- Pisassiingaatsiartoqarniarpoq.
Taama aalisarnermik inuussutissarsiuteqartut
ilaat kinaassutsiminik isertuussisoq Naalakkersuisut Aalisarnermut,
Piniarnermut Nunalerinermullu Naalakkersuisoqarfiata siunnersuutitut
tusarniaassutiginiagaat tupaallannartoq ingasattorlu oqaaseqarfigalugu
Sermitsiamut oqarpoq.
- Pisassiingaatsiartoqarniarpoq.
Taama aalisarnermik inuussutissarsiuteqartut
ilaat kinaassutsiminik isertuussisoq Naalakkersuisut Aalisarnermut,
Piniarnermut Nunalerinermullu Naalakkersuisoqarfiata siunnersuutitut
tusarniaassutiginiagaat tupaallannartoq ingasattorlu oqaaseqarfigalugu
Sermitsiamut oqarpoq.
Tassami Naalakkersuisut 2026-mi Kitaani
Tunumilu sinerissap avataani saarullittassiissutit, pisarineqarsinnaasut
annertunerpaaffissaat, TAC, annertuumik qaffanniarsarivaat.
- Aappaagumut
pisassiissutit aatsaat taama annertutigisut Naalakkersuisunit
siunnersuutigineqarput. Siunnersuut aalisarnermik inuussutissarsiuteqartuni
tupaallaatigineqarpoq, tusarliisoq oqarpoq.
Tusarliisoq naapertorlugu siunnersuummi
“Tusarniaaneq – 2026-imi saarullittassat TAC”-mi “ingattarsertoqarpoq”.
Tusarniaassut Naalakkersuisut tusarniaanermut nittartagaanni sisamanngornermi
oktobarip 30-ani saqqummiunneqarpoq. Taanna Naalakkeruisut.gl-imi
"Tusarniaanerit" iserfigalugu atuarneqarsinnaavoq.
Tunu
Naalakkersuisut aamma Aalisarnermut,
Piniarnermut Nunalerinermullu Naalakkersuisoqarfiup 2026-mi Tunumi sinerissap
avataani TAC 40.000 tonsinut aalajangersarneqassasoq siunnersuutigaat.
Ukioq manna pisassiissutinut sanilliullugit
5.000 tonsinik qaffanneqarput. Pisassiissutit Dohrn Bankemi Tunullu Kujataani
agguataarneqassapput. Siunnersuut naapertorlugu Dohrn Bankemi
saarullittaqarluarmat saarullittassiisoqassaaq.
Dohrn Bankemi saarullittassiissutit Kalaallit
Nunaata Islandillu akornanni agguataarneqartut, aamma pisuussutit Kalaallit
Nunaata pisassiissutaanit amerlanerusut Naalakkersuisut naalakkersuisoqarfillu
tusarniaanermut allakkaminni allapput.
Tunumi 2026-mi saarullittassiissutit
uumassusililerisut siunnersuutigisaannit 16.500 tonsinik annertunerupput.
Ilisimatuussutsikkut siunnersuineq naapertorlugu Tunumi sinerissap avataani
saarulliit suffisinnaasut 2026-mi TAC-iusut 23.518 tonsiussasut imaluunniit
ukioq manna pisassiissutigineqartutut amerlatigissasut innersuussutigaat.
Aappaagumut pisassiissutit 2022-mut sanilliullugit 20 procentimik ikilineqassasut
siunnersuutigineqarpoq.
Kitaa
Kitaani sinerissap qanittuani 2026-mi
pisassiissutit tamarmiusut 16.000 tonsiussasut Naalakkersuisut aamma
Aalisarnermut, Piniarnermut Nunalerinermullu Naalakkersuisoqarfik
siunnersuipput.
Uumassusililerisut siunnersuinerat
naapertorlugu Kitaani avataasiorluni aalisakkat suffisinnaasut
aalisarneqarpallaarput, taamaammallu nungusaataanngitsumik aalisarneq
sipporlugu aalisartoqartarpoq.
Ilisimatuussutsikkut siunnersuineq
naapertorlugu 2026-mi Kitaani pisassiissutigineqartut tamarmiusut 4.700
tonsiusut sipporneqannginnissaat, imaluunniit ukioq manna
pisassiissutigineqartunit 1.470 tonsinik amerlanerunissaat, inassutigineqarpoq.
Naalakkersuisut ukioq manna Kitaani
saarullittassiissutit annertunerpaaffissaasa, TAC-p, 6.500 tonsiunissaat
aallaqqaammut aalajangeraluaraat pisassiissutit oktobarip 17-iani 10.000
tonsinik qaffanneqarput. Tamanna Aalisarnermut Siunnersuisooqatigiit innersuussinerisigut
pivoq. Taamaalilluni TAC 16.500 tonsiuvoq. Naalakkersuisut aappaagumut TAC-imut
siunnersuutaat ukioq manna pisassiissutigineqartunit 500 tonsinik
appasinneruvoq.
Pisassiissutit qaffanneqarnissaat
mianersoqqussutigineqartoq
- Maannakkut
pisartut aalisartorpassuit pisassiissutit qaffanneqarujussuarnissaat pillugu
takorluugaasa piviusunngornerattut ipput. Kitaanili pisassiissutit taamak
qaffatsiginnginneranni Naalakkersuisut eqqarsarluaqqaartariaqarput.
- Takorlooriaruk
umiarsuaatileqatigiiffiit nutaat nutaanik kilisaataatillit aalisalerpata, saarullinniarnerlu ukiullu
pingasut qaangiuppata ajalusoorpat.
Taava 1990-ikkunni raajat nungungajalerneranni aalisarnerlu aningaasatigut
ajornartorsiulernerani atugarisimasagut atoqqilersinnaavagut. Tamanna
akisussaaffimmik sumiginnaaneruvoq, paasissutissiisup oqaatigaa.
Taamanikkut umiarsuaatileqatigiiffippassuit
akiliisinnaajunnaarput. Tamannalu peqatigalugu Namminersornerullutik Oqartussat
aningaasaqarnikkut ajornartorsiungaalerput. Aalisariuteqarpallaarnera
pissutaavoq, tamannalu raajanik pisassiissutit annertunerpaaffissaasa, TAC-p,
annikinneruneranik kinguneqarpoq.
Naalakkersuisoqarfik oqaaseqarumanngitsoq
Umiarsuaatileqatigiiffiit Polar Seafood
Greenland A/S, Royal Greenland A/S, Qaleralik A/S, Arctic Prime Fisheries A/S aamma
Arsuk A/S kilisaatit arfinillit aalisariutigalugit kitaani
saarullittassassiissutit ullumikkut aalisarpaat.
Tusarniaassutinut nittartagaq naapertorlugu
akissuteqarnissaq kingusinnerpaamik novembarip 20-anut ullulerneqarsimavoq.
Sermitsiap
Aalisarnermut, Piniarnermut Nunalerinermullu Naalakkersuisoqarfik
allaaserisamut atatillugu mailerluni oqaaseqaqquaa.
Naalakkersuisut
2026-mi saarullittassanik pisassiissutit pillugit decembarip aallartinnerani
isummernissaat naatsorsuutigineqartoq Katrine Kærgaard, aalisarnermut
immikkoortortaqarfimmi pisortaq, allakkatigut akissuteqarluni allappoq.
- Naalakkersuisoqarfik tamatuma
saniatigut tusarniaanermut innersuussivoq. Allanik oqaasissaqanngilagut,
immikkoortortaqarfimmi pisortaq allappoq.
