USA-P VENEZUELA SAASSUPPAA
Nicolas Maduro unnerluutigineqarpoq ikiaroornartumik eqqussuisutut sakkunillu USA-mut atugassanik piginnittutut
USA-p inatsisinik atuutsitsinermut ministeria oqaluttuarpoq, Venezuela-p præsidentia nulialu New York-imi unnerluutigineqartut.
Inatsisinik atuutsitsinermut ministeri Pam Bondi oqaluttuarpoq, Nicolás Maduro taassumalu nulia New Yorkimi eqqartuussivitsigut sassartinneqassasut.
Asseq (toqqorsivimmit): Jessica Koscielniak/Reuters
Venezuelap præsidentia, Nicolás Maduro, New Yorkimi unnerluutigineqarpoq ilaatigut peqqarniisaarniarluni ikiaroornartumik anngiortumik eqqussuisimasutut, kokainimillu suleqatigiipilunnikkut eqqussuisimasutut.
Tamanna USA-p inatsisinut atuutsitsinermut ministeria, Pam Bondi, attaveqaqatigiittarfikkut X-ikkut nalunaarutigaa.
Madurop nulia, Cilia Flores, aamma unnerluutigineqarpoq. Kisianni suna pillugu unnerluutigineqarnersoq ersersinneqanngilaq.
- Nicolás Maduro nulialu, Cilia Flores, New Yorkip kujataani unnerluutigineqarput, Pam Bondi allappoq.
Nicolás Maduro peqqarniisaarniarluni ikiaroornartumik USA-mut anngiortumik eqqussuisimasutut, suleqatigiipilunnerlu aqqutigalugu kokainimik eqqussuisimasutut unnerluutigineqarnermi saniatigut "USA-mut saassussinissamut aallaasinik piginnittuunermut suleqatigiipilunnikkut isumaqatigiissuteqarsimasutut" unnerluutigineqarpoq.
- Sukkasuumik USA-p inatsisinik atuutsitsinerata nukinga tamakkiisumik USA-mi qanoq ittuunersut malugissavaat, Pam Bondi præsidenti nulialu pillugit allappoq.
Maduro arfininngornerup unnuaani USA-p sakkutuuinit tigusarineqarpoq Venezuelamiillu aallarunneqarluni.
USA-p inatsisinik atuutsitsinermut ministeriata præsident Donald Trump qujassuteqarfigaa Maduro pillugu akisussaaffimmik tigusisimanera pillugu, aamma USA-p sakkutuuinut qujassuteqarpoq Venezuelami suliap naammassineranut.
Sumi qanorlu Maduro nulialu tigusarineqarsimanersut paasissutissat suli saqqummiunneqanngillat.
Aamma ilisimaneqanngilaq parnaarussat sumiinnersut.
Trumpip siulliulluni oqaluttuarivaa Maduro tigusarineqarsimasoq.
- USA-p angusaqarluartumik saassussinera annertooq Venezuela-mi ingerlanneqarpoq, siuttuallu, præsident Nicolas Maduro, nulialu tigusarineqarlutik nunamit aallarunneqarput, amerikamiut præsidentiat siusinnerusukkut allappoq.
Maduro 2013-imiilli Venezuela-mi naalakkersuinermik saamerliusumik siulersuivoq, taamani Hugo Chávez præsidentitut taarsernerata kingorna.
