Naalakkersuisut pingasut Tasiilamukassasut
Tasiilami innuttaasut unammilligassaminnik takutitserusullutik aaqqiissutissarsiumallutillu Naalakkersuisunit ukiorpaalunngortuni tikeraaqqusarput. Naalakkersuisut maanna tikittussanngorput.
Jens-Frederik Nielsen naalakkersuisut allat marluk ilagalugit Tasiilamut aqagu tikissaaq.
Assi: Oscar Scott Carl
Tasiilami innuttaasut politikkikkut sammineqarnerulernissaanik ukiorpanngortuni kissaateqartareersullu Naalakkersuisunut ilaasortat
pingasut Tasiilaliartussanngorput.
Naalakkersuisut pingasut, tassa Naalakkersuisut siulittaasuat
Jens-Frederik Nielsen, ineqarnermut, attaveqaqatigiinnermut, isorliunerusunut upalungaarsimanermullu naalakkersuisoq Iddimanngiiu
Jensen Bianco aamma aalisarnermut, piniarnermut nunalerinermullu naalakkersuisoq Peter Borg arfininngornermiit pingasunngornermut
Tasiilamiissasut, Namminersorlutik Oqartussat ilisimatitsipput.
- Tasiilamiinnerup siunertaraa innuttaasunik, suliffeqarfinnik
pisortat ingerlataannik aammalu sumiiffimmi suleqataasunik
naapitsinissaq aammalu inuiaqatigiit atugaat pillugit
oqaloqatiginninnissaq, siulittaasup naalakkersuisoqarfia naatsumik
nalunaarummi allappoq.
Tikeraarnermi innuttaasut najukkamilu suliaqartut unammilligassat
piffissami sivisuumi sumiiffimmi malunnaateqarsimasut pillugit
oqaloqatigineqarnissaat naatsorsuutigineqarpoq. Naalakkersuisut
tikeraarnerat ilutigalugu suleqatigiinnerup nukittorsarnissaanut
aalajangiinerillu najukkami pisariaqartitat aallaavigalugit
annertunerusumik tunngaveqartinnissaat qulakkeerneqassaaq.
Angalanermut atatillugu naalakkersuisut Tasiilami innuttaasunut katersortarfimmi kaffillernissamut sapaatiuppat nalunaaqutaq
14.00-mit 16.00-ip tungaanut qaaqqusipput.
