Naalakkersuisut siulersuisuni allani ilaasortanik taarsiisut 

Namminersorlutik Oqartussat suliffeqarfiutaasa ilaat immikkut ittumik ataatsimeersuarpoq, siulersuisunilu aamma taarsiisoqarpoq.

Tamatumuuna Namminersorlutik Oqartussat inuussutissarsiornermik siuarsaanermut ingerlatseqatigiiffiat Nalik Ventures siulersuisuni ilaasortanik marlunnik taarsiisoqarsimasoq nalunaarpoq.

Malene Broberg Signe Marie Sveinbjørnssonolu ilaasortanngorput.

ATUARUK AAMMA

Namminersorlutik Oqartussat suliffeqarfiutaat pisortartaartoq

- Ilaasortat nutaat Kalaallit Nunaanni inuussutissarsiornikkut, aningaasaliinermut nunallu tamalaanik suleqateqarluni ineriartortitsinermik naleqaqisumik misilittagaqarlutillu ilisimasaqarput.

- Siulersuisut ataqatigiissaarneqarnerat taamaasillutik nunap immikkoortuani atuutsitsissapput nunarsuarmullu avammut paasisimasaqartuussallutik, Nalik Ventures tusagassiutitigut nalunaarumminni allapput.

Malene Broberg ulluinnarni Brugsenimi aningaasaqarnermut pisortaavoq. Signe Marie Sveinbjørnssonilu aningaasaliinermik ingerlatsivimmi Heartcore Capitalimi piginneqataasuuvoq.

Nalik Ventures Jette Larsen Lykke Geisler Yakaboylulu siulersuisuni ilaasortaajunnaartut qujaffigingaarlugit nalunaarpoq:

- Suliniuteqaqataanerat suliffeqarfiup tunngavianut nukittorsaasimaqaat aammalu suliffeqarfiup pingaarutilimmik ineriartorsimanerani aqqutissiuusseqataasimallutik.

Nalik Ventures novembarip 28-ani immikkut ittumik ataatsimeersuarpoq. Ulloq taanna Namminersorlutik Oqartussat ingerlatseqatigiiffiutaat Great Greenland aamma immikkut ittumik ataatsimeersuarpoq, tassanilu siulersuisut aamma taarserneqarput.