Ukiut tallimat sinnerlugit ukiut nikinganerat ingasappallaartoq
Ukioqqortunerit 15-ileereersimasunik sulili meeqqat atuarfianni atuartuullutillu inersimasutut piginnaatitaanngitsunik aappaqartut pillugit suliat ukiuni kingullerni pisut tunngavigalugit taamatut siunnersuuteqartoqarpoq.
Inuusuttunik aappaqarsinnaanermik ukiut qanoq amerlatigisut nikingassusaasa annerpaaffigisinnaasaannik Naaja H. Nathanielsenip oqaaseqanngilaq.
Inuusuttut meeqqat atuarfianni suli atuartunik aappaqartoqartillugu ukiut tallimat sinnerlugit nikingasoqaraangat amerlanerpaat ingasagisaraat taassuma oqaatigaa. Inuusuttup perungassusaa apeqqutaatinnagu.
- Inuusuttut atoqateqartarnermik misileraaleruttorneranni killilerneqarnissaat anguniarneqanngilaq, kisianni inuusuttut mianerisariallit, inersimasunit silappaarinnerusumik iliuuseqartussaagaluanit atornerlunneqannginnissaasa qulakkeerneqarnissaat anguniarneqarpoq.
- Uanga isumaga isumaqatigineqarnersoq apeqqutaatinnagu, sammisaq oqallisigineqarumaartoq neriuppunga, tassami taassuma ilarujussua akisussaaffimmik misigisimanermik, ileqqorissaarnermik aamma isumassuinermik – aamma inatsisiliornerinnaanngitsumik, imaqarpoq, oqarpoq.
Naalakkersuisut digitalikkut isumapiloqarluni tatiginnilersitsiniaaneq, malersuineq aamma tarnikkut nakuuserneq pinerluttulerinermik inatsimmi pineqaatissiissutigisinnaanngorlugu ukiuni kingullerni sukateriffigaat.
