Naalakkersuisup KNR-ip pilerisaarutinik akiliititsilluni aningaasarsiortarnera illersoraa

Tusagassiorfik Kalaallit Nunaanni innuttaasunik kiffartuussisussaatitaasoq, aningaasanullu inatsit aqqutigalugu 73 millionit koruuninik innuttaasut aningaasaataannit taperneqartartoq, Kalaallit Nunaata Radioa, KNR, pilerisaarutit atorlugit aningaasarsiorunnaartariaqarpoq. Naleqqap siulittaasua, Pele Broberg taama isumaqarpoq.

Taassuma taama ilaatigut isumaqarnini tunngavigalugu Inatsisartunut siunnersuuteqarpoq. Suliaq qinikkat sisamanngornermi oqaluuseraat. Siunnersuuteqartup siunnersuutini oqaluttarfimmit ima oqaasertalerpaa:

- KNR-imi pilerisaarutit aallakaatitassiallu niuernerpalaartumik aningaasaliiffigineqartut atorunnaassapput. Innuttaasunik kiffartuussineq pisortanit aningaasaliissutitigut aningaasalersorneqassaaq, KNR-ilu pilerisaarutinit isertitassat pillugit tusagassiuutinut namminersortunut unammillissanngilaq, Pele Broberg oqarpoq.

Naalakkersuisup KNR illersoraa

Ilinniartitaanermut, Kultureqarnermut, Timersornermut Ilageeqarnermullu Naalakkersuisup, Nivi Olsenip (D), KNR-ip tv-kkut radiokkullu pilerisaarutinik aallakaatitsisarnermini 2,5 millionit koruunit missaat isertitarisarai, siunnersuummik akissuteqarnermini ilisimatitsissutigaa.

Taakkualu unitsinneqassappata KNR-ip timersortunik kulturimullu tunngasunik aallakaatitsisarneri ikilisinnaassasut taassuma aamma ilimasaarutigaa.

- Isertitanik taakkunannga atorunnaarsitsinerup ukiumoortumik 2,5 mio. kr.-nit missaannik isertitanik annaasaqarneq kingunerissavaa, taamaassappat KNR-ip aningaasaqarnikkut atugarisai ajornerulissanngippata nunatta karsianit matussuserneqartariaqassaaq.

- Sammisat taakkua siunissami nunap karsianit aningaasalersorneqassappata, taarsiullugu aningaasartuummut akileraartartut aningaasalersuineq timersornermik annikillisinneqarsinnaavoq, Nivi Olsen oqarpoq.

Tamannalu tunngavigalugu Naleqqap siulittaasuata siunnersuutaa Inatsisartut itigartissagaat innersuussutigaa.

Naalakkersuisoqataasut: Naalakkersuisut isumaqatigaagut

Sammisaq pillugu oqallinnermi naalakkersuisoqatigiit partiivi ataasiakkaarlutik oqaaseqartoqanngillat. Margrethe Thårup Andersen (D), Demokraatit, Inuit Ataqatigiit Atassullu sinnerlugit oqaaseqartuuvoq. Taassuma KNR-ip pilerisaarutit atorlugit isertittagai, naalakkersuisoqatigiinnit tapersersorneqartut oqariartuutigaa.

- Naalakkersuisut tikkuarpaat aningaasaliisunit isertitat naammattumik taarserneqanngippata timersornermik kulturimillu aallakaatitsinerit ikileriarsinnaasut. Tamanna naliliinitsinni ilannguttariaqarparput, naalakkersuisoqatigiit oqaaseqartuat oqarpoq.

Taamaattumik taakkua Naalakkersuisoq isumaqatigaat.

- Naalakkersuisooqatigiinni partiit siunnersuutip itigartinneqarnissaanik Naalakkersuisut inassuteqaataat taperserpaat, Margrethe Thårup Andersen oqarpoq.

Taamaalilluni siunnersuut ilusimitut illuni novembarip tallimaani aappassaaneerneqartussanngorpoq. Siumup KNR-ip taama iliornikkut aningaasannattarnera pitsaasutut, pitsaanngitsutulluunniit nalilernerlugu, saqqummiussinerminni erseqqissuliarinngilaat.