Nukissiorfiit Ameraliup kangerluani angallannermik killilersuissasut
Innaallagissap Utoqqarmiut Kangerluarsunnguanut aqqutaata iluarsartuunnissaa pisariaqartoq, Nukissiorfiit paasissutissiipput.
Buksefjordenimi erngup nukinganik nukissiorfik Nuummi innaallagissamik pilersuisuuvoq.
Arkivfoto: Leiff Josefsen
Nukissiorfiit kangerluk ikaarlugu innaallagissap aqqutaanik wirerersuarmik Utoqqarmiut kangerluarsunnguanni erngup nukinganik nukissiorfimmiit Nuummut sarfalersuisumik iluarsartuussilluni augustimi suliaqassaaq.
Taamaattumik Ameraliup kangerlua Nuup kujataatungaaniittoq augustip pingajuaniit 17-iata tungaanut angallavigineqarsinnaanera killilersimaarneqassaaq.
Taanna Nukissiorfiit tusagassiuutitigut nalunaarummi allapput.
Ameralik ikaarlugu wirerersuit ikkussat sisamaat Nuummut innaallagissamik pilersuinermi sillimmataasoq 2024-mi ukiukkut anorersuarnerani nakkarnikuunera pissutigalugu iluarsartuussisoqartussaavoq.
Wirerersuit sinneri ajoqusissappata erngup nukinganik nukissiorfik Nuummut innaallagissamik pilersuisinnaajunnaassaaq, Nuummilu innaallagissiorfik dieselimik ingerlateqartoq kisimi naatsorsuutigineqalissalluni.
Taamaammat Nuup innaallagissamik siunissami pilersugaanera isumannaarumallugu wirerip sillimmataasup nutaap ikkunneqarnissaa pisariaqarpoq, Nukissiorfiit allapput.
Angallaviup killilersorneqarfissaa.
Angallattunut akornutaasinnaasoq
Ameralik ikaarlugu wirerersuit nunarsuarmi taamatut ikkussat takinersaraat, taamaammallu nunatta avataani suleqatigisat immikkut ilisimasallit suleqatigalugit wirerersuarmik taarsiinissaq suliatut annertuujusutut oqaatigisariaqarpoq.
Nukissiorfiit ullut Ameraliup kangerluanik matoqqatitsilluni suliaqarfiusussat malinnaaffigilluarneqarnissaat kaammattuutigissavaa, ullullu suliaqarfissat pillugit pilersaarut nittartagaanni takuneqarsinnaapput.
– Ameraliup matoqqagallarnissaata angallattunut akornusersuisinnaanera eqqumaffigaarput, ullunili taakkunani suliaq naammassiniarneqassaaq taamaalinerani sila atoruminarnerusarmat suliffeqarfiillu suleqatigisat nunatta avataaneersut piffissami tassani suliamik ingerlatsisinnaammata, Nukissiorfiit allapput, nangippullu:
– Ameralimmik matoqqatitsigallarnissap kangerlummut pulaniartunut akornusersuisinnaanera ajuusaarutigaarput, angallannermili isumannaallisaaneq siunissamilu innaallagissamik ataavartumik pilersuinissaq pingaaruteqarmata Ameraliup kangerluanik ulluni taaneqartuni matoqqatitsinissap malinneqarnissaa pingaaruteqarluinnarpoq.
