Nunanut allanut tunngasunut ataatsimiititaliaq USA-mut attaveqarneq pillugu immikkut ittumik ataatsimiippoq
Donald Trumpip Kalaallit Nunaat pillugu oqaaseqaatai kingulliit pissutigalugit nunanut allanut tunngasunut ataatsimiititaliaq marlunngornermi unnukkut ataatsimiissaaq.
Kalaallit Nunaat pineqartillugu Danmarkip USA-llu attaveqatigiinnerat ilungersunartumik inissisimavoq. Donald Trumpip Kalaallit Nunaat USA-mut ilanngunneqarnissaanik kingullertigut kissaateqarnermini oqariartuuteqaqattaarpoq. (Assi toqqorsivimmiit.)
Assi: Christian Hartmann/Ritzau Scanpix
Folketingimi nunanut allanut tunngasunut ataatsimiititaliaq Christiansborgimi marlunngornermi danskit nalunaaqutaat malillugu nalunaaqutaq 18.00 immikkut ittumik ataatsimiissaaq.
Ataatsimiititaliaq aalajangersimasumik ataatsimiinnerit ingerlattarpai, ilaasortaminilli marlunngornermi immikkut ittumik ataatsimiigiaqqusivoq, nunanut allanut tunngasunut ataatsimiititaliap allattoqarfia Ritzauimut ilisimatitsivoq.
Ataatsimiinnissamut qaaqqusissummi oqaluuserisassatut allassimasutuaq tassaavoq; “Kunngeqarfiup USA-mut attaveqarnera”.
Ataatsimiigiaqqusineq pivoq USA-p præsidentiata Donald Trumpip
Kalaallit Nunaannik aqutsilernissaminik kissaateqarnini
arlaleriarluni uteqattaareeraalu.
Nunanut allanut ministeri Lars Løkke Rasmussen (M) illersornissamullu ministeri Troels Lund Poulsen (V) danskit naalakkersuisuinit ataatsimiinnermi peqataassapput.
Ullualuit matuma siorna Donald Trump oqarpoq USA-p “isumannaatsuunissaa eqqarsaatigalugu Kalaallit Nunaat pisariaqartikkaa”.
Præsidentip annerusumik qaqugu Kalaallit Nunaannut iliuuseqarnissani oqaaseqarfigerusunngilaa.
- Natomut ilaasortaasup allap Natomut ilaasortaq saassuppagu, taava suut tamarmik atorunnaassapput, Statsminister Mette Frederiksen (S) ataasinngornermi oqarpoq.
Danskit nalunaaqutaat naapertorlugu marlunngornerup unnuaani USA-p præsidentiata Donald Trumpip, Det Hvide Husimi pisortaata tullia Stephen Miller oqarpoq "kinaluunniit USA-mut sakkutuulersorunnanngitsoq, Kalaallit Nunaata siunissaa pillugu".
- USA-p Issittoq isumannaatsuutissaguniuk Natollu soqutigisai illersorniarlugit Kalaallit Nunaat USA-mut ilaasariaqartoq erseqqippoq, Stephen Miller CNN-imut oqarpoq.
Jens-Frederik Nielsenip, Kalaallit Nunaanni Naalakkersuisut Siulittaasuata, Amerikamiut eqqarsaataat itigartippaa.
- Nanertuiniarnerit unitsillugit. Ernumasaarinerit unitsillugit. Tiguaaniarnernut sinnattuaqinerit unitsillugit., Jens-Frederik Nielsen sapaatikkut facebook-imi allappoq.
/ritzau/
