Naalakkersuisut aqutsisoqarfimmik atorunnaarsitsinissaq taamaatikkaat
Isumaginninnermut Aqutsisoqarfiup immikkut immikkoortutut Meeqqanut, Inuusuttunut, Inatsisinik atuutsitsinermut Naligiissitaanermullu Naalakkersuisoqarfimmut kattutillugu suliassat katersornerisigut atorunnaarsinnissaanik pilersaarut taamaatiinnarneqarpoq.
Naalakkersuisunut ilaasortaq Mariane Paviasen Jensen (IA) naalakkersuisoqarfiup isumaginninnermullu aqutsisoqarfiup kattunneqarnissaannik pilersaarut aaqqissuussaanikkut suliatigullu arlalinnik aporfeqarsimasoq ilisimatitsissutigaa.
Arkivfoto: Leiff Josefsen
Ukioq manna siusinnerusukkut Naalakkersuisut Isumaginninnermut Aqutsisoqarfiup immikkut immikkoortutut atorunnaarsillugu Meeqqanut, Inuusuttunut, Inatsisinik atuutsitsinermut Naligiissitaanermullu Naalakkersuisoqarfimmut kattunnissaanik siunertaqartumik inatsisissatut siunnersuummik tusarniaapput.
Immikkoortumut naalakkersuisup Mariane Paviasen Jensenip (IA) pilersaarutit taamaatiinnarneqartut maanna ilisimatitsissutigaa.
Pilersaarut aaqqissuussaanikkut suliatigullu arlalinnik aporfeqartoq, maanna naalakkersuisoq tusagassiuutinut nalunaarummi allappoq.
Tamanna ilaatigut immikkoortunik akisussaaffeqarfinnik kiisalu isumaginninnikkut suliassanik, pikkorissarnernik ullorlu unnuarlu angerlarsimaffinnik ingerlatsinermut tunngasunik unammilligassanik qulaajaavigineqanngitsunik ilaqarpoq.
Naalakkersuisut akuliutissanngitsut
Tamatuma saniatigut kattussinerup kommunit sulianik ingerlatsisuinik, ulloq unnuarlu angerlarsaimffinni kiisalu ulluunerani paaqqinniffinnik nakkutilliinermik pisussaaffimmik ikorfartuinermut tunngatillugu iluaqutissartaqanngitsoq, naalakkersuisut maanna naliliipput.
Mariane Paviasen Jensenip ilanngullugu naalakkersuisunit toqqaannartumik akuleruffigineqanngitsumik suliat ingerlanneqartarnerat pingaartoq oqaatigaa:
– Naalakkersuisut sulianut ataasiakkaanut akuliussinnaanngimmata, malittarisassallu tamatuma malinnissaa pingaaruteqarluinnartuummat, tamanna naalakkersuisoqarfimmik Isumaginninnermullu Aqutsisoqarfimmik kattussinissap taamaatiinnarneqarneranut pingaarutilimmik patsisaavoq, Mariane Paviasen Jensen oqarpoq.
Immikkut ittumik suliniutit aqutsisoqarfimmik ilungersortitsisut
Kommunit ukiuni kingullerni Isumaginninnermut Aqutsisoqarfimmik suleqateqarnerminni ilungersunartorsiorsimanerat, Mariane Paviasen Jensenip ilanngullugu nassuerutigaa.
Naalakkersuisoq naapertorlugu Isumaginninnermut Aqutsisoqarfiup immikkut ittumik suliniuteqarnerata kommuninik allanik ikorfartuinerup killeqarsimanera kinguneraa.
Immikkut ittumik suliniutit tassaapput kalaallit-danskit akimuisumik meeqqanik inuussuttunillu suliniutinik nukittorsaanissamik isumaqatigiissutaanni suliniutit, kiisalu Kommune Kujallermi isumaginninnermut immikkoortumik atorunnaarsitsineq.
– Tamanna tunuliaqutaralugu Isumaginninnermut Aqutsisoqarfiup siunissami siunertarineqaqqaartut malillugit pingaarnertut isumagisassaminik tamakkiisumik aallussinissaa Naalakkersuisut aalajangerpaat, tassanilu kommunit pisariaqartitaat sukkulluunniit pingaarnerutiginneqassapput, Mariane Paviasen Jensen oqarpoq.
