Naalakkersuisut ilisimatusarneq, kulturi takornariartitsinermullu immikkoortoq pillugu Frankrigimik suleqatigiinnissamik isumaqatigiissuteqartut

Tallimanngornermi septembarip sisamaanni nunanut allanut, inuussutissarsiornermut aatsitassanullu naalakkersuisup Múte B. Egedep franskillu nunanut allanut niuernermut aningaasaqarnermullu ingerlatsinermut ministeriata Nicolas Forissierip kiisalu suliffeqarfinnut mikisunut akunnattumillu angissusilinnut, niuernermut, assassornermut, takornariartitsinermut pisisinnaassutsimullu ministerip Serge Papinip suleqatigiinnissamut isumaqatigiissutit marluk atsiorpaat.

Taama Naalakkersuisut tusagassiuutinut nalunaarummi allapput.

Isumaqatigiissutit nunat taakku marluk akornanni suleqatigiinnissamik isumaqatigiinnernik aallartitsinissamik kiisalu ilisimatusarnerup, kulturip kiisalu takornariartitsinermut immikkoortup iluani suleqatigiinnissamik imaqarput. Siusinnerusukkut aatsitassanut immikkoortumi suleqatigiinnissamik isumaqatigiissutaasoq ilanngullugu, Naalakkersuisut taamaalillutik suleqatigiinnerup nukittorsarnissaanik nunallu marluk atassuteqatigiinnerannik nukittorsaaniarlutik franskit naalakkersuisuinik siunnerfilimik sulissuteqarsimapput.

- Frankrig piffissami nunarsuarmi pissutsit allanngorfianni Kalaallillu nunaata qanimut iligisanik nukittunerusumik suleqatigiinnermut ikaarsaarnerani, Kalaallit Nunaannut suleqataallunilu iliuvoq nukittooq, Múte B. Egede oqarpoq.

Tikeraarnerminissaaq franskit Europamut Nunanullu allanut ministeriat Jean-Noël Barrot ataatsimeeqatigaa.

- Franskit naalakkersuisuisa ingammik præsident Macronip kiisalu Europamut nunanullu allanut ministeri Barrotip Kalaallit Nunaannut piffissami immikkuullarissumi ajornakusoortumilu – piffissamilu suli inissisimaffigisatsinni tapersersuinerat Naalakkersuisut qujassutigaat.

- Suleqatigiinnissamik oqaloqatigiinnermik pilersitsinikkut arlalitsigullu suleqatigiinnertigut nunat taakku marluk ataqqeqatigiittumik oqaloqatigiinnerup paaseqatigiinnerullu nunat tamat akornanni suleqatigiinnermi pitsaasumillu atassuteqatigiinnermi suli aqqutissaanera takutippaat. Franskit naalakkersuisuinik siunnerfilimmik suleqatigiinnissaq qilanaaraara, Múte B. Egede oqarpoq.

Isumaqatigiissutit Parisimi septembarip sisamaanni tikeraarnermi atsiorneqarput.