Naalakkersuisut: Tuluit Nunaannik isumaqatigiissut nutaaq ilinniagaqartunut oqaluttuarisaanikkut periarfissaavoq

Qaammammi uani siusinnerusukkut tuluit ilinniartitaanermut pilersaarutaannut periarfissiisumik Naalakkersuisut Tuluit Nunaannik isumaqatigiissusiorput.

Pilersaarut Cheveningimik taaguuteqartoq, nunat tamat akornani stipendianik aaqqissuussineruvoq, tuluit nunanut allanut ministereqarfiannit aningaasalersorneqartoq.

Ilinniagaqartut bachelorimik ilinniagaqareernissaat pilersaarummi piumasaqaataavoq, taamaattumillu peqaraanni Tuluit Nunaanni tamakkiisumik aningaasalersorneqartumik masterinngorniarnermik ingerlatsinissamik periarfissiivoq.

- Nunarsuarmi pitsaanerpaat ilaat

Naalakkersuisup Nivi Olsenip isumaqatigiissut “kalaallinut ilinniagaqartunut oqaluttuarisaanikkut periarfissatut” taavaa

"Tuluit universitetii nunarsuarmi pitsaanerpaanut ilaapput, Chevening-stipendiatigullu inuusuttortavut nunat tamat akornanni ilinniakkat qaffasinnerpaat ilaannik periarfissaqalerput. Kalaallit Nunaat nunat tamat akornanni piginnaasanik nukittuunik pisariaqartitsivoq, suleqatigiinnerlu manna nunatta siunissaanut pingaarutilimmik alloriarneruvoq”, Nivi Olsen tusagassiorfinnut nalunaarummi allappoq.’

Nivi Olsenip isumaqatigiissummut nutaamut Tuluit Nunaata Danmarkimut aallartitaa Victoria Elizabeeth Billing atsioqatigaa.

Aallartitaq: Manna aallarniutaannaavoq

Tuluit Nunaata ilinniartitaaneq aqqutigalugu Kalaallit Nunaannut atassuteqaatinik nukittorsaasinnaanini tulluusimaarutigaa, Aallartitaq oqarpoq:

"Manna aallarniutaannaavoq, ilaatigullu ilinniartitaanerup, ilisimatusarnerup tuluillu oqaasiinik ilinniartitsinerup nukittorsarnissaanut suleqatigiinnikkut periarfissat suli amerlanerusut ineriartortinnissaat qilanaaraarput”, aallartitaq oqarpoq.

Cheveningimik pilersaarutikkut qinnuteqarnerit aggustusimi 2026-mi ammaanneqassapput.