Nunatsinni pisiniarfiit annerit tamarmik meeqqat ulluanni imigassaarniassanngillat
Ataasinngorpat juunip aallaqqaataanni pisarneq malillugu meeqqat ullorsiussapput. Kalaallit Nunaanni Brugsenip, Pisiffiup aamma Pilersuisup pisiniarfiini ulloq taanna imigassat aalakoornartortallit matoqqatinneqassapput. - Annaasaqassuugut, kisianni aamma ajunngilaq, Nuummi Brugsenimi pisiniarfiup pisortaa Pipaluk Noahsen oqarpoq.
Pipaluk Noahsen Nuummi Brugsenip viinneerniarfiani. Taanna ataasinngorpat matoqqassaaq.
Assi: Oscar Scott Carl
Kalaallit Nunanni Brugsenip nunarput tamakkerlugu pisiniarfiini 17-iusuni ataasinngorpat imigassarsiniaraluaruit iluatsitsivallaarnavianngilatit.
Meeqqammi ulluanni imigassamik aalakoornartortalimmik tuniniaasoqassanngitsoq Kalaallit Nunaanni Brugsenimi aalajangiuteqqammerpaat.
- Pissusissamisoorami meeqqat ulluanni toqqissisimasumik ulloqartinneqassasut. Pingaartinneruarput meeqqat ajunngitsumik ulloqassasut, tassa peqqillutik nuannaarlutik, Pipaluk Noahsen Nuummi Brugsenimi pisiniarfiup pisortaa taama oqarpoq.
Pisiniarfiit annerit tamarmik matoqqatitsilersut
Meeqqat ulluanni Brugsenip pisiniarfiini imigassaarniarneq kujataani ukiut marluk matuma siorna misilinneqarnikuuvoq, nunarpulli tamakkerlugu Brugsenini aatsaat ullormi tassani matoqqatitsisoqartussaalluni.
Pilersuisup pisiniarfiini 67-ini meeqqat ulluanni aalakoornartortalinnik imigassaarniartoqassanngitsoq, KNI-mi sulisoqarnermut, attaveqatigiinnermut piujuaannartitsinissamullu pisortap Juliane Henningsen Heilmannip Sermitsiamut ilisimatitsissutigaa.
Pisiffik ulloq taanna aamma imigassaarniarnianngilaq.
- Ulloq nuannersoq ataatsimoornermik meeqqanillu ukkassiffiusoq qilanaaraarput – paasinnilluarnernullu tapersersuinissinnullu qujanaq, Pisiffiup Facebookimi quppernerani taama allattoqarpoq.
Ileqqunngortikkusukkaa
Niuertorpalaartumik eqqarsaraanni qaammatip naaqqamminerani isertitassat eqqarsaatigalugit imigassamik tuniniaanissaq orniginarnerusutut nipeqaraluarpoq.
Kisianni Kalallit Nunaanni Brugsenimi naliliinerminni meeqqat ullorsiornerminni toqqissisimanissaat pingaarnerutippaat.
Meeqqat ullorsiornerminni toqqissisimanissaat isertitassanit pingaarnerusoq Pipaluk Noahsenip oqaatigaa. Taamaammat meeqqat ulluanni imigassanik aalakoornartulinnik tuniniaasarunnaarnissaq ileqquulersikkusuppaa.
Assi: Oscar Scott Carl
- Uku isertitassat eqqarsaatigivallaanngilagut annaasassagut. Taanna eqqartornikuuarput, meeqqat ajunnginnissaat pingaartinnerugatsigu. Annaasaqassuugut, kisianni aamma ajunngilaq, Pipaluk Noahsen oqarpoq.
Meeqqat ulluanni imigassaarniartarunnaarnissaq ileqqunngussanersoq suli maannamut aalajangiiffigineqanngilaq. Nuummili Brugsenip pisortaa kisimi aalajangiissasuuguni ileqqunngortikkusukkaluarpaa.
- Siunnersuutigiumaarpara ukiut tamaasaasassasoq, isuma torrakkami. Nammineq aamma uanga meeraqarama paasinnissinnaasorujussuuvunga, Pipaluk Noahsen oqarpoq.
Arfininngornermi kingusinnerusukkut imigassaarniarneq
Brugsenip imigassanik tuniniaanermik killilersuinera alla qaammat una aamma pivoq. Pisiffik aamma Nuummi Kamik, arlariinnik pisiniarfiuteqartoq peqatigalugit arfininngorneri tamaasa imigassaarniarneq ullaakkut qulinut ammarnagu ulloqeqqanut aatsaat ammartarpaat.
Misiliineq ingerlaannassanersoq nalilersorneqassaaq, arfininngornikkulli ullaap tungaani imigassaarniassaarneq pisiniarfinni eqqissisimasoqarneruneranik kinguneqarpoq.
- Arfininngornerup ullaava eqqissimavoq. Aalakkuttunik takunngilagut. Ilaasa paaserpiarsimanngikkaat nuilaartaraluarput, kisianni paasinnittarput isumaqataanngilaariarlutik, Pipaluk Noahsen oqarpoq.
