Nunat avannarliit ministerii: Kalaallit Nunaat pillugu apeqqut Kalaallit Nunaannut tunngavoq
Nunat avannarliit ministerii Finlandimeersut, Sverigemeersut, Norgemeersut Islandimeersullu kalaallit danskillu namminersornerat illersorpaat.
Nunanut allanut tunngasunut ministeri Lars Løkke Rasmussen (M) Nunanut allanut tunngasunut ataatsimiititaliami ataatsimiigiartoq. Ataatsimiinnermi Danmarkip USA-mut attaveqarnera oqaloqatigiissutigineqassaaq.
Assi: Emil Helms/Ritzau Scanpix
Danmark aamma Kalaallit Nunaat pillugit apeqqutit Danmarkip Kalaallit Nunaatalu kisimik aalajangiiffigisassaraat. Nunat avannarliit nunanut allanut ministerii nalunaarummi taama uteqqiipput.
Danskit nunanut allanut ministeriaqarfia taama nalunaaruteqarpoq.
Finland, Island, Norge, Sverige Danmarkilu nalunaarummik tamatuminnga atsioqatigiipput.
- Nunatut avannarlertut, issittumi naalagaaffittut Natomilu suleqataasutut Issittumi isumannaatsuunerup, patajaatsuunerup suleqatigiinnerullu ataatsimut attatiinnarnissaat pisussaaffigaarput, nalunaarummi allassimavoq.
- Tamatta nunap immikkoortuani aarlerisaarinerup pinngitsoortinnissaa illersornissamillu iliuuseqarnerunissaq anguniarlugu iliuuseqarpugut, ilaatigut nutaanik piginnaanngorsaanikkut, suliniuteqarnikkut, sakkutooqarnermik ineriartortitsinikkut pissutsinillu ilisimanninnerulernikkut, ministerit nangillutik allapput.
Nunalli suli annertunerusumik iliuuseqarnissamut piareersimapput. USA-li Natomilu suleqataasut allat qanimut oqaloqatiginerisigut tamanna pissaaq.
Issittumili isumannaatsuuneq Naalagaaffiit Peqatigiit isumaqatigiissutaanni najoqqutassianik tunngaviusunik nunallu tamalaat akornanni inatsisinik, ilaatigut killeqarfiit ataqqineqarnissaannik, ataqqinninnermik tunngaveqartoq erseqqissarneqaqqippoq.
Nunanut allanut ministerit taamatut nalunaaruteqarput USA-p præsidentiata Donald Trumpip Kalaallit Nunaannik aqutsinissamik kissaateqarnini uteqattaareeraalu.
Pissutsit pillugit folketingimi nunanut allanut tunngasunut ataatsimiititaliaq marlunngornermi danskit nalunaaqutaat malillugu nalunaaqutaq 18.00-miit Christiansborgimi immikkut ittumik ataatsimiilerpoq.
Ataatsimiinnissamut qaaqqusissummi allassimavoq oqaluuserisassatuaq tassaasoq “Kunngeqarfiup USA-mut attaveqarnera”.
Nunanut allanut ministeri Lars Løkke Rasmussen illersornissamullu ministeri Troels Lund Poulsen (V) danskit naalakkersuisui sinnerlugit ataatsimiinnermut peqataapput.
Ministeriuneq Mette Frederiksen (S) nunat Ukrainemut tunngasumik suleqataasut ataatsimiinneranni peqataajartorluni Parisimiippoq.
Ullualuit matuma siorna USA-p præsidentia oqarpoq USA-p “Nunatta isumannaatsuunissaa eqqarsaatigalugu Kalaallit Nunaat pisariaqartikkaa”.
Kalaallit Nunaannullu iliuuseqassanerluni oqaaseqarfigiumanngilaa.
Jens-Frederik Nielsenip Amerikamiut eqqarsaataat itigartippaa.
- Naammalerpoq. Tatisineq unitsinneqartariaqarpoq. Oqallatsiarnerit unitsinneqarlik. Nunap allap tiguarnissaanik takorluuinerit unitsinneqartariaqarput, sapaatiummat allappoq.
- Nuna Natomut ilaasortaq nunamik allamik saassussippat, taava suut tamarmik atorunnaassapput, Mette Frederiksen aqaguani oqarpoq.
USA-p aallartitaasa ilaata, Stephen Millerip, marlunngornerup unnuaani oqaatigaa “Kalaallit Nunaata siunissaa pillugu USA sakkutuulersorluni saassussinavianngitsoq”.
- USA Nato-mi pissaanilissuit annersaraat. USA-p Issittoq isumannaatsuutissaguniuk Nato-llu soqutigisai illersorniarlugit Kalaallit Nunaat USA-mut ilaasariaqartoq erseqqippoq, Stephen Miller CNN-imut oqarpoq.
