Naalakkersuisut uppernarsarpaat: Illersornissaqarfik sakkutuunik amerlanerusunik Kalaallit Nunaannukartitsissaaq

 12.35 Nutartigaq: Sakkutuut amerlineqarnerat Naalakkersuisut uppernarsarpaat
Danskit illersornissaqarfiata sakkutooqarnikkut piareersaatinik Kalaallit Nunaannukartitsivoq. Taakkulu tassaapput sakkutuut atortorissaarutaat sakkutuullu siuttuusartut.

DR-ip tamanna paasivaa.

Sakkutuut siuttuusartut tassaapput sakkutuut amerlasuut illersornissaqarfimmeersullu takkunnissaannut piareersaajartortitaasartut.

DR-ip sakkutuut timmisartuat Challenger Nuummut ataasinngornermi minnerata assilineqarnera aamma pissarsiarisimavaa.

DR-illi timmisartoq sakkutuunut naalagaaffimmut atassuteqarnersoq uppernarsarsinnaanngilaa, aamma Illersornissaqarfik tamanna pillugu oqaaseqarumanngilaq.

Danmarkip Kalaallit Nunaanni illersuinera USA-p arlaleriarluni isornartorsiortarpaa.

Aalajangersimasumik nunamiissinnaanissamut periarfissaq illersornissamut ministerip eqqaagaa

Illersornissamut ministerip Troels Lund Poulsenip (V) Kalaallit Nunaanni sakkutooqarnerulernissaa marlunngornermi eqqartorpaa.

- Danskit sakkutuui Kalaallit Nunaanni ataavartumik amerlanerusunik sakkutooqarnissaat pillugu apeqqut maanna ingerlateqqipparput, aammali nunat allat peqataatillugit, taanna Nunanut allanut tunngasunut ataatsimiititaliami ataatsimeereernermi kingorna oqarpoq.

Nunat Natomut ilaasortaasut allat peqatigalugit Kalaallit Nunaanni 2026-mi sungiusartoqartarnissaa aamma eqqaavaa.

Jens-Frederik Nielsen: Innuttaasut sakkutuut takussaanerulernissaat piareersimaffigisariaqarpaat

Aamma Naalakkersuisut siulittaasuata Jens-Frederik Nielsenip (D) Sermitsiamit KNR-imillu marlunngornermi ualikkut apersorneqarnermini sakkutooqarneq eqqartorpaa.

Innuttaasut illoqarfinni sakkutuut takussaanerulernissaat piareersimaffigisariaqaraat tassani oqaatigaa:

– Danskit sakkutuui piffissami sivisuumi takussaalernikuuupput. Danmarki suleqatigalugu piginnaasanik annertusaanissamut isumaqatigiissuteqarpugut, tamannalu nakkutilliinermut upalungaarsimanermullu aningaasaliinernik annertuunik nassataqarpoq. Nato peqatigalugu sungiusarujussuaqqammerpugut, sungiusarnerillu taamaattut pilersaarusiorneqartuaannarput, Jens-Frederik Nielsen apersorneqarnermini oqarpoq, nangillunilu:

– Kalaallit Nunaat illersorneqassappat nuna aamma ilisimaneqartariaqarpoq.

Issittumi Sakkutooqarfik, Kalaallit Nunaanni eqqaanilu sakkutuut suliassaannik isumaginnittoq Nuummilu qullersaqarfeqartoq, maanna 150-it missaannik sulisoqarpoq, taakkualu immikkoortortaqarfinni assigiinngitsuniillutik.

Issittumi Sakkutooqarfik aamma umiarsuarnik alapernaarsuutinik, timmisartunik, qulimiguulinnik qimussimillu alapernaarsuisartunik Siriusinik aamma peqarpoq.

Sakkutuut nunanit tamalaaneersut malinnaapput

Enhedslistenip politikkikkut oqaaseqartartua Pelle Dragsted naapertorlugu danskit sakkutuui piareersaajartortitanik nunanit tamalaaniit malinnaasut qanittukkut tikissapput.

DR-ip allaaseraa.

- Sapaatip-akunnerani kingullermi tamanna ujartorparput, silatusaarneruvoq. Europami nunat allat sakkutoorpassui Kalaallit Nunaannukaarnerat aamma paasivara, Pelle Dragsted DR-imut oqarpoq.

Sermitsiap Nunanut allanut Naalakkersuisoqarfik oqaaseqartinniarsaraa.

Danmarkip nunallu Natomi ilaasortat Kalaallit Nunaanniinnerulertut

Natomi nunat iligisat qanimut suleqatigalugit Kalaallit Nunaanni eqqaanilu pingasunngornermiiit sakkutooqarnerussaaq, Illersornissaqarfik ilisimatitsivoq.

Naalakkersuisut Illersornissaqarfillu tusagassiutitigut nalunaarummi ima allapput.

- Nato-mut ilaasortatut Kalaallit Nunaanni eqqaanilu illersornissap isumannaallisaanerullu nukittorsarnissaa Nato-milu nunanik iligisatsinnik qanimut suleqateqarluni pinissaa Naalakkersuisunit qitiutillugu pingaartinneqarpoq. Illersornissaqarfik Naalakkersuisullu suliniutit aallartinnissaannut qanimut suleqatigiillutillu issittumi Europamilu ilitta akornanni suleqatigiipput.

- Sungiusarnerit aallartippata inuiaat kalaallit Issittumi Sakkutooqarfiup attaveqaatai aqqutigalugit ataavartumik ilisimatinneqartarumaarput, nunanut allanut tunngasunut naalakkersuisoq Vivian Motzfeldt (S) oqarpoq.

- Illersornissaqarfiup Issittumi sakkutooqarnerunissaa sungiusarnissarlu qanorpiaq pisinnaanersoq issittumi Europamilu iligisat arlallit peqatigalugit sapaatit-akunnerini tulliuttuni misissussavaa, illersornissamut ministeri Troels Lund Poulsen (V) oqarpoq.

Atortut innuttaasunut pingaarutillt ilaatigut nakkutigineqarlutillu, Kalaallit Nunaanni oqartussanik, ilaatigut politiinik, ikiuineq, sakkutuunik nunanit iligisaneersunik tikittunik isumaginninneq, Kalaallit Nunaanni eqqaanilu timmisartunik sorsuutinik atulersitsineq kiisalu sakkutuut imarsiortut suliassamik naammassinninnissaat 2026-mi sungiusarnerni ilaatigut sungiusarneqassapput.