KL

DK

ILEQQUUSUMIK ATAATSIMEERSUARNEQ

Naleraq oqaluttuarisaanermi tunuliaqutserluarneqareerluni katersuutissaaq: Broberg qinigassanngorteqqippoq

Naleraq Nuummi ileqquusumik sapaatip akunnerata naanerani ataatsimeersuassaaq, tassani "Oqaatsinit iliuutsinut" qulequtarineqassalluni. Ataatsimeersuarneq partii aatsaat taama qinigaatitaqartiginerata kingorna pissaaq, tassalu Inatsisartuni illuatungiliuttuni maanna annersaapput, Folketingimullu namminneq sassartitaminnik siullermeerluni ilaasortaatitaqarluni.

Naleqqap siulittaasua Pele Broberg partiip ileqquusumik ataatsimeersuarnera ammarlugu oqaaseqartoq. Aki-Matilda Høegh-Dam saamerliusoq Anthon Frederiksen talerpiatungaaniittoq takuneqarsinnaavoq.
Sort-hvidt portræt af en kvinde med mørkt hår iført en mørk bluse foran en lys baggrund.
Ane-Marie Petersen Ane-Marie Petersen Tusagassiortoq
Saqqummersinneqarpoq

Ataatsimeersuarneq ullumi arfininngornermi oktobarip 24-anni sapaammilu oktobarip 25-anni ingerlanneqassaaq. Partiip ilaasortai Nuummi festisalimi Pilutami arfininngornermi ataatsimiissapput, sapaammilu Illorpumiissallutik. Naleraq tusagassiortunik sapaammi nalunaaqutaq 17.30 katersortitsissaaq, tassani partiip ataatsimeersuarnermi aalajagingai pingaarnerit saqqummiunneqassapput.

Ataatsimeersuarnermi siulittaasumut qinersineq aamma qitiuvoq. Siulittaasup Pele Brobergip qinigassanngorteqqinnissani nalunaarutigaa.

– Kaammattuisorpassuit, tatiginnittorpassuit neriuuteqartorpassuillu sassassallunga neriorsornikuuakka. Siulittaasutut qinigassanngorteqqinniarlunga siulersuisuunerit kingullermi ataatsimiinnitsinni aamma ilisimatippakka, Pele Broberg Sermitsiamut oqarpoq.

Aatsaat taama qinersiseqartigisut

Pele Brobergip partiimik pilersitsisoq Hans Enoksen paarlallugu 2022-mi siulittaasunngorpoq. Hans Enoksen Siumumiit 20214-imi anilluni Naleraq pilersinnikuuaa. Partii aalisartut piniartullu, nunaqarfiit isorliunerusullu kiisalu Kalaallit Nunaata namminiilivinnissaa sukkanerunissaa politikeralugu pilersinneqarpoq.

Naleraq siullermeerluni Inatsisartunut pingasunik 2014-imi qinersinermi ilaasortaatitaqalerpoq. Tamatuma kingorna partii alliartorpoq, Inatsisartunullu qinersinermi marsimi 2025-mi Naleraq aatsaat taama angusarissaartigaaq.

Taamaasilluni partii arfineq-pingasunik ilaasortaatitaqalerpoq, partiinilu annersat tullinngorluni. Naleraq Naalakkersuisooqatigiinnut ilanngutinngilaq, taamaammallu Inatsisartuni illuatungiliuttutut maanna annersaalluni.

Partiip siuariartornera Danmarkimi politikikut sulinermi aamma erserpoq. Folketingimut marsimi 2026-mi qinersinermi, Naleraq siullermeerluni nammineq sassartitaminik Folketingimi Kalaallit Nunaat sinnerlugu ilaasortaqalerpoq. Qarsoq Høegh-Dam qinigaavoq taamaalillunilu Naleqqami politikerit siullersaattut Folketingimi ilaasortanngorluni.

Partiip Kalaallit Nunaanni ilaasortai Nuummukarlutik ileqquusumik ataatsimeersuarnermut peqataajartorput. Nunaqarfinni aqutsisuni ilaasortat, kommunalbestyrelsimi kiisalu partiit inuusuttaaniit pilersinneqaqqammersumiit Naleqqaniit siulittaasoq peqataasut ilagaat.

Aki-Matilda Høegh-Dam, 2022-mi Siumut sinnerlugu Folketingimut qinigaasoq - qinersiviullu ingerlanerani Naleqqamut nuuttoq - Inatsisartuni ilaasortaanini aallunniarlugu qinigassanngorteqqinniarani aalajangernikuunerata kinguneranik Qarsoq Høegh-Dam qinerneqarpoq. Inatsisartunut 2025-mi qinersinissami Naleraq sinnerlugu qinigassanngortinnikuuvoq.

Broberg siulittaasutut ingerlaqqikkusuttoq

Naleraq partiinngorlaajulluni pingasunik 2014-imi ilaasortaqalernikuuvoq, Inatsisartunilu arfineq-pingasunik maanna ilaasortaatitaqarlunilu folketingimi ilaasortaatitaqalerpoq. Illuatungiliuttullu partiiattut annerpaatut qitiusumik inissisimaffeqarpoq.

Ataatsimeersuarnermi 50-it sinnerlugit  peqataasussatut nalunaarsorneqaqqapput. Pele Broberg, siulittaasup tullia Jens NapãtôK’, siulersuisuunerit kiisalu immikkoortortaqarfinnit, kommuninit, nunaqarfinniit partiillu inuusuttunut kattuffiannit Naleqqanit aallartitat ilaatigut peqataassallutik.

Naleraq ileqquusumik kingullermik juunimi 2023-mi ataatsimeersuarpoq, tassanilu Pele Broberg siulittaasutut qinigaaqqippoq.

Ukioq manna ataatsimeersuarnermi "Oqaatitsinniit iliuutsinut” qulequtaavoq, Naleqqallu qinersisartunit tunuliaqutserluarneqarnera politikikkut qanoq timitalerneqassanersoq tassani eqqartorneqartussaassalluni.

Illorsuarmi tusagassiortunik sapaammi nalunaaqutaq 17.30 katersortitsinermi, ataatsimeersuarnermi aalajangiinerit pingaarnerit saqqummiunneqassapput.

folketingi ataatsimeersuarneq naleraq inuiaqatigiit inatsisartut pele broberg

Atorfiit tamaasa takukkit

PODCASTI

Powered by Labrador CMS