Naalakkersuisut ajornartoornermi ilitsersuut saqqummiuppaat: Innuttaasut ulluni tallimani imminut napatissinnaasariaqarput

Naalakkersuisut innuttaasunut ajornartoornermi piareersarnissamut siunnersuutinik saqqummersitsipput.

Ajornartoortoqassagaluarpat quppersakkami "Ajornartorsiornissamut Sillimaneq“-mi qulequtalimmi, innuttaasunut ulluni tallimani imminnut napatissinnaanissaanut siunnersuutinik arlalinnik peqarpoq.

Ajornartoornerit soorlu sivisuumik innaallagiaqannginneq, pinngortitami ajunaarnersuaq aammali nunani tamalaani akerleriinnerit nunallu assigiinngitsut akornanni politikikkut pissanganartorsiortitsinerit pilersuinikkut isumannaatsuunermut attaveqaasersuuteqarnermullu sunniuteqarsinnaasut quppersakkami sammineqarput.

USA-p Kalaallit Nunaata tinguarnissaa pillugu piffissami kingullermi sakkortuumik oqaaseqartaraluartoq aalisarnermut, piniarnermut, nunalerinermut, imminut pilersornermut avatangiisinullu naalakkersuisoq Peter Borg (D), aamma Kalaallit Nunaanni upalungaarsimanermut akisussaasoq, eqqissisaavoq:

-  Angerlarsimaffiit suliassaannik siunnersuutillu paasiuminartut pillugit quppersagaaqqamik saqqummersitsineq ajornartoortoqarnissaanik naatsorsuuteqarnitsinnik oqariartornerunngilaq. Siunnersuusiorpugut akisussaaffimmik tigusisoqarnissaanik aamma piffissaalluarallartillugu piareersimanissamik iliuuseqartoqarnissaanik quppersagaaraq siunertaqartutut paasineqassaaq. Piareersarneq eqqissinermik pilersitsisarpoq, aamma imminut napatissinnaanermik inunnillu allanik ulluni arlalinni ikiunissamut nukissaqalersitsisarluni, taamaalilluni ataatsimoorluni nukittunerulersitsinermik aamma pilersitsisarluni, Peter Borg oqarpoq.

Inuit amerlanerpaat imminut isumagisinnaanissaat qulakkeerneqassaaq

Siunnersuutit quppersakkamiittut kommunit, Issittumi Sakkutooqarfik politiillu suleqatigalugit suliarineqarput, Namminersorlutillu Oqartussat suliffeqarfiutaat isumassarsiaminnik aamma ilanngussisimapput.  Kalaallit Nunaata Upalungaarsimanissamut ataatsimiititaliarsua aamma oqaloqatigineqarnikuulluni.

Aalisarnermut, Piniarnermut, Nunalerinermut, Imminut Pilersornermut Avatangiisinullu Naalakkersuisoqarfik siunnersuutit innuttaasuni toqqissisimanermik nukittorsaaniarluni inuiaqatigiinnilu upalungaarsimanerup ataatsimut isigalugu suli nukittunerulernissaa qulakkeerniarlugu suliarineqarsimasut erseqqissaavoq. Quppersagaq upalungaarsimanermut pioreersumut ilassutitut isigineqassaaq inunnullu ataasiakkaanut upalugaarsimanermut aqqutissiuussilluni – aamma ataatsimoorfimmik nukittorsaataasutut.

- Innuttaasut imminnut qanigisaminnullu sapinngisamik piffissami sivikitsumi napatissinnaassappata, oqartussat pisariaqartitsinerpaanik samminninnissartik sammisinnaalissavaat - aamma pisup nalinginnaasunngortinnissaanut sukkasuumik suliaqarsinnaalissallutik, nalunaarutigineqarpoq.

Quppersakkami ilaatigut imermut, nerisassanut, nakorsaatinut, kiassarnermut, attaveqaqatigiinnermut immikkut pisariaqartitanillu isumaginninnermut tunngasunik siunnersuuteqarpoq.

Siunnersuutit ilaat imaapput:

• Inummut ataatsimut ullormut imeq 3 literi

• Nerisassat qerititsivimmiinnatillu nillataartitsivimmiittariaqanngitsut uunnannagit nerineqarsinnaasut

• Iganissamut uunnaaviusinnaasut allat, assersuutigalugu grilli imaluunniit ikumasartoq, soorlu Primusi imaluunniit Trangia, atorneqarsinnaapput.

• Ikiueqqaarnermut atortut nakorsaatillu qulakkeerneqassapput
• Eqqiluisaarnermut atortut ullunut tallimanut naammattut soorlu equutissiat, eqqaaviup puussai nalequttallu

• Qipiit tippillu naammattut, naneruutit, batteriinillu naammattunik peqarnissaq qulakkeerneqassaaq

Piffissap ingerlanerani katersuisoqarsinnaasoq

Naalakkersuisut innuttaasut piffissap sivisuup ingerlanerani ulluni tallimani pisariaqartinneqartut katersorsinnaagaat erseqqissaatigaat.

- Inuiaqatigiittut nukittunerpaaffitta ilisarnaatittalu ilaat ataaseq tassaavoq ikioqatigiillaqqissuserput, aammalu ajornartoornerit naatsorsuutiginngilluinnakkamik pisinnaasarnerat nalunnginnatsigu. Piareersarluarsimanissaq ileqqoraarput, silap qanoq innerata silallu pissusiata unerisimanngitsuusarnerat ulluinnarsiutigigatsigu. Ilaanneeriarluta pisunit immitsinnut sanngiinnerulersittarnerput misigisarparput, soorlu tamanna innaallagiaarunnermi misiginikuugipput. 

- Taamaattumik - ataasiakkaatut aammali inuiaqatigiittut - piareersarnissarput aamma pingaaruteqarpoq. Sunik tamanik sapigaarunnissaq imaluunniit suut tamarmik ataatsikkut pissarsiarineqarnissaat naatsorsuutigineqanngilaq, kisiannili piareersimannginnermit piareersimaneq pitsaaneruvoq, naalakkersuisoq Peter Borg naggasiivoq.

Siunnersuutit aqqutissiuussisuupput aamma angerlarsimaffiit ataasiakkaat qanorissussaannut, aningaasaqarnermut najukkamilu pissutsinut nalimmassarneqartussaallutik. Kikkut tamarmik assigiimmik tunngavissaqanngitsut aamma ilisimaarineqartoq oqaatigissallugu pingaaruteqarpoq, aamma iluaqutitalimmik ataatsimoorussilluni - ilaquttat, eqqaamiut imaluunniit najukkani inuiaqatigiit - ilagalugit piareersartoqarsinnaavoq.