Nunatsinni kingunerlutsitsinertut taajumaneqannginnera uissuumminarpoq

Ullumikkut Naalakkersuisut spiralilersuinermi suliami inuit pisinnaatitaaffiinut tunngasut pillugit nalunaarusiat marluk, ilisimatusartunit marlunnit suliarineqarput saqqummiuppaat. 

Ilisimatusarnermi eqimattat marluk pineqarput, ilisimatusartummi marluk eqimattaaqqaartoq isumaqatigiinnginneq pissutigalugu qimammassuk. 

Taamaattoq meeqqanut, inuusuttunut, inatsisit atuutsinneqarnerannut naligiissataanermullu naalakkersuisoq Mariane Paviasen (IA) eqimattanit anisunit nalunaarusiaq suliamik suliakkiinerannut naammassinninngitsoq Naalakkersuisut nalileraat, tusagassiortut katersortinneqarneranni oqarpoq. 

Inuiannik nungusaaneq pineqanngitsoq eqimattamit anisut nalunaarusiaminni erseqqissarpaat. Tamatuttaaq aaqqissuussamik ataatsimoorlutilluunniit inuiaqatigiinnik innarliisoqarsimaneranut naammattumik uppernarsaatissaqannginnera taakku oqaatigaat. 

- Aappaani aaqqissussamik pisoqarsimanera, pisut paatsoornernik assigisaanillu aallaaveqarsinnaanerat isiginiarneqannginnera uissuumminartuusoq isumaqarpunga. Matuma nunatsinni ataatsimut kingunerlutsitsineruneranik taajumaneqannginnera uannut uissuumminartuuvoq, arlaatigullu tamanna ilisimatuussutsikkut tunngavissaqartinneqarsimassaaq, Naalakkersuisut siulittaasuat Jens-Frederik Nielsen (D), Sermitsaimit apersorneqarluni oqarpoq. 

”Tarnikkut misissueqqissaarnerit ataatsimut, nuna tamakkerlugu kingunerlutsitsinermik kalaallinulluunniit innuttaasunut tamanut tarnikkut kinguneqannginnerannik takorluuinermut tunngavilersuutitut atorneqarsinnaanngillat”, eqimattamit anisut nalunaarusiaanni allassimavoq. 

AAMMA ATUARUK

Inuiannik nungusaasoqarsimava? Naamerluinnaq, immikkut ilisimasallit suleqatigiinnit anisut oqarpoq

Taamatulli paasinninneq Jens-Frederik Nielsenip isumaqatiginngilaa. Taamanikkut pisut ullumikkut sakkortuumik pinerlunnermik iliuusaassagaluartut, taanna oqarpoq. 

- Tamatumani pisimasut sakkortunerat patsisaavoq. Kalaallillu Nunaanni inuiaqatigiinnilu inuugaanni, tamanna ataatsimoorussamik nuna tamakkerlugu kingunerluutaavoq, taanna Sermitsiamut oqarpoq. 

Qulaajarneqarsimasut tamaasa isiginiarumagai  

Eqimattamit anisunit nalunaarusiaq peer reviewimi allassimasut kisiisa aallaavigalugit, taamaalillunilu nalunaarusiap imarisaaniinngitsoq itigartissallugu Naalakkersuisut toqqarsimagaat, Jens-Frederik Nielsenip nassuiaatigaa. 

Taamaakkaluartoq suliap ingerlaqqinnerani nalunaarusiat tamaasa atorneqarnissaat naatsorsuutaavoq. 

- Ingerlariaqqinnermi qulaajarneqarsimasut tamakkerlugit isiginiassavagut. Tassaniipporlumi. Nalunaarusiallu tamaasa tunuliaqutaralugit peqqinnartumik pingaarutilimmillu tamat oqallinnissaat piumaartoq qularutiginngilara. 

Ilisimatusartut ilaatigut spiralilersuinermik suliap kalaallinik inuuttaasunik inuiattut toqoraanerunersoq misissussallugu suliassaraa. Nalunaarusiap aappa erseqqissumik naaggaarpoq, aappalu aappimik naaggamilluunniit akinngilaq. Tusagassiortunik katersortitsinermi Jens-Frederik Nielsenip Mariane Paviasenillu inuiannik toqoraasoqarnera pineqarnersoq, Naalakkersuisut oqaatigisinnaanngikkaat erseqqissarpaat. 

Apeqqullu taanna suleriaqqinnermi misissoqqinneqarnissaata ilimanaateqarnerani, matumani arnat eqqorneqartut pingaarnerpaasut, Naalakkersuisut siulittaasuat oqarpoq. 

- Qanoq poortorusunneqarnera, aamma qanoq taagorumaneqarnera soorunami pingaaruteqarput. Arnat eqqorneqartut pillugit qanoq pitsaasumik saammaasseqatigiinnissamik suliamik aallartitsisinnaanitta qissiminnissaa maanna alloriarnertut siullertut tigusariaqaripput isumaqarpunga, taanna oqarpoq.  

Arnat misiginneqatigigai  

AAMMA ATUARUK

Inuiannik nungusaasoqarsimava? Oqartussat immikkut ilisimasalittut suleqatigiiviata akuersaarpaa imaluunniit itigartippaa

Arnanut qanoq oqarusuppit? 

- Misiginneqatigaakka. Anniaat misigisaat misigisinnaavara. Nalunaarutillu maanna saqqummersut kingunerlutsitsisinnaanerannik misiginneqatigaakka. 

- Alloriartoqarnera nuannaarutigaara. Utoqqatsertoqarnera nuannaarutigaara. Ajunngitsorsiaqartitsinissamik inatsisip akuerineqarsimanera nuannaarutigaara, naak aningaasat eqqunngitsuliornermik suliamik tammartitsinngisaannarnissaat nalunngikkaluarlugu. 

- Taamaammat akuersineq tassaniittoq ikinik mamisaanermut alloriarnerusinaasoq neriuutigaara. Misiginneqatigeqaakka, arlaannillu iliuuseqartoqarnissaa qulakkeerniarlugu iliuuserisinnaasakka tamaasa iliuuserissavakka. 

Inuit pisinnaatitaaffiinik unioqqutitsisoqartoq  

Akuersititseqqaarnani spiralilersuinerup inuit pisinnaatitaaffiinik unioqqutitsinerunera, nalunaarusiat marluullutik isumaqatigiissutigaat. Tamatumalu erseqqissarneqarnera Jens-Frederik Nielsenimut pingaaruteqarpoq. 

- Inuit pisinnaatitaaffiisa unioqqutinneqarsimanerat taakkunani marlunni inerniliunneqarnera nuannaarutigaara. Kalaallit innuttaasut ajortumik pineqarsimapput. Innuttaasullu isumaqatigiissutinut nunallu tamat akornanni inatsisinut tunngatillugu illersornissaannut pisussaaffik, taamanikkut naammaginartumik naammassineqarsimanngillat. Tamatumalu ingerlariaqqinnermi ilaatinneqarnissaa pingaartorujussuusoq isumaqarpunga, taanna oqarpoq. 

Naalakkersuisut sisamanik siunnerfeqarlutik suliamik nangitsissapput: 

1. Folketingip taarsiissuteqarnissamik aalajangernera ministeriunerullu utoqqatsernerat tusaaneqassapput. 

2. Nunatsinni ikip mamisarneqarnissaa aallartinneqassaaq, aamma naalagaaffiup tamanna akisussaaffigissavaa. 

3. Danmarki peqatigalugu saammaasseqatigiinnermut ataatsimiititaliarsuaq pilersinneqassaaq, piviusoq qulaajarneqassaaq saammasseqatigiittoqassallunilu.  

4. Piumasarineqassaaq naalagaaffik inatsisitigut ataataqanngitsunut, akuersisoqarsimatinnagu qitornavissiartaartitsisarnerillu aamma misissorneqarlutillu iliuuseqarfigineqassasut.