Naalakkersuisut Illorsuit najornissaat navianartutut isigaat

Illorsuit siunissaat qanoq issava? Apeqqut taanna nuna tamakkerlugu qinikkat sisamanngornermi oqallisigaat. Atassutip siulittaasua, Aqqalu C. Jerimiassen apeqquteqaat aallaavigalugu oqallisissiamik siunnersuuteqartuuvoq.

Illorsuarni innuttaasut, Karrat Kangerluanni 2017-imi tassaarsuartoqareernerani nunaqarfimminnit qimagutsinneqarput. Nunaqarfik pisortat suliffeqarfiutaannit taamanimiilli najorneqaqqinngilaq. Taamaattumik nunaqarfimmi sullissisoqanngilaq pilersuisoqaranilu.

Tamannali maanna allanngortariaqartoq Atassut isumaqarpoq. Siunnersuuteqartummi oqaluttarfimmit oqaasii naapertorlugit Illorsuit tassaarsuarmit eqqungaanera annertunngilaq. 

- Illorsuarni iluliusaq sissamut qaqivoq, assigiinngitsuarsuillu anginngitsut saavillutik, Aqqalu C. Jerimiassen oqarpoq.

Taassuma Niaqornat, maanna inuminit najorneqartoq, assersuutitut taavaa. Niaqornat Illorsuartulli tassaarsuaqaqqissagaluarpat suli aarlerinartumi inissisimavoq, taamaakkaluartoq nunaqarfiup qaqqaanut qimaaffissanik tummeqqiortoqarnikuuvoq. 

- Niaqornat ammasinnaappat Illorsuit ammaqqinneqarsinnaassooq, siunnersuuteqartoq oqarpoq.

Sermitsiap siunnersuuteqartoq sooq Naalakkersuisut peqquneqarnissaannik Inatsisartunut aalajangiiffigisassamik siunnersuuteqarani oqallinnissaannarmik siunnersuuteqarsimanersoq pillugu aperaa

- Kukkuneqarpat arlaatigut itigartitaasinnaanera perusunnginnakku, oqallisissiarinerani naalakkersuisoqatigiit partiivi sumi inissisimanersut paaserusuppara, tamannalu pereerpat naalakkersuisoqataaneq aqqutigalugu angusassaq angorusullugu, Aqqalu C. Jerimiassen Sermitsiamut allappoq.   

Siumut: Misissueqqissaarnerit unikaallatsinngilluaasarlik

Namminersorlutik Oqartussat suleqatitik peqatigalugit tassaarsuaqareernerata kingorna misissuinerpassuit, ilaatigut qaammatikkaartut ingerlappaat. Sulinertillu suli sukannernerusumik ingerlattariaqaraat illuatungiliuttut, Siumukkut, isumaqarput.

- Paasinarluinnartumik angerlarsertoqarpoq, minnerunngitsumillu paasinnilluarluta Naalakkersuisut sukannersumik kaammattorpavut misissueqqissaarnerit unikaallatsinngilluaasarlugit aammalu upalungaarsimanikkut kalerrisaaringasuarnissatigullu aaqqiissutissat sulissutigineqartut pingaartillugit sulissutigissagaat, Siumut siunnersuummut oqaaseqaammini allappoq.

Siunnersuuteqartup suleqatai: Utissanngillat

Siunnersuuteqartup naalakkersuisoqatai, Demokraatit, naalakkersuisoqatiminnit, Atassutikkunnit, apeqqut pillugu killormut isumaqarput. Upalungaarsimaneq pillugu nalunaarusiat taakkua tunngavilersuutigaat.

- Sumiiffimmi qaqqap sisoorsinnaanera aamma malissuaqarsinnaanera suli annertuumik nalorninartillugu, siumullu oqaatigineqarsinnaatinnagu innuttaasut, suliffeqarfiit imaluunniit oqartussat kikkulluunniit sumiiffimmut utissanngillat.

- Suliatigut naliliinerit navianartoqartoq tikkuaagaangata, taakkua pimoorullugit tiguneqartassapput. Taamani eqqugaasut, siunissamilu eqqugaasinnaasut pillugit taamaliortariaqarpugut, Demokraatit siunnersuummut oqaaseqaamminni allapput.

Naalakkersuisut naviasuttut

Illorsuit inunnit ulluinnarni najorneqarnissaminut suli ulorianartuusoq Upalugaarsimanermut Naalakkersuisoq akissuteqaammini allappoq. 

- Kalaallit Nunaanni Upalungaarsimanermut Ataatsimiisitaliap Umiammakku Nunaata eqqaanni qaqqat sisoorsinnaanerannut, sumiiffinnilu taakkunani qaqqap sisoorneranut atasumik tassaarsuaqarsinnaanerinut, upalungaarsimanikkut suliamik naliliinerat Naalakkersuisunit ilisimavarput. Tassani allassimavoq Illorsuit sumiiffittut uninngavigissallugu navianartorsiorfiusutut suli isigineqartariaqartoq, Iddimanngiiu Jensen Bianco (IA), allappoq.

Karrat Kangerluani qaqqap 2017-imi sisoorneranit tassaarsuaqarmat Nuugaatsiaq Illorsuarnit annertunerujussuarmik eqqorneqarpoq. Tassani inuit sisamat ajunaarput, timaallu nanineqaratik.