Naalakkersuisut spiralinut taarsiissutissanut 35 millionit koruunit immikkoortippaat

1992-ip kingorna arnat akuersisimatinnatik naartunaveersaatilersorneqarsimasut naatsorsuutigineqartumit amerlanerungaatsiatut taarsiisoqarnissamik qinnuteqarsimapput.

Maanna taarsiissutissat 35 million koruunit aningaasalersorneqarnissaat qulakkeerneqarpoq.

Meeqqanut, Inuusuttunut, Inatsisinik Atuutsitsinermut Naligiissitaanermullu Naalakkersuisoqarfik tusagassiuutinut nalunaarummi taama allappoq.

Aningaasanut inatsimmi 4,5 million koruunit siornatigut immikkoortinneqarput, tassa arnamut ataatsimut 300.000 koruunit, sulianut ilisimaneqartunut 15-inut immikkoortinneqarsimallutik.

Pereersut aningaasanik matuinnarneqarsinnaanngillat

AAMMA ATUARUK

Spiralilersuisimanermut suliaq pillugu nalunaarusiat suli kinguaattoorput

Meeqqanut, inuusuttunut, inatsisinut atuutsitsinermut naligiissitaanermullu naalakkersuisup Mariane Paviasen Jensenip (IA) taarsiissutissat pillugit immikkut ittumik aaqqissuussinermut Naalakkersuisut 35 million koruuninik immikkoortitsinerat naammagisimaarluarpaa.

- Ilutigisaanik suliap matumap qanoq annertutigineranik, suliallu pisariaqartumik pimoorussisumik aamma peqqissaarussamik suliarineqartariaqarneratut suliamik suli suliarinninnissatta qanoq pingaaruteqartigineranik ersersitsivoq.

- Arnat taamanikkut ilaatigut niviarsiaqqat annertuumik ikilerneqarput, Naalakkersuisuniillu minnerpaamik iliuuserisinnaasaq aningaasatigut ajunngitsorsiineq maanna matussusersinnaanngulerpoq naak pisoq misigisaq aningaasanik taarserneqarsinnaanngitsoq taamaattorli neriuppugut arlaatigut iluaqusiisinnaasut, Mariane Paviasen Jensen oqarpoq.

Qinnuteqaatit inatsisilerinermik peqqinnissaqarfimmillu immikkut ilisimasalinnik naliliisartunit nalilersorneqartarput. Nalilersuinermi pisariaqarsorineqarpat, kingunerlutsitsinernik ilisimasalik akuutinneqartarpoq. Qinnuteqaatinik nalilersuineq kiisalu immikkut aaqqiissummik isumaginninneq Frederiksen Law-imit isumagineqarpoq, taassumallu suliani aamma inaarutaamik aalajangiisussaq Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfik qaninnertut attavissaralugu.

Aningaasat 35 million koruunit immikkoortinneqartut, politikkikkut isumaqatigiissuteqarluni peqqinnissaqarfimmut 220 million koruuninik illikartitsinermiit aaneqassapput.