Nivi: Inuusuttut ilinniagaqartut ikiliartornerat ilungersunartutut isigineqarpoq

Inuusuttut meeqqat atuarfianniit soraarummeernerup kingorna ilinnialertarnissaannik ukiorpassuarni anguniagaq annerusumik sunniuteqarsimanngitsoq, naatsorsueqqissaartarfimmi inuusuttut ilinniagallit sulisartullu pillugit 2024-mi nalunaarusiami takuneqarsinnaavoq.

Naatsorsueqqissaartarfiup kisitsisaataani ima allassimavoq:

• Inuusuttut ilinniagaqanngitsut suliffeqanngitsullu 2024-mi 31 procentiupput. 

  2016-imiilli procentimik ataatsimik ikileriarput.

• Piffissami tamatumani inuusuttut suliffillit 2 procentimik amerleriarsimapput, ilinniagaqartulli 2 procentimik ikileriarsimallutik.

Ilinniartitaanermut Naalakkersuisup Nivi Olsenip politikkerinik naammattumik iluuseqarsimannginneraanissaq eqqortuunnginnerarpaa.

Unammilligassaq 

- Naatsorsueqqissaartarfiup kisitsisaatai politikkikkut suliaqarnermi ataavartumik atorneqartarput. Taakkua unammilligassaq annertuujusoq, siunissaq ungasinnerusoq eqqarsaatigalugu ataavartumik iliuuseqarfigineqartariaqartoq, takutippaat. Kisitsisit ineriartorneq aamma ingerlaavartoq takutippaat. Taamaattumik iliuuseqartoqarsimannginnerarlugu oqarneq ilumuunngilaq, Nivi Olsen Sermitsiamut oqarpoq.

Inuusuttut meeqqat atuarfianni soraarummeernerup kingorna ingerlariaqqiffiusumik ilinniartunngortalernissaat pingaarnertut annertuumik ukkatarineqartut ilagigaat ilanngullugu tikkuarpaa.

- Inuusuttut ukiuni arlalinni politikkikkut annertuumik ukkatarineqarput, inuusuttullu periarfissaasa pitsanngorsarnissaat anguniarlugu pitsaanerusumik siunnersuinikkut, eqaannerusunik ilinniarfissanik atoruminartunillu pilersitsinikkut, suliffinnik misiliinissamut periarfissagissaartitsisut kiisalu ilinniartitaanerup suliffissuarnillu ataqatigiinnerulersitsinikkut suliniuteqartoqarpoq, Nivi Olsen oqarpoq, nangillunilu:

Meeqqat atuarfiat nukittorsarlugu

- Taamaattumik meeqqat atuarfiata pitsanngorsarneqarnissaa, inuusuttut ilinniarfinnut ajornannginnerusumik ikaarsaarsinnaalernissaat ilinniartitaanermilu neqeroorutit inuusuttunut naleqquttut piviusorsiortutut isigineqalernissaat sulissutigineqarput.

Ataatsimoorussamik iliuuseqarfigineqartoq aamma "aaqqiissutit assigiinngiiaartariaqartut“, Nivi Olsenip nassuiaatigaa. Tamatumunnga atatillugu suliniutit ilaat tassaasut "inuussutissarsiornermut tunngasunik ilinniarfinnik, ilinniartut suliffimmilu misiliisunut amerlanerusunik inissaqartitsinissamik qanittukkut paasititsiniaanerit“.

Tamarmik ajortuinnaanngillat

- Inuusuttut tamarmik ilinniagaqarnissamut periarfissaat assigiinngillat. Taamaattumik inuusuttut amerlanerusut suliffeqarnerat ajortuinnaanngilaq.

Ilaasa siusissukkut suliffittaarneq paasisimasaqarlualernerunissaminnut kajumississutigisinnaavaat, kingusinnerusukkullu ilinniagaqarnissaminnut alloriarfiusinnaalluni, Nivi Olsen erseqqissaavoq oqaatigalugulu Naalakkersuisut inuusuttunut periarfissanik nukittorsaaneq suli pingaarnerpaatikkaat.