Soqutaavallaanngikkaluartoq
piffissami kingullermi eqqarsaatigillattavara: Nunatsinni ulluinnarni sunamita
nerisarineqartarpa?
Pappiaqqatiguunngitsoq, paasiniaatitsinertiguunngitsoq,
kisiannili piviusumi. Maluginiarnerulernerani - atuarfinni, pisiniarfinni,
meeqqat taquaanni, tamatta ileqqutsinni - tunngaviusorujussuaq arajutseqqagipput paasigaluttuinnarpara.
Nerisassaannaanngitsut. Kisianili inuk.
Soqutaavallaanngikkaluartoq
piffissami kingullermi eqqarsaatigillattavara: Nunatsinni ulluinnarni sunamita
nerisarineqartarpa?
Pappiaqqatiguunngitsoq, paasiniaatitsinertiguunngitsoq,
kisiannili piviusumi. Maluginiarnerulernerani - atuarfinni, pisiniarfinni,
meeqqat taquaanni, tamatta ileqqutsinni - tunngaviusorujussuaq arajutseqqagipput paasigaluttuinnarpara.
Nerisassaannaanngitsut. Kisianili inuk.
ISUMAGA
Isuma allaaserinnittup inuttut nammineq isumaanik ersersitsisuuvoq.
Ilisimalereernikuuarput
nerisassat qarasarput sunnertaraat. Nutaarsiassaanngilaq. Kisianni ilisimasat
aamma ileqqut allanngortittanngilai. Tassaneeqqissaarporlu ajornartorsiut.
Meeqqat fiberinik amigaateqartut, nalunaarusiat takutikkaluarpaat, inuussutissat,
piffissanilu aalajangersimasuni nerisarneq, ajornartorsiutini
minnerpaangajaavorluunniit. Ajornartorsiut angineq tassaavoq uagut nammineq.
Tassami
soormiuna taama ajornartigisoq? Sooruna ilisimasaqartugut - allatulli
iliortarluta, taamatullu ingerlaannarluta malugisinnaagaluarlugu namminermut
iluaqutaanngitsoq? Pissutaavoq inuinnaagatta. Sioraasat tuppallersaammata.
Orsoq mamarami. Kaagit kaffisorluni nuanneramik. Chipsit sodavandillu
ulluinnarsiutinit iperaatitsilaartarmata. Imigissap hashillu timimi
eqqissiviinneq eqqissitittarmagu. Peqqinnanngitsut ingerlaannaq sunniuttarmata
- peqqinnartullu kingusinnerusukkut aatsaat sunniuttarlutik.
Misigissutsinit
nuanninngitsuninngaanniit sukkanerpaaq atorlugu qimaasarpugut. Sukkanerpaallu
aqqutit pisiniarfimmi tuniniarneqarput 12,95 kr.-ilerlugit. Inuit
sanngiitsuunngilagut. Inuinnaavugut nalinginnaaqqissaartunik sianiutillit,
oqilisaatinik ujaasisut, inuuneq naqisimannikkaangat. Kikkut tamarmik
taamaaliortarput - aamma angajoqqaat assoroortut, sapinngisartik tamaat pisut,
tatitorusukkaluartut. Kisianni tatitussuseq pinngortanngilaq pisuusutut
misiginikkut, tikkuartuinikkullu. Ataatsimoornikkut, paasissutissaqarnikkut,
tapersersorteqavinnikkullu takkuttarpoq.
Taamaammat
naammanngilaq oqassalluni inuit peqqinnarnerusunik nerisariaqarput. Ajornanngippallaaqaaq. Unammillernartoq
tassaavoq inuit, ilumut peqqinnartunik nerisaqalernissaannut qanoq
ikiorsinnaanerivut. Ileqqunngorsimasut qanoq allanngortinneqarsinnaappat,
mamarunartut, aaqqiissutissat sukkasuut tigoriaannaappata, peqqinnartullu pilersaarusiortariaqarlutik,
piffissaqarfigisariaqarlutik, nukissaqarluni. Qanorlu iliorluni paasineqarsinnaasunik
oqaatigineqarsinnaagamik.
Piviusunimi
kalaalerpassuit pissutsinut paasissutissat atuagaaqqaniit
paasititsiniaanernilluunniit pisanngilaat - kisiannili TikTokimit
pissarsiarisarlugit. Inuuneritta 100-nik nalunaarusiorsinnaavoq, kisianni Aslak
inuunini pillugu oqaluttuarpat toqqaannartumik, inuit 4000-it
malinnaaffigissavaat. Taamaalilluni paasinarsivoq allannguerusukkutta qanoq
iliortariaqartugut:
maligassiuisut
amerlanerussapput, peqqinnanngitsut ikinnerussallutik. Qanilaassuseq
annerussaaq, ilisimatuut oqaasii atorneqannginnerussapput.
Inuit
peqqinnarnerusunik nerisaqassasut piumaffigisinnaanngilavut, tamatuma
malitsigisaanik ulluinnarni inuunerat paasisinnaallugu takutinngikkutsigu.
Ileqqut naatsinni pinngoriartortarput, kisianni aamma uummatitsinni.
Nunamilu
siunissamik oqaluuserinniffiungaatsiartumi, amerlasuutigut puigortarparput
aalajangiisuunerpaaq: meerartavut - uagullu - sunik nerisarnersugut
isigisoqanngikkaangat.
