Asasara Trump,
Inger Platouimik ateqarpunga.
Asasara Trump,
Inger Platouimik ateqarpunga.
Ilinniartitsisutut soraarneruvunga, maannalu nutserisutut, atuakkiortutut eqqumiitsuliortartutut namminersortuullunga Colobiamiunillu marlunnik meeravissiaqarlunga eqqissisimallunga inuullunga. Piumassuserinngisamik spiralilersorneqartunut akuunera pissutigalugu naartusinnaajunnaarpunga, taamaammallu meeravissiartaartariaqarsimallunga.
SUNA TRUMPIMUT OQAATIGISSAGALUARPIUK?
Takorluulaariaruk præsident Donald Trumpip adressea pisimallugu allakkamik nammineq assammik allatannik nassinnissaanut periarfissaqarlutit. Qanoq allaffigissagaluarpiuk?
Trumpimut, USA-mut Kalaallillu Nunaannullu tunngasut tamaasa allatulaaq sammiumallugit Sermitsiamiit inunnik arlaqanngitsunik Donald Trumpimut namminneq allagaqarnissaminnut piffissaqarlutillu kajumittunik pissarserusuppugut.
Peqataanissannut soqutiginnikkuit mailimut uunga allassinnaavutit: bk@sermitsiaq.gl.
Kalaallit allat assigalugit nunasiaanerup nalaani inunngorpunga, qallunaanilli ikinnguteqarpunga naak Danmark tassaasimangaluartoq nunasiaataatilissuaq. Kalaalerpassuit allat assigalugit aamma danskinik ilaqutaqarpunga, Danmarki qallunaallu attaveqarfigilluartuaannarsimavagut, naak nunasiaataanikuugaluarluta.
Angajoqqaakka peqatigalugit nunatsinni ukiorpassuarni toqqissisimallutalu eqqisseqatigiilluta inuuvugut. Nunatsinni alianaatsumi, toqqissisimaffiusumi eqqissineqarfiusumilu ikioqatigiittarluta, tapersersueqatigiittarluta isumassoqatigiittarlutalu inuuvugut — allamiunit takornartanilluunniit aqagu ullulluunniit 20-t qaangiuppata qanoq pisoqarumaarneranik ernumatinneqarsimanngilagut. Ulluinnarnili inuunitsinnut eqqissisimaffiusumut akuliukkaangavit annilaangalersillutalu toqqissisimajunnaartarpugut.
Nalunngilara Kalaallit Nunaanni aatsitassaatigut ilinnut kajungernartuusut, uagulli pigivagut, tigusinnaanngilasilu. ’Nuna manna asuli aallerfiinnaassanngilaq’, aamma naak allanit aningaasaateqarnerugaluartutit, isumaqassanngilatit nammineq piumasannik iliorsinnaasutit.
Inger Platou angerlarsimaffimmini Trumpimut allappoq.
Assi: Oscar Scott Carl
Uagut Inuit, Kalaallit, pinngortitami peqqarniitsumi ukiorpassuarni inuuffigalugu aningorsinnaasimavarput, inuiaat allat taamaaliorsinnaasimanngillat. Nammineq sakkut, qajaat, umiat, qimussit, puisip amianik atisat, kamiit, saviit, illut, allallu, Inuit nunanit allamiunit ikiorneqaratik pilersitatik atorlugit aninguisarsimapput! Inuiaavugut tulluusimaartut, Inuttut kinaassuserput sorsuutigaarput, namminerlu oqaatsigut inooriaaserpullu attatiinnarniarlugit sorsuppagut. Tamakku tamaasa aserortissanngilatit. Nunatsinni nammineq – Kalaallit Nunaanni – ingerlalluarpugut.
Nunami maani inuppassuit assigalugit isumaqarpunga ataqqinninnerit takutittariaqarit! Nunasiaatitut aallaqqaataaniit aallarteqqikkusunngilagut. Ilisimaarulluarparpullu USA Alaskami naggueqatitsinnut qanoq iliorsimanersoq...
Neriuppunga, tusarnaassagitigut.
Ernumassutigaaralu ullut ilaanni itissallunga Kalaallit Nunaanni sorsunneq aallartissimasoq.
Inger Platou, Nuuk, Kalaallit Nunaat
