AASAANERANI SILA RIKOORTILIIFFIUSOQ

Narsarsuarmi panernersuaqartoq, Tasiilami juunimi siallingaatsiarpoq

Nunatsinni sila juunimi assigiinngeqisunik atugassaqartitsivoq. Narsarsuarmi ataasiarluniluunniit siallinngilaq, tamanna uuttuisarnerit 1961-imili aallartimmata aatsaat nalaanneqarpoq. Tasiilami pisut allarluinnaapput, uuttuisarnerimmi aallartimmatali juuni tassaasimavoq sialoqarnerpaat pingajuattut inissittoq. Danmarkimi silasiortut DMI-meersut kisitsisaatai taama takutitsipput.

Tasiilami nalinginnaanngitsumik juunimi sialleqattaarpoq. Juunimi nalinginnaasumik 34,9 millimeterinik siallertarpoq, ukioq mannali 108,4 millimeterinik siallerluni. DMI-p kisitsisaatai taama takutitsipput.

Assiliisoq: Oscar Scott Carl

Arnaq Nielsen Arnaq Nielsen Tusagassiortoq

Saqqummersinneqarpoq 14. Juuli 2026 - 15:33

Narsarsuarmi sialussiutit juunimi atorfissaqartinneqanngivipput. Sialunnummi uuttuutit qiviaraanni ataasiarluniluunniit siallersimanngimmat 0,0 millimeterinik sialoqarsimanera takuneqarsinnaavoq. Tamanna sialuit aputillu nakkaasut 1961-imi uuttorneqartalermatali, tassa ukiuni 65-ini, aatsaavissuaq nalaanneqarpoq. DMI-mi silasiornermik ilisimatusartoq Caroline Drost Jensen Sermitsiamut taama paasissutissiivoq.

Narsarsuarmi juunimi siallinngivissimanera taamaalilluni oqaluttuarisaanermut ilannguppoq. Narsarsuarmi juunimi nalinginnaasumik 44,8 millimeterinik siallertarpoq, sialunnulli uuttuut millimeterimik ataasinnguamilluunniit juunimi uuttuisimanngilaq.

Qaqortumissaaq juuni sialussaasuasimaqaaq. Qaammammi kingulleq 1,7 millimeterinik siallersimasoq uuttuutit takutippaat.

Ussassaarut

1961-imi uuttuisoqartalermalli juuni aatsaat taama sialukisaartigaaq. Qaqortumimi nalinginnaasumik juuni tamakkerlugu 69,3 millimeterinik siallertaraluarpoq.

Nunarput tamakkerlugu sila assigiinngeqisoq

Aasap aallartinnera Kujataani panernaqisoq Tunumut qiviaraanni sialoqarneroqisoq takuneqarsinnaavoq.

Juunimi aamma tassaavoq Tasiilami sialoqarnerpaaffiusimasut ilaat. Nalinginnaasumik pingasoriaammik siallernerulluni 108,4 millimeterinik siallersimasoq uuttuutit takutippaat. Tasiilami taama siallersimatiginera illoqarfimmi 1898-imi uuttuisoqartalermalli sialoqarnerpaaffiit pingajuattut inissinnerannik kinguneqarpoq. Tasiilami juunimi nalinginnaasumik 34,9 millimeterinik siallertarpoq.