Nakorsaaneq: Imigassamik atuinerup killilersimaarneqarnera iluaqutaasinnaavoq

Kommune Kujallermi imigassamik tuniniaasarneq sassaallernerlu sapaatip akunnerani kingullermi tallimanngormat unnukkut inerteqqutaalersinneqarpoq.

Kommunalbestyrelsip qinnuteqaataa tunngavigalugu, Naalakkersuisut taama aalajangerput. Imigassamik atuinerup kingunerisaanik ajunaartoqarnera, ilaatigut Nanortalimmi toqutsisoqareernerata kingorna, imigassap inerteqqutaalernera atuutilersinneqarpoq.

- Ermusip sippunneqarnera ajuusaarnaqaaq. Nanortalimmi pisut pissutigalugit ajornartoornermi upalungaarsimasut qaammat kingulleq aallartippavut. Taakkuuppullu taqqavunga aallartinneqartuartut, Malene Vahl Rasmussen oqarpoq, Sermitsiamut oqarpoq.

Killilimmik periarfissiineq

Nunatta Nakorsaaneqarfia Kujallermi imigassamik matusinissamik aalajangiinermut akuutinneqanngilaq, nunattali nakorsaanera Paneeraq Noahsen oqarpoq imigassat pisiarineqarsinnaanerannik killilersuinerit, ilaatigut imigassanik tuniniaanerit ullukkut ammasarfiisa, nioqquteqarfiillu killilersorneqaleraangata imigassamik atuineq, imigassamillu aallaaveqartumik innarliinerit appasinnerusartut.

Taassumali tikkuarpaa misissuinerni killilersuinerit ataatsimut isigalugit misissorneqarsimasut, tassanngaannaq sivikitsuinnarmillu inerteqqutaalernerat, pineqarani soorlu Kujallermi taama pisoqartoq.

– Imigassamik pilersuinerup killilersimaarneqarnerata imigassamik atuinermik imigassamillu ajoqusiinernik annikillisaasinnaaneranik uppernarsaatissaqarluarpoq, nunatta nakorsaanera Paneeraq Noahsen oqarpoq, taassumalli imigassamik inerteqquteqalernermi, imigassamik pinngitsuuisinnaanngitsut immikkut eqqumaffigineqartariaqartut tikkuarpaa.

- Pitsaaliuineq katsorsartinnermillu periarfissinneqarneq pingaaruteqarpoq. Imigassap taama pilertortigisumik inerteqqutaalernera peqqissutsimut iluaqutaanera innuttaasunullu imigassamik pinngitsuuisinnaajunnaarnikunut qanoq kinguneqarsinnaanera eqqarsaatigineqartariaqarput.

Kingunerlutsitsinerit annertuut

Paneeraq Noahsenip erseqqissarpaa imigassamut pilertortumik inerteqquteqalerneq, soorlu Kujallermi taama isiortoqarnerani, "imigassamik pinngitsuuisinnaanngitsut pillugit immikkut mianersorfissaqartoq, imigassamik atuisarunnaarneq ajornartorsiulernermik kingunerlutsitsisinnaammat“.

- Imigassamik pinngitsuuisinnaanngitsut kingunerlutsitsisinnaapput (abstinens). Ilaatigut malunniutit tassaasinnaapput eqqissiviilliorneq, sajunneq, kiagunneq, meriannguneq uummalluleriasaarnerlu.Ajorluinnartillugulu noqartoqarsinnaavoq, takorluuisoqarsinnaavoq tusaasuusisoqarsinnaalluni aamma inuunermillu navianartorsiortitsisoqarsinnaalluni.

Imigassartorunnaarnerup katsorsarnissaa peqqinnissaqarfimmi suliassaavoq nalinginnaasoq. Imigassartorunnaarnermik ilungersunartumik ajornartorsiuteqartut napparsimmavimmi uninngatinneqartarput nakorsaatinillu katsorsartillutik, nakorsamit immikkut nalilerneqareerpata.