Narsap eqqaavissuani aaqqissuussineq aallartippoq

Narsami sulisup ataatsip, eqqakkat 3.000 m3 missaanniittut puussiarsuarnut sapaatit-akunneri marluk ingerlaneranni, poortortarpai.

Eqqakkat puussiarsuarnut ikiorarneqarput, eqqakkallu sinneruttut ikuallajasunut ikuallanngisanullu immikkoortiterneqassapput.

Assi: Kommune Kujalleq

Hanna Hviid Hanna Hviid Tusagassiortoq

Saqqummersinneqarpoq 25. Juuli 2026 - 09:59

Narsap eqqaavissuani eqqakkat amerlasuut eqqarneqarsimasut pillugit piffissami kingullermi aaqqissuussisoqarpoq.

Taamaattumik Qaqortumiit sulisut amerlanerusut illoqarfimmut aallartinneqarput.

Taama Kommune Kujalleq nittartakkamini allappoq.

Ussassaarut

-Eqqaavissuarmi poortuisut ikiortariaqarmata Qaqortumiit eqqakkanik poorsuarnut poortuisussamik Narsamut suliartortitsivugut, taanna sapaatip akunnerini marlunni eqqakkanik poortuinermik suliaqassaaq, eqqakkammi 3000 kubikmeteriusut poortorneqartussaapput. Poortuereernerup kingorna eqqakkani allani ikuallassinnaasut ikuallassinnaanngitsullu immikkoortiterneqarnissaat suliassatut tullinnguutissavarput, Kommune Kujallermi Avatangiisinut ingeniøri, Jakob Petrussen nassuiaavoq

Eqqakkat immikkoortiterlugit suliarineqarnerani, sanaartugassanik suliaqartartunut neqeroortitsisoqassaaq.

-Eqqakkat ikuallajasut ikuallassinnaanngitsullu immikkoortiternissaanut entreprenørinik suleqatissarsiussaagut, suliariumannittussarsiuussinerlu entreprenørinut neqeroorumasunut nassiussisoqareerpoq, neqeroorullu kommuunimit akuerineqarpat immikkoortiterineq aallartinneqarumaarpoq, Jakob Petrussen oqarpoq.

Immikkoortiterinerup aallartinneqarnissaa ukiup naannginnerani aallartinneqassasoq, naatsorsuutigineqarpoq.