Naalakkersuisut timmisartup angalanissaa taamaatiinnarneqarmat Tasiilalianngitsoortut

Iddimanngiiu Bianco, Jens-Frederik Nielsen Peter Borgilu massakkorpiaq Tasiilamiittussaagaluarput. Timmisartoq arfininngormat ilaaffissaraluat Nuummiit aallanngitsoormat tikeraarnissaraluat piffissaligaanngitsumik kinguartinneqartoq, Naalakkersuisut Siulittaasuata Naalakkersuisoqarfiata nalunaarutigaa.

Tasiilami innuttaasut Naalakkersuisut tikeraarnissaannut utaqqeqqittariaqarput, timmisartussaraluammi arfininngormat taamaatiinnarpoq.

Assiliisoq: Oscar Scott Carl

Arnaq Nielsen Arnaq Nielsen tusagassiortoq

Saqqummersinneqarpoq 27. Apriili 2026 - 14:00

Annonse

Naalakkersuisunut ilaasortat pingasut Tasiilamut pilersaarutaasumik tikeraarnissaraluat taamaatiinnarneqarpoq. Tikeraarnissaq arfininngormamiit pingasunngornerup tungaanut pisussaagaluartoq, timmisartoq Nuummiit arfininngormat ilaaffissaraluat aallanngitsoormat piviusunngunngitsoorpoq.

Taamaalilluni Tasiilami innuttaasut naalakersuisunit tikeraarneqarnissaat piffissaligaanngitsumik kinguartinneqarpoq.

Tasiilami unammillernartut oqaloqatigiissutiginissaat siunertaralugu politikerinik tikittoqarnissaa kissaatigineqaraluaqaaq, tikeraarnermilu naalakkersuisut innuttaasunik oqaloqateqarlutillu naapitsisussaagaluarput.

Ataatsimiinnerit kaffisoqatigiinnissarlu taamaatiinnarneqarput

Naalakkersuisut siulittaasuata Jens-Frederik Nielsenip, ineqarnermut, attaveqaasersuutinut, isorliunerusunut upalungaarsimanermullu naalakkersuisup Iddimanngiiu Jensen Biancop aamma aalisarnermut, piniarnermut, nunalerinermut imminullu pilersornermut naalakkersuisup Peter Borgip innuttaasut, suliffeqarfiit inuussutissarsiortullu tikeraarnerminni naapittussaagaluarpaat.

Innuttaasuttaaq katersortarfimmi ippassaq sapaammi kaffisoqatigalugillu naapittussaagaluarpaat.

Pilersaarut taanna tikeraarnissarlu taamaatiinnarneqarput, qaqugulu tikissinnaanerat suli ullulerneqarani.