Napparsimasut taarsiiffigineqartarnissaannik isumaginnittoqarfiup angalanera soqutigineqarluartoq

Inatsisileritooq, tarnip pissusiinik ilisimasalik, siusinnerusukkut eqqartuussisoq oqalutserlu ataaseq sineriak sinerlugu maannakkorpiaq angalapput.

Arnat spiralilersuinermut suliamut tunngatillugu taarsiiffigitinnissamut periarfissarsiortut naapittarpaat, taarsiissutinillu qinnuteqarnissaannik ikiortarlugit.

Ilulissani Uummannamilu angalanermi arnat 75-100-t missaanniittut ikiorneqarsimalereerput.

- Innuttaasunik ataatsimiisitsisarnivut soqutigineqarluarput, napparsimasut taarsiiffigineqartarnissaannik isumaginnittoqarfik Sermitsiamut ilisimatitsipput.

Napparsimasut taarsiiffigineqartarnissaannik isumaginnittoqarfik naapertorlugu arnat amerlanerit ikiortissarsiornissamut periarfissaqarsimanngitsuuppata immaqa saaffiginnittarsimanavianngikkaluarput.

- Annertuumik pisariaqartitsisoqarnera malugisinnaavarput. Arnat amerlasuut taarsiiffigitinnissamik qinnuteqarsinnaajumallutik ikiorneqarnissaq pisariaqartittarpaat, amerlanerillu uagutsinnik naapitsisimanngikkaluarunik taarsiiffigitinnissaminnut periarfissaqarsimanavianngikkaluarput.

Tarnip pissusaanik ilisimasallip arnat amerlasuut utersaartoorneranni pinasuartumik ikiorasuarpai.

- Taarsiivigitinnissamik qinnuteqaatip suliarinerani misigissutsikkut eqqaamasanillu utersaarnartunik pilersitsisinnaanera, aamma ilaasa tarnikkut timikkullu qisuariarfigisinnaasaat, piareersimaffigaavut. Misilittakkakka naapertorlugit suliamut tunngasumik ilisimasalimmik allamillu toqqissisimasumik tapersersuisumik ikiorteqarneq oqinnerulersitsisinnaavoq, tarnip pissusaanik ilisimatooq Tone Frank oqarpoq.

Napparsimasut taarsiiffigineqartarnissaannik isumaginnittoqarfiup maluginiarpaa angalasoqarnera, arnat ilaannit kingusissukkut paasineqartartoq. Taamaasillutik taarsiivigineqarnissamut qinnuteqaammut ikiorneqarnissartik, tarnillu pissusaanik ilisimasalimmik oqaloqateqarnissartik pinngitsoortittarlugu.

Taamaattumik napparsimasut taarsiiffigineqartarnissaannik isumaginnittoqarfik arnat, pineqartumut attuumassuteqarsinnaasut angalaqatigiit qaqugu tikissanersut nakkutigeqqissaaqqullugit.

Illoqarfinnut tallimanut tikeraarneq

Ilulissanut Uummannamullu angalareerunik Aasiannut, Qeqertarsuarmut, Qasigiannguanut, Maniitsumut Nuummullu ingerlaqqissapput.

Angalaqatigiit innuttaasunik ukunani ataatsimiisitsissapput:

Qeqertarsuaq: katersortarfimmi oktobarip 10-ani nal. 10

Qasigiannguit: katersortarfimmi oktobarip 14-ianni nal. 10

Maniitsoq: katersortarfimmi oktobarip 17-ianni nal. 10

Nuuk: katersortarfimmi oktobarip 20-ani nal. 10

Aammattaaq Ilulissani Uummannamilu napparsimasut taarsiiffigineqartarnissaannik isumaginnittoqarfimmit angalaqatigiit immikkut ammatitsipput, tassani angalaqatigiit ulluni marlunni ataatsimilu arnat naapinnissaannut periarfissikkumallugit.

169-it akuerineqartut

Aammattaaq naartunaveersaatinik piumassuserinngisamik ikkussivigitissimanermut tunngatillugu uppernarsarneqarsimasut 169-inngorput.

Napparsimasut taarsiiffigineqartarnissaannik isumaginnittoqarfiup kisitsisaataasa oktobarip arfineq-aappaanni saqqummiunneqartut, naapertorlugit arnat 169-it qinnuteqaataat akuerineqarput, arfineq-marlullu itigartinneqarlutik.

Suliani 169-ini akuerisaasuni 50 millionit koruunit sinnerlugit Maannamut taarsiiffigitinneqarput.

Napparsimasut taarsiiffigineqartarnissaannik isumaginnittoqarfik suliassanik 732-nik tungussaqarsimapput.

Angalanerup siulliup kingorna arnat, ikiorserneqarnissaanut paasissutissiinerit napparsimasut taarsiiffigineqartarnissaannik isumaginnittoqarfimmiit paasissutissiinerit suli ingerlanneqassapput.

Napparsimasut taarsiiffigineqartarnissaannik isumaginnittoqarfimmit 2027-mi upernaakkut kangiani, kitaani kujataanilu aappassaanik angalasoqarnissaa pilersaarutigineqarpoq.

Aammattaaq napparsimasut taarsiiffigineqartarnissaannik isumaginnittoqarfik Københavnimi, Aarhusimi, Aalborgimi Odensemilu kalaallit illuini arnanut saqqummiussisimapput.

Arnat taarsiiffigitissinnaasussat paasissutissinneqarnissaat qinnuteqarsinnaanissaallu qulakkeerniarlugu ikiuinissaq siunertaavoq.