Kalaallit Nunaanni LGBTQIA+-it peqqissusaat pillugu ilisimasat killeqarput.
Allanngortinneqartussanngorporli. Inuit Pisinnaatitaaffii pillugit Siunnersuisoqatigiit, Sipineq+ aamma Kalaallit Nunaanni Innuttaasut Peqqissusiannik Ilisimatusarfik nuna tamakkerlugu LGBTQIA+-it peqqissusaat atugarissaarnerallu pillugu apeqqutinik immersugassanik misissuinissamut aningaasaliiffigineqarput.
Kalaallit Nunaanni LGBTQIA+-it peqqissusaat pillugu ilisimasat killeqarput.
SUNAANA LGBTQIA+?
LGBTQIA+-imiuna naqinnerit qanoq isumallit?
L: Arnaqatiminoortoq
G: Anguteqatiminoortoq
B: Suiaqatigisanoorlunilu suiaqatiginngisanoortoq
T: Inunnguuserinngisaminik suiaassusilik
Q: Queer (suiaassusaat aalajangersimanngitsoq)
I: Inunnguutsiminik suiaassusersiuminaatsoq
A: Atoqateqarusussuseqanngitsoq
+: Naqinnernut ilanngunneqanngitsunut atuutsinneqartoq
Allanngortinneqartussanngorporli. Inuit Pisinnaatitaaffii pillugit Siunnersuisoqatigiit, Sipineq+ aamma Kalaallit Nunaanni Innuttaasut Peqqissusiannik Ilisimatusarfik nuna tamakkerlugu LGBTQIA+-it peqqissusaat atugarissaarnerallu pillugu apeqqutinik immersugassanik misissuinissamut aningaasaliiffigineqarput.
Inuit Pisinnaatitaaffii pillugit Siunnersuisoqatigiit tusagassiuutitigut taama nalunaaruteqarput.
Misissuineq taama ittoq siullersaalluni LGBTQIA+-inut maanna siunissamilu allannguilluinnarsinnaavoq.
Nalunaarusiaq “Kalaallit Nunaanni LGBTQIA+-iuneq” 2024-mi saqqummerpoq, tassanilu inuit LGBTQIA+-iusut Kalaallit Nunaanni inuiaqatigiinni unammilligassarpassuaqartarnerat, ilaatigut immikkoortinneqartarlutik, nikagineqartarlutik inuiaqatigiinnilu akuerineqarpiarneq ajornerat paasineqarpoq.
Kingunerlutsitsingaarsinnaavoq, tarnikkut ajornartorsiuteqalernernik, isumatsassimangaarnermik, annilaanganermik ajornerpaamillu imminut toqunnermik kinguneqarsinnaalluni.
Nunani tamalaani misissuinerit nunat inoqqaavi aamma LGBTQIA+-iusut, inuiaassutsinut allanut sanilliullugit immikkoortinneqarnissamut, nakuuserfigineqarnissamut, atugarliornissamut, imminut toqunnissamik eqqarsaateqalernissamut imminorniarsarinermillu navianartorsiortinneqarnerusartut nalunaarusiami aamma ersersinneqarpoq.
Innuttaasut misissuiffigineqarnerat tunngavigalugu
Kalaallit Nunaanni inuit LGBTQIA+-iusut peqqissusaat pillugu ilisimatusarneq paasissutissallu killeqartorujussuummata, inuit LGBTQIA+iusut nuna tamakkerlugu innuttaasunik misissuinerni ilanngunneqartarnissaat nalunaarusiami ersarissumik inassutigineqarpoq.
Taamaaliornikkut innuttaasut sinnerinut aamma inuit LGBTQIA+-iusut qanoq amerlatiginerat, taakkualu nunatsinni inuiaqatigiinni peqqissutsikkut unammillernartitaat paasiniarneqarsinnaalerniassammata.
Misissuinissaq Innuttaasut Peqqissusaannik Misissuinermik maanna ingerlanneqartumik tunngaveqarpoq – nunami peqqissutsimik misissuinerit annersaat.
Tamanna inuit LGBTQIA+-iusut peqqissusaannik atugarissaarnerannillu innuttaasunut allanut sanilliussinissamut periarfissiissaaq. Misissuineq siunissami suliniutinik tunngaviliissaaq, aamma innuttaasut LGBTQIA+-iusut peqqissusaat atugarissaarnerallu pillugit ersarissumik takutitsisussaavoq.
Apeqqutit immersugassat inunnut LGBTQIA+-iusunut Kalaallit Nunaanni najugaqartunut tamanut ammassapput inuillu attaveqaqatigiittarfii aqqutigalugit siammarterneqarumaarlutik.
