Nunatsinni kalaallinik tusagassiortussaaleqineq aaqqiiviginiarneqalerpoq

Tusagassiuinermi Sulisut Peqatigiiffiat qallunaat nunaanni tusagassiornermik ilinniarfik (Danmarks Journalisthøjskole - DMJX) suleqatigalugu, tusagassiorfinni kalaallisut oqaluttunik tusagassiortussaaleqineq aaqqiiviginiarlugu, Nuummi inunnik arfineq-marlunnik septemberimiit ukiup affaata ingerlanerani kittaartumik ilinniartitsisoqassaaq.

KNR-imi tusagassiortutut ilinniagaqanngitsut sulisut arfinillit influencererlu (Nittartakkatigut isummanik siammarterisartoq, aaqq.) ataaseq ilinniartinneqassapput.

Tusagassiuinermi Sulisut Peqatigiiffianniit tulluusimaarutigineqarpoq nammineerlutik ilinniartitseqqiinermik suliniuteqarnertik piviusunngoraluttualermat.

- Ukiorpanngortuni oqartussanik iliuuseqaqqusilluta naammagittaalliortuarsimavugut. Isornartorsiuiinnaratali nammineerluta iliuuseqarsinnaagatta tulluusimaarutigaarput, Arnaq Nielsen, Tusagassiuinermi Sulisut Peqatigiiffianni siulittaasoq Sermitsiamut oqarpoq.

Tamat oqartussaaqataanerannik nukittorsaassasoq

Ukiuni makkunani Kalaallit Nunaata tatisimaneqarnerani kalaallisut oqaluttunik tusagassiortussaaleqineq nunatsinni tamat oqartussaaqataanerannik navianartorsiortitsivoq.

- Innuttaasut kalaallisut oqaatsitik namminneq atorlugit tutsuiginartumik tusagassaqartinneqarnissaat pisariaqaleraluttuinnarpoq, taamaammat tusagassiortut piorsarsimassutsitsinnik ilisimasaqartut tusagassiornermi pingaarutilerujussuupput, Arnaq Nielsen oqarpoq.

Kalaallisuinnaq oqaaseqartut tusarfittut oqaatsitik atorlugit attavigineqarsinnaanissaat pingaartinneqarpoq.

- Nunatsinniippugut, nunaqqateqarpugut allamiusut oqalussinnaanngitsunik, kalaallisuinnaq oqaaseqartunik peqataatitsinngikkutta nutaarsiassani kalaallisuinnaq oqaasilinnik katataatitsisinnaavugut. Taamaammat pingaarutilerujussuuvoq kalaallisut oqaasilinnik amerlanerusunik tusagassiortoqarnissaq, Arnaq Nielsen oqarpoq.

Tusagassiornerup qanoq pingaartiginera tamanit ilisimaneqarnerusariaqartoq pingaartinneqalerlunilu, Arnaq Nielsen oqarpoq.

Ilinniartitsinissamut aningaasaliisut

Tusagassiortutut ilinniarsimanngitsut tusagassiorfinni sulisut, ilinniartinneqaqqinnissaannut aningaasat pisariaqartinneqartut pissarsiarineqarsimalerput.

Tusagassiuinermi Sulisut Peqatigiiffiata siulittaasua nassuiaavoq suliniut Politikens Fondimit 300.000 koruuninik aamma Oak Foundation Denmark 800.000 koruuninik aningaasaliiffigineqarsimasoq.

Tusagassiuteqarnermut aningaasaliissutit qaffanneqarlik

Naalakkersuisut suliniummut allakkatigut tapersersuinertik takutissimavaat, aningaasatigulli tapersersiisimanatik.

Pisortat tusagassiutilerinermik suliaqartunut aningaasaliiniaataartarnerat siulittaasup uparuarpai. Taanna naapertorlugu ussassaarutit tusagassiorfinnut suliakkiunneqarsinnaasut allaat Facebookikkut siorna nittarsaanneqarnerulerput.

Naalakkersuisullu tusagassiuteqarnerup iluani amerlanerusunik aningaasaliisarnissaat ujartorneqarpoq.

- Uggornarpoq Naalakkersuisut uunga suliniummut aningaasaleeqataanngimmata, neriuppunga siunissami aningaasaleerusulersinnaassasut, Arnaq Nielsen oqarpoq.