Kalaallit arnat 1960-91-imi spiralilersorneqarsimasut
ataasiakkaarlugit 300.000 koruuninik taarsiiffigineqarnissaat Folketingimi
amerlanerussuteqarluartut sapaatip-akunnerani kingullermi isumaqatigiissutigaat.
Taamaalilluni Kalaallit Nunaata Danmarkillu
oqaluttuarisaaneranni pisimasoq ilungersunartoq naangajalerpoq.
Kalaallit arnat 1960-91-imi spiralilersorneqarsimasut
ataasiakkaarlugit 300.000 koruuninik taarsiiffigineqarnissaat Folketingimi
amerlanerussuteqarluartut sapaatip-akunnerani kingullermi isumaqatigiissutigaat.
Taamaalilluni Kalaallit Nunaata Danmarkillu
oqaluttuarisaaneranni pisimasoq ilungersunartoq naangajalerpoq.
– Soorunami nuannaaqaanga. Ataatsimoorluta ilungersuuterput
naammassivoq. Utoqqatserfigineqarlutalu maanna taarsiiffigineqarnissatsinnut
periarfissaqalerpugut. Tamanna anguniarnikuuarput, taamaammat
pitsaanerusinnaanngilaq, Naja Lyberth oqarpoq, taanna ukiuni arfineq-pingasuni
arnanut namminermisut 14-iinnarnik ukioqarluni akuerseqqaarani
spiralilerneqarsimasunut oqaaseqartartuuvoq.
Kanngunarsaanerujussuit
Naja Lyberthip inuusuttuulluni spiralilerneqarsimanerminik misigisani
2019-imi AG-mut oqaluttuareqqaarpai. Spiralilersuisoqarsimanera pillugu suliaq
kingorna atuagassiami Arnanut-mi allaaserineqarpoq, DR-imilu tusagassiortunit
marlunnit malittareqqiivigineqarpoq, taakkualu oqaluttuaq podcastimi
”Spiralkampagnen”-imi 2022-mi saqqummiuppaat, tamatumalu kinguneranik Inuit
Pisinnaatitaaffiinut Kalaallit Nunaanni Siunnersuisoqatigiit aamma Danmarkimi
inuit pisinnaatitaaffii pillugit ilisimatusarfik inuit pisinnaatitaaffiinik
sakkortuumik unioqqutitsisoqartoq oqarsimapput. Tassunga atatillugu danskit
naalagaaffiat akisussaaffini misissoqqullugu inatsisitigullu kinguneqaatissat,
pisortaq Louise Holck naapertorlugu "utoqqatsernissaq taarsiissuteqarnissarlu”,
pillugit siunnersuuteqaqqullugit kajumissaarpaat.
Misigissutsit sakkortuut
Arnat septembarimi utoqqatserfigineqarput. Taarsiiffigineqarnissaallu
decembarimi nalunaarutigineqarpoq.
– Ikimut maanna
mamisitaasariaqartumut mattutitut ippoq. Mamisitsinerlu ingerlavoq.
Misigissutsillu anigorniakkatta inissaqartinnissaat pingaaruteqarpoq.
Oqaluttuat sakkortuut saqqummiunneqarput. Spiralilersinneq
naalliutsitaaneruvoq, amerlasuullu kingorna meerartaarsinnaasimanngillat. Arnat
amerlasuut kiserliulersimapput.
– Ataatsimoorluta inuuvugut,
ilaasariaqarpugullu. Avissaaqqasimavugut ilaqutariittullu ataatsimoorfigut
annaasimallugit, tamannalu toqqissisimanitsinnut sianiutitsinnullu
sunniuteqartarpoq. Misigissutsikkut naalliuutinik ulikkaarsimagutta maannakkut
akiuunnermi anigoruminaatsutut ersertarpoq. Misigissutsit sianiutillu
ingerlaarnerisa mianersortumik suliarineqarnissaat pingaaruteqarpoq,
taamaammallu aamma tarnip pissusiinik ilisimasalimmik oqalutsimillu
angalasartunik pilersitsisoqarnera pitsaasuuvoq.
Naja Lyberthip arnat 143-t 300.000 koruuninik
akiliinissamik piumasaqartut ilaattut 2024-mi danskit naalagaaffiat
eqqartuussivimmut suliassanngortippaa. Taarsiiffigineqarnissaq Nunamut
Namminermut Peqqinnissaqarfimmullu ministereqarfiup taarsiissuteqarnermut
aaqqissuussaanullu ilanngunnissaa siunertaralugu arnaqatinilu danskit
naalagaaffiat isumaqatigiissuteqarfigissallugu naatsorsuutigaat.
