Naalakkersuisut: NATO Kalaallit Nunaat avaqqullugu iliuuseqanngilaq
Naalakkersuisut NATO-p generalsekretæria ataatsimeeqatigereerlugu Kalaallit Nunaat pillugu kalaallit peqataatinnagit isumaqatigiissuteqartoqarsimannginnerarpaat.
Vivian Motzfeldt Washingtonimi ataatsimiinnermi peqataavoq, tassanilu Kalaallit Nunaat pillugu suleqatigiinnerup ajornannginnerulersinnissaa anguniarlugu Kalaallit Nunaata, Danmarkip USA-llu suleqatigiissitaliussasut aalajangerneqarpoq.
Assi: Oscar Scott Carl
Nunanut allanut tunngasunut naalakkersuisoq Vivian Motzfeldt (S) eqqissisaalluni NATO Kalaallit Nunaat pillugu kalaallit peqataatinnagit isumaqatiginninniarsimanngitsoq paasissutissiivoq.
NATO-p generalsekretæria Mark Rutte Bruxellesimi ataatsimeeqatigereeralugulu, Davosimilu nunarsuarmi aningaasaqarnermut tunngasunik oqallittoqareersoq tusagassiuutinut nalunaarutigineqarpoq.
Donald Trumpip, Nato-p generalsekretæria Mark Rutte ataatsimeeqatigereerlugu, Kalaallit Nunaat pillugu sinaakkutissatut isumaqatigiissut kikkunnit tamanit akuerineqarsinnaasoq isumaqatigiissutigineqartoq pingasunngormat unnukkut nalunaarutigaa. Præsidenip Kalaallit Nunaat aqulerusullugu oqariartuutigisaqattaareeraalu taama pisoqarpoq.
Mark Rutte Donald Trumpimik ataatsimeeqateqareersoq nunanut allanut tunngasunut naalakkersuisup oqarasuaatikkut oqaloqatigaa.
- Erseqqissassavara NATO Kalaallit Nunaat sinnerlugu isumaqatiginninniarnikuunngimmat. Naalakkersuisut peqataatinnagit Kalaallit Nunaat pillugu pisortatigoortumik isumaqatigiissusiortoqarnikuunngilaq. Danskit naalakkersuisui ataatsimiinnermi aamma sinniisuutitaqarnikuunngillat, Vivian Motzfeldt paasissutissiivoq.
Naalakkersuisut NATO-p generalsekretæriata Kalaallit Nunaat sinnerlugu isumaqatiginninniarnissaanik qinnuigisimanngikkaat aamma erseqqissaatigineqarpoq. Mark Ruttep Kalaallit Nunaata inissisimaffia killiliineralu præsident Trumpimut toqqarlugu ingerlateqqissimavaa, nalunaarummi allassimavoq.
Suleqatigiissitaq pilersinneqartoq
Kalaallit Nunaata Danmarkillu NATO-p generalsekretæria Mark Rutte Bruxellesimi ataasinngornermi januaarip 19-ianni ataatsimeeqatigaat. Tassani danskit illersornissamut ministeriat Troels Lund Poulsen peqataavoq, nalunaarutillu naapertorlugu illuatungeriit Kalaallit Nunaata Danmarkillu killeqarfii sumiinnersut erseqqissaatigineqarput. Kunngeqarfiup kisimi oqartussaanera, nunap immikkoortuisa ataqatigiinnerat aamma kalaallit namminneq aalajangiisinnaatitaanerat pineqarlutik.
Kalaallit Nunaata Danmarkillu NATO-p Issittumi annertunerusumik peqataasariaqarnera pisariaqartutut isigigaat Naalakkersuisut ilisimatitsipput, aamma nunat killiit iligiinnut akeraasut Kalaallit Nunaannut sunniuteqannginnissaat qulakkeerniarlugu suleqatigiinnerup qulakkeerneqarnissaa kissaatigineqarluni.
- Uanga isiginnittariaatsinnit Davos-imit nutaarsiassat pitsaasuupput. Taamatut oqareerlunga suli sillimasariaqarpugut, aamma isumannaatsumut pinissatta tungaanut suli suliassaqarnerput qularnanngilaq, Vivian Motzfeldt oqarpoq.
Suleqatigiissitaq pilersinneqartoq ataatsimiilluni aallartereernikuusoq aamma uppernarsarpaa.
