Naalakkersuisut naqissusiipput: Kalaallit Nunaat Danmarkip kunngeqarfiata ilagaa – illersorneqarnissarlu NATO aqqutigalugu pissasoq kissaatigaat
Kalaallit Nunaata aammaartumik USA-miit tiguarneqarnissaanik oqariartortoqarnera Naalakkersuisoqatigiinniit akuerisinnaanngivillugu oqariartuutigissavarput, Naalakkersuisut siulittaasuat Jens-Frederik Nielsen naqissusiivoq.
Kalaallit Nunaat Kunngeqarfik Danmarkimut ilaavoq. Kalaallit Nunaat Naalagaaffeqatigiinneq aqqutigalugu NATO-mut ilaasortaavoq taamaattumillu Kalaallit Nunaata illersorneqarnissaa NATO aqqutigalugu pissalluni, Naalakkersuisut siulittaasuat, Jens-Frederik Nielsen erseqqissaavoq.
Assiliisoq: Oscar Scott Carl
Maanna Naalakkersuisunit nalunaarut ersarilluinnartoq takkuppoq. Naalakkersuisut siulittaasuat naqissusiivoq Kalaallit Nunaat Danmarkip kunngeqarfiata ilagigaa:
- Kalaallit Nunaat Kunngeqarfik Danmarkimut ilaavoq. Kalaallit Nunaat Naalagaaffeqatigiinneq aqqutigalugu NATO-mut ilaasortaavoq taamaattumillu Kalaallit Nunaata illersorneqarnissaa NATO aqqutigalugu pissalluni, Naalakkersuisut siulittaasuat tusagassiuutitigut nalunaarummi naatsumi, taannalu nangippoq:
- Naalakkersuisoqatigiinniit NATO-mi nunat arfinillit oqariartuutaat aallavigalugu, NATO aqqutigalugu Kalaallit Nunaata illersornissaa nunat killiit peqatigalugit ingerlanneqarnissaa ilassilluarlugu annertusisamik angunialerparput.
- NATO-mi nunat tamarmik USA ilanngullugu illersornissarput soqutigisaraat taamaattumillu Naalakkersuisuniit illersornissamut NATO aqqutigalugu oqaloqatigiinnerit aammalu inerisaanerit Danmark peqatigalugu ingerlannissaat anguniagaraarput.
Naggasiullugulu Naalakkersuisut siulittaasuat erseqqissaavoq Kalaallit Nunaat, nunat killiit illersoqatigiinnerannut qaqugumut ilaajuaannarniisaa Naalakkersuisoqatigiit isumaqarfigigaat.
Kalaallit Nunaat Danmarkilu allorissaaqatigiilersut
Taamaalilluni ersarissivoq Kalaallit Nunaat aamma Danmark pingasunngorpat amerikamiut nunanut allanut ministeriat, Marco Rubio naapitsinnagu allorissaaqatigiittut.
Tamanna sioqqullugu nunanut allanut tunngasunut Naalakkersuisoq, Vivian Motzfeldt (S) DR-imut apersorneqarnermini oqarnikuuvoq nammineq takusinnaanagu suna ajoqutaassanersoq Kalaallit Nunaata Danmark peqatiginagu USA kisimiilluni ataatsimeeqatigissappagu.
Maannali tassa Naalakkersuisut siulittaasuat naqissusiivoq oqaloqatigiinnerit Nunatta Danmark peqatigalugu ingerlatissagaat aammalu Kalallit Nunaata illersorneqarnissaa NATO aqqutigalugu peqatigiilluni inerisarneqassasoq.
Vivian Motzfeldt nammineq inuttut Facebookimini naatsumik nalunaaruteqarpoq:
- Siullertut qujanarsuaq ataatsimiinnissami aggersumi ajunngitsumik kissaassillusi nukissanik tunioraasusi tamassinnut qamanngavik qujanaq, nukissamik assorsuaq tunisivusi Neriorsussavassi sapinngisarput tamaat atorlugu Nuna asasarput inuilu pillugit tamaviaarluta suliumaaratta sulissallutalu.
- Ullut aqqusaakkavut imaannaanngillat, naalakkersuisoqarfitsinni nukittuvugut neriorsussavassilu tamassi uummammioralusi pitsaanerpaamik inissinnissarput angutserlugu sulissagatta.
Naalakkersuisut siulittaasuat Facebookimi politikeritut quppernermini itisiliivoq:
