Naalakkersuisut UNICEF-imik suleqateqarnertik sivitsoraat
Nakuusa aqqutigalugu meeqqat pisinnaatitaaffiinik peqataatinneqarnissaanniillu suliniut 2028-p naanissaata tungaanut ingerlanneqaannassaaq.
UNICEF-ip Kalaallit Nunaanni immikkoortortaqarfiani pisortaq Tina Dam, Meeqqanut Inuusuttunullu Naalakkersuisoq Mads Pedersen aamma UNICEF Danmarkimi siulersuisuni siulittaasup tullia Anne Louise Eberhard assimi takuneqarsinnaapput.
Assi: Nakuusa
Naalakkersuisut aamma UNICEF Danmarkip Kalaallit Nunaanni meeqqat pisinnaatitaaffiisa aamma peqataatinneqarnissaat pillugu ukiorpassuarni suleqatigiinnerat ingerlaannassaaq. Suleqatigiinnermut isumaqatigiissut 2028-p tungaanut sivitsorneqarpoq.
Nakuusa – UNICEF Kalaallit Nunaat tusagassiutitigut nalunaarummi taama allappoq.
Suleqatigiinneq NAKUUSA-p tunngavianik aallaaveqarpoq, 2010-miilli meeqqat pisinnaatitaaffiisa, kiisalu meeqqat sunniuteqaqataanissaasa aamma peqataatinneqarnissaasa pitsanngorsaavigineqarnissaat siuarsarniarlugit qitiusumik aallaaviusimasoq. Kalaallit Nunaat tamakkerlugu meeqqat NAKUUSA-mi ataatsimoorfiusumi peqataasarput peqataasarnikuullutillu.
2011-miilli nuna tamakkerlugu meeqqat imminnut naapeqatigiittarput ukiumoortumik Meeqqat Ataatsimeersuartarneranni, kommunit tamarmik Meeqqat Isummersorfii pilersippaat, aamma atuarfinni 73-iusunit ullumikkut 36-t Nakuusaaqqanik /Pisinnaatitaaffinnik siunnersuisartunik peqarput.
TUNNGAVILERSUUTIT TALLIMAT
Naalakkersuisut UNICEF Danmarkilu isumaqatigiissutaat suli tallimanik tunngaviusunik tunngavilersuuteqarpoq:
• Meeqqanik peqataatitsineq, sunniuteqaqataatitsineq aamma meeqqat peqatigalugit ataatsimut pilersitsineq
• Najukkamut attuumassuteqarneq
• Meeqqat aamma inuusuttut siullertut anguniarneqarnerat
• Paasissutissiinerit
• Nakkutilliineq aamma nalilersuineq
Misilittakkat takutippaat meeqqat piviusumik peqataatinneqartarnerat meeqqat iluarisimaarinninnerannut, ilikkagaqarnerannut aamma ineriartornerannut pitsaasorujussuarmik kinguneqartartoq, soorlu politikkikkut ineriartortitsinermi aalajangiisarnermilu meeqqat isumaat tusaanissaat pingaaruteqarluinnartuusoq.
Ukiumoortumik meeqqanik ataatsimeersuartitsisarnerit
Naalakkersuisut UNICEF Danmarkillu ilaatigut meeqqat pisinnaatitaaffiisa aamma meeqqanik isiginnittarneq ataatsimut isigalugu pisinnaatitaaffiit aallaavigalugit siuarsarneqarnissaa aamma erseqqinnerulernissaa 2028-p tungaanut sulissutiginiarpaat.
Taakkuttaaq politikkikkut ineriartortitsinermi aalajangiisarnernilu meeqqat isumaat tusaaneqartarnissaat qulakkeerniarlugulu pisinnaatitaaffiit pillugit atuarfinni suliaqartarnerup nalilersortarnissaa pitsaanerulersinniarpaat.
Aammattaaq ukiumoortumik meeqwqanik ataatsimeersuartitsisarniarput.
UNICEF Danmark aamma Naalakkersuisut suliamut ukiumoortumik tamarmik immikkut 1 mio. kr.-inik tunngaviusumik aningaasaliisassapput. Aningaasat ilaatigut suliniutit aqunneqarnerannut aamma ingerlatassat piviusunngortinneqarnerannut atorneqassapput.
Suleqatigiinneq 2026-mi januaarip aallaqqaataani atuutilerlunilu 2028-p naaneranut ingerlassaaq.
