Nunarsuaq 125-riarlugu kaajallaallugu

Illersornissaqarfiup timmisartuutai Herculesit, Kalaallit Nunaannut akuttunngitsumik mittartut, nalunaaquttap-akunnerpassui timmisartoreerput.

Timmisartut taakkua ilaat sapaatip-akunnerata naanerani kingullermi angusaqarpoq: nalunaaquttap-akunneri 10.000-it sinnerlugit timmisimavoq. Tassa timmisartoq B-537-mik normulik.

Qallunaat timmisartui C-130J Herculesit allat pingasut assigalugit sakkutuunut timmisartortartunut 2004-miit 2007-imut tunniunneqarpoq, taakkulu sisamat timmisartut C-130H-t pingasut 1975-imi pisiarineqartut taarserpaat.

Timmisartoq Hercules agguaqatigiissillugu nalunaaquttap-akunneranut 500 kilometerinik sukkassuseqarmat, nunarsuaq 125-eriarlugu kaajallallugu imaluunniit qaammat 6,5-eriarluni tikillugu uterlugulu timmisartoreersimavoq.Ukioq ataaseq sinnerlugu silaannarsuarmi

Timmisartut Hercules Aalborgimi Air Transport Wing-imit aqunneqarput. Tassani nalunaaquttap-akunneri 10.000-it timmisartorsimasut tassaasut ullut 416-it — tassa ukiut 20-ngajaat ingerlaneranni ukioq ataaseq sinnerlugu silaannarsuarmiissimasut naatsorsuunneqarsimavoq.

- Timmisartortartugut, teknikerigut usilersuisartullu nalunaaquttap-akunnerpassui timmisartumi allaffimminni atorpaat, Air Transport Wing Facebookimi allappoq.

Aammattaaq Danmarkip Kalaallillu Nunaat akornanni uteqattaarsimapput. Siornatigut pingaartumik Tunup avannaanut Kangerlussuarmullu timmisartuussisarsimapput, maannali isumannaallisaanikkut pissutsit allanngornerat pissutigalugu sinerissami mittarfinni Herculesinik takusaqartarneq nalinginnaalersimavoq.

Tunup avannaani mittarfiit ujaraaqqanik qallikkat pissutigalugit timmisartut Hercules Challengerilu nunarsuarmi kisiartaallutik ataanni skummiusamik ujaqqanut nakkaasunut illersuutaasumik qallerneqarsimapput.

Danskit timmisartui Hercules aamma nunani tamalaani, ilaatigut Afrikami Afghanistanimilu, sakkutuunik angallassisarsimapput.

Timmisartumut taamaattumut akunnerit 10.000-it amerlagisassaanngillat. Siorna timmisartuliorfiup, Amerikami Lockheed Martinip pisariaqartunik pitsanngorsaasoqartarpat timmisartup taassuma suluisa nalunaaquttap-akunneri 90.000-iniit nalunaaquttap-akunneri 125.000-inut atorsinnaanissaat akuerisimavaa.

Inissaqarluartoq

Timmisartoq C-130J Hercules 19 tonsinik useqarsinnaallunilu 120-nik ilaasoqarsinnaavoq. Ilaasunik timmisartuussinermi issiaviit Jyskimi pisiassanut assingusut atorneqartarput. Kisianni qutsillunilu pisunnissamut inissaqarluarpoq.

Aammattaaq timmisartoq C-130J perusuersartarfeqarpoq Herculesitoqqat 1975-imeersut taamaanngillat.

Herculesit sakkutuunut timmisartuugaluarlutik sakkulersorneqanngillat. Tamarmilli qaammaqqutinik taaneqartartunik, tassa qaartartut kissarsuutillit timmisartumut qanillinnginniassammata timmisartumiit igeriunneqarsinnaasaminnik, atortoqarput.

Timmisartut Herculesit tamarmik Aalborgimi sakkutooqarfimmi Flyvestation Aalborgimiittut, eskadrille 721-mut ilaapput. Taakku Danmarkimi sakkutooqatigiit pisoqaanersaraat oktobarip aqqaneq-aappaanni ukiut 100-nngortorsiortussapput. Taamaammat B-537 assimiittoq aarluarsummik sululimmik, Eskadrille 721-p ilisarnaataata ilaanik, kusassagaavoq.

Sakkutuut timmisartui Hercules sisamat ukuupput: B-536, B-537, B-538 aamma B-583.