NAPA juullimut tunissutissanik nuna tamakkerlugu atuarfinnut nassiussisoq

Pinnguaatit atorlugit ilinniarneq nuannersinnaavoq.

Maanna nunatsinni atuartut periarfissaqalerput. NAPA-p (Nunani Avannarlerni Piorsarsimassutsikkut Attaveqaat) aningaasatigut ikiuinera pissutigalugu nunatsinni atuarfiit tamarmik Kalaallit Nunaat Pillugu Nalorsitsaarut, pinnguaat nutarsagaq, nuannersumik uumassuseqartumillu Kalaallit Nunaat pillugu ilinniartitsissutigineqartoq, nassiuppaa.

Grønlandsquizzen tusagassiuutitigut nalunaarummi taama allappoq.

- NAPA-p Grønlandsquizzen, Ilinniartitaanermut Aqutsisoqarfik aamma Blue Water suleqatigilluarnerat nuannaarutigaa. Pinnguaatit atuarfinni nuannaarutaallutillu atorluarneqarumaartut neriuutigaarput.

- NAPA 2026-mi ukiunik 40-nngortorsiussaaq, tamannalu malunnartinniarlugu aallartilluarpugut, Susanne Andreasen, NAPA-mi pisortaq, oqarpoq.

Birthe Liebachip Lis Sørensenillu 1991-imi pinnguaasiarisimasaat Grønlands Quiz-imik taaneqartartoq, suli angerlarsimaffinni amerlasuuni atorneqartartoq, nutarterneqarpoq.

Kalaallisut saqqummersinneqassasoq

Markus Lentzip, Lasse Kyedip aamma Mads Malik Fuglsang Holmip pinnguaatitoqaq ukiuni kingullerni sisamani nutartersimavaat. Apeqqutit 1.680-init amerlanerusut misissorneqarput, nutaanillu arlalinnik ilanngussisoqarpoq. Pinnguaat ullumikkut Kalaallit Nunaannik ersersitsisoq inunnit qanorluunniit ukiulinnit pinnguarineqarsinnaavoq.

Markus Lentzip, Kangerlussuarmi Ilulissanilu ilinniartitsisuusimasup, pinnguaatip atuarfinnut ingerlateqqinneqarnera nuannaarutigaa.

- Ilinniartitsisutut atuartutsissutinik Kalaallit Nunaannut atuartunullu kalaallinut naleqqussarsimasunik pinnguarluni ilinniartitsissutaasinnaasunik amigaateqartarpunga. Taamaammat NAPA-p tapersersuinera qujamasuutigaara. Takorluugaq piviusunngorpoq, Markus Lentz oqarpoq.

Kalaallit Nunaat pillugu nalorsitsaarut siullerpaamik kalaallisut saqqummersinneqartoq taassuma erseqqissarpaa.

- Pinnguaatip kalaallisut saqqummersinneqarnissaa uagutsinnut pingaaruteqarsimavoq, taamaalilluni Kalaallit Nunaanni kikkut tamarmik – ilitsoqqussaralugu oqaatsit apeqqutaatinnagit – nalorsitsaarut atorlugu nuannisaarnissaminnut periarfissaqalissapput, Markus Lentz oqarpoq.

Blue Waterip pinnguaatit akeqanngitsumik Nuummut assartorpai, Ilinniartitaanermullu Aqutsisoqarfiup pinnguaatit nuna tamakkerlugu atuarfinnut ingerlateqqippai. Pinnguaat nittartakkakkut siumoortumik inniminnerneqarsinnaavoq.